Asakinnaka Anain

◼ ¿Eesü süpüla nashajüin piamaleʼe na kachonshiikana tü oora nekirajaakat oʼu namaa na nüchonniikana?

Na wayuu kachonniikana naya ekirajüinjanaka na nachonniikana, akaisaʼa chi toolokoi nia aluwataanaka maʼin sünain ekirajaa na nüchonniikana «sünain tü nuluwataakat anain chi Maleiwakai» (Efe. 6:4). Makalaka sümüin tü Wiwüliakat: «Tachonchee, paapaja nünüiki chi püshikai wanaa sümaa nüchiajaain pia otta nnojo piyouktüin tü suluwataakat anain pia tü püikat» (Pro. 1:8). Wanee kasa choʼujaaka maʼin süpüla ekirajaa na tepichikana shia nekirajaale na kachonshiikana namaa sünain tü Wiwüliakat.

Sümaiwa paala, na kachonshiikana jaʼitaina piamapuʼuin naya sünain ekirajaa na nachonniikana waneeshipuʼushi chi ashajakai jeʼrain oora nekirajaaka oʼu namaa na nüchonniikana, eeshi niale chi toolokoi jee shiale tü jietkat. Akatsaʼa tia, nnojotsü müinjatüin shia. Nikirajüle chi toolokoi otta tü jietkat na nachonnii nnojoliikana woutiisain eesü süpüla nashajüin wanee oora soʼu semaanaka maʼaka naainjüin shia sünain aküjaa pütchi. Na kachonshiikana kojuya tü oora nekirajakat oʼu na nachonniikana; müsüjeseʼe nekirajüinjanain naya waneepia (Deu. 6:6-9). Akatsaʼa tü karaloukta sümaajatkat waʼyataain nümüin Maleiwa shiiʼiyatüin tü aainjünakat sünain aküjaa pütchi. Jaʼitairü kojuyain oora otta kaʼi soʼu tü semaanakat sünain ekirajaa na tepichikana waneʼewai nakua, ashajünüinjatü neʼe wanee oora. Waneeshinjachi neʼe chi ashajüinjachikai suluʼu tü karaloukta sümaajatkat waʼyataain nümüin Maleiwa nachiki na nachonnii nekirajakana otta eere sümüin «ouyantaa wachikuaʼa» nashajüinjatü watua müleʼe.