Mapülee wekirajia
1. ¿Kasa choʼujaaka süpüla jaʼyainjatüin otta anainjatüin maʼin nikirajia wanee wayuu?
1 Süpüla anainjatüin maʼin nikirajia wanee wayuu mapüleeinjatü shia nutuma. Mapüleesat nikirajia Jesús chi Atüjakai maʼin Ekirajaa. Keeʼireere waaʼin ‹lotüin wakuaippa sünain ekirajaa› washatüinjatü tü nukuwaʼipakat (2 Tim. 4:2; Juan 13:13).
2. ¿Kasa choʼujaaka süpüla mapüleein wekirajia? ¿Kasa eeka sünainjee tia?
2 Mapülee wanüiki. Soʼutku tü shiimain kapüleesükalüirua wousüta anainrü suluʼu Mateo kapiitulo 5-7 otta mapüleesat shikirajia. Na wayuu aapajakana nünüiki Jesús «ponusü maʼi naaʼin [...] tü nünüikikat» otta na surulaat püreesainjanakana atuma nia müsü nanüiki: «Saaʼin wamüin, nnojotsü wayuu eekai kemeʼeriain maʼi sünüiki maa aka niakai» (Mat. 7:28, 29; Juan 7:46). Tia shikirajüin waya sünain nnojoluin choʼujaain anainjatüin maʼin wanüikipala otta kapüleein shiyaawase tü shiimainkat süpüla sünoujünüin. Eesü süpüla süküjünüin tü shiimainkat sükajee pütchi mapüleesat.
3. ¿Jamüshii eeka na ekirajakana sünain wainma pütchi na wayuu aapajakana nanüiki? ¿Jamüsü süpüla nnojoluin saainjünüin tia?
3 Jeʼrainjatü pütchi wekirajaka. Süpüla niyaawatüin Jesús jeʼrainjatüin pütchi nikirajaka anain, jülüjüshii naaʼin na aapajakana nünüiki (Juan 16:12). Tia shikirajüin waya sünain jülüjüinjatüin waaʼin nakuwaʼipa na wayuu waküjakana amüin pütchi maʼaka naaʼin na wapüshikana, na ekirajaweekana otta na tepichikana. Jaʼitairü naapajüin maʼin wanüiki, nnojoliishii wekirajüinjanain sünain wainma pütchi. Shikirajaweere wanee wayuu, ayateerü ekirajaain nünain Jeowa chi Maleiwa shiimainkai (Juan 17:2, 3; 1 Cor. 3:6).
4. ¿Jamüsü anaka jülüjüle maʼin waaʼin tü shikirajakat maʼin anain wanee karaloukta suulia tü nnojotkat saashajaain achiki?
4 Tü shikirajakat maʼin anain. Nnojotsü nümojujeʼerüin Jesús tü shiimain nikirajakat sutuma wainmain kasa naashajaaka achiki. Weʼra wanee shiyaawase, wanaa sümaa nümüin Jesús: ‹Süpüshua tü wayuu ouktüsükalüirua ojuitteerü›, saaʼin nümüin nnojotsü choʼujaain maʼin nüküjüin süchiki tü alatajatkat namüin na asoʼiraainjanakana aaʼin (Juan 5:28, 29). Müinjatia watuma wekirajapa wayuu sünain tü Wiwüliakat, shia jülüjüinjatka maʼin waaʼin tü shikirajakat maʼin anain otta nnojo waashajaain süchiki tü nnojotkat saashajaain achiki tü karaloukta wekirajakat aka.
5. ¿Kaseerü alataka mapüleere wekirajia?
5 ¡Talatüsü maʼin waaʼin süka mapüleein shikirajia nutuma Jeowa tü pütchi watüjaainjatkat aaʼu! (Mat. 11:25.) Wayainjana jooluʼu ashatüinjanaka tia otta talateerü waaʼin sutuma wakaaliinjeenain na wayuukana sünain anoujaa.