Wanee jekechi Laülaashi Jülüjaka Aaʼin na Aküjaliikana Pütchi

ENEEROʼU 24 soʼu 2018, wattaʼa maalü, aküjünüsü namüin na weteliita chajanakana Estados Unidos otta Canadá, nüneekünüin chi wawalakai Kenneth Cook süpüla niainjachin wanee Laülaashi Jülüjaka Aaʼin na Aküjaliikana Pütchi sainküin Mma. Chi wawalakai wanaawasü nünülia nümaa chi nüshikai.

Chi wawalakai Cook, chajachi joʼuuin jee miyoʼuin nia chaa Pensilvania (Estados Unidos). Ekirajaashi nia nüchiki Maleiwa nünainjee wanee koleejiajiraashi nümaa süpülapünaa najaʼttirüin nükoleejiase. Woutiisashi nia juunioʼu 7 soʼu 1980. Pürekutsootshi rekulaat nia soʼujee settienpüroʼu 1 soʼu 1982. Piama juya süchikijee tia, ounejünüshi nia süpüla aʼyatawaa suluʼu Weteet. Aʼyataashi nia chaa Wallkill (Nueva York) oʼutuupüroʼu 12 soʼu 1984.

Soʼu 25 juya, naatayaa müsü tü kasa niʼyataakalü anain chi wawalakai Cook. Aʼyataapuʼushi nia eere shiʼinpürimiijünüin tü karaloʼutakalüirua otta suluʼu tü kanüliakat Oficina de Betel. Kasaatshi nia soʼu 1996 sümaa tü wawalakat Jamie otta shiʼyataaka chaa Wallkill wanaa nümaa. Soʼu 2009, aluwataanüshii naya chamüin Patterson suluʼumüin tü Ekirajaalee eekat sutuma Watchtower. Aʼyataashi chi wawalakai chaʼayaa suluʼu tü kanüliakat Correspondencia de Redacción. Shiasaʼa aaʼuriiroʼu soʼu 2016, aluwataanüshii naya nachikuaʼa chamüin Wallkill. Motsoʼo neʼe namaa chayaa jee yalejee, ajütünüshii naya chamüin Brooklyn. Otta jaʼrai kashi süchikijee tia, ajütünüshii naya chamüin Warwick. Eneeroʼu soʼu 2017, aneekünüshi chi wawalakai Cook süpüla shiʼipajachin nia Comité de Redacción.