Süsakiraka anain wayuu

Wanaa sümaa nüküjain Satanaa sümüin Eva nnojoluinjatüin outuin shia shiküle süchon tü wunuʼu atüjaweetkalü atuma wayuu saaʼu tü anasükat jee saaʼu tü mojusükat, ¿akumajaasüche yalejeechiki tü alawaa ekirajünakat süchiki sujuʼitüin naaʼin wanee wayuu outapa nia?

Nnojo. Wanaa sümaa shiküin Eva süchon tü wunuʼukot, nnojotsü nüküjain chi Yolujaakai outuinjatüin neʼe tü shiʼirukukat jee shiainjatüin ojuʼitüin tü saaʼinkat. Nüküjain Satanaa sükajee tü wüikat nnojoluinjatüin outuin Eva, nüküjain katüinjatüin soʼu waneepia yaa saaʼu tü Mmakat otta laülaainjatüin shia saaʼu sukuwaʼipa sümüiwaʼa (Gén. 2:17; 3:3-5).

Nnojotsü akumajaasüin chaa Edén tü alawaa ekirajünakat süchiki sujuʼitüin naaʼin wanee wayuu outapa nia. ¿Joujatka akumajaain tia? Nnojotsü watüjaain saaʼu. Shia watüjaaka aaʼu sajaʼlajaain tü alawaa ekirajünakalü anain soʼu shiʼitüin tü Juya miyoʼushaatakat. Naya neʼe apütaaka na aʼyataashiikana nümüin Maleiwa maʼaka naaʼin Noé sümaa nüpüshi. Nnojoluitpa ekirajünüin alawaa.

Tü ekirajünakalü süchiki sujuʼitüin naaʼin wanee wayuu outapa nia, akumajaasü süchikijee tü Juya miyoʼushaatakat. Jamüsüjaʼa wanaa sümaa katataawajaain nutuma Maleiwa sukuwaʼipa nanüiki na wayuukana chaa Babel jee nuʼwalakajeʼerüin naya sainküinpünaa mmakat süpüshuaʼa, nanoujatüjülia anain sujuʼitüin naaʼin wanee wayuu outapa nia (Gén. 11:8, 9). Makalaka nnojoluin watüjaain saaʼu joujatüin maʼin akumajaain tia alawaa anoujünakalü anain. Shia watüjaaka aaʼu niain Satanaa ekirajüin tia, chi kanainjeejachikaʼaya tü alawaakat. Talatüsü naaʼin süka suʼwalakalaain tia sainküin mmakat süpüshuaʼa (Juan 8:44).