WAKUWAʼIPA SÜNAIN ANOUJAA

Talata paaʼin sünain aküjaa tü pütchi anasükat

¿Isawaisüche püchiki ojuʼitaa sünain aküjaa pütchi? Eesia isawaire shia wachiki. ¿Jamüsü isawaika shia wachiki? Shia sutuma shiyoutuin wayuu tü waküjakat, jashichin naya wamüin jee mmoluin waya seema aashajawaa sümaa wayuu nnojotka weʼraajüin. Suluʼujee tia, nnojotsü talatüin waaʼin sünain aküjaa pütchi. Niʼreepejeʼe waya Jeʼwaa suluʼu talatüin waaʼin süka niain chi Maleiwa talatakai aaʼin (Sl 100:2; 1Ti 1:11, TNM). ¿Jarat tü apünüinsükat kasa talataka atuma waaʼin sünain aküjaa pütchi?

Palajana, aküjashii waya süchiki tü kasa anasü waʼatapajakat. Mojusü maʼin saaʼin wayuu maaʼulu sutuma nnojoluin naʼatapajüin kasa anasü. Talateetpejeʼe naaʼin watuma waküjüle namüin süchiki tü kasa anasü antajateetkat (Isa 52:7). Talatüsia waaʼin sutuma tü kasa anasü süntirüinjatkat Nuluwataaya Maleiwa. Süpülapünaa wojuʼitüin sünain aküjaa pütchi, jülüja waaʼin tü kasa anasü eejeetkat sutuma Nuluwataaya Maleiwa.

Piama, aküjashii waya pütchi süka anain sukuwaʼipa wayuu sutuma jee anain sunoula. Nooʼulaain tü kasa mojusü kiʼrapuʼukalü anain naya otta eesü süpüla katüin noʼu waneepia (Isa 48:17, 18; Ro 1:16). Jamüshiijaʼa wakaaliinjaliire wayuu suʼunnaa sülatüin kasa mojusü namüin, ayateena wachajaain achiki na choʼujaakana amüin akaaliinjünaa, jaʼitairü nayoutuin tia na waneinnua (Mt 10:11-14).

Apünüin, aküjashii waya pütchi süka kojutuin maʼin Jeʼwaa sutuma tia. Kojutusü nümüin Jeʼwaa tü waaʼinrakat (Isa 43:10; Heb 6:10). Naapüin wamüin Jeʼwaa chi naaʼinkai süpüla waʼyataain sünain tia. Talateere waaʼin, wachunta nümüin Jeʼwaa chi naaʼinkai (Gal 5:22). Eere wamaa Jeʼwaa, nnojoleena waya mmoluin otta yalayaleerü waaʼin sünain aküjaa pütchi (Alu 4:31). Waaʼinrüle tia, talateerü waaʼin sünain aküjaa pütchi, jaʼitairü ayoutunuin wanüiki (Eze 3:3).

Sukuwaʼipa wanee wawala sünain aküjaa pütchi: talatüsü saaʼin suluʼu wanee jee nnojotsü saaʼin suluʼu wanee — ¿Talateesüche paaʼin sünain aküjaa pütchi? ¿Kasa paaʼinrajatka süpüla jaʼyain paaʼu talatüin paaʼin?

SÜCHIKIJEE JÜNAJÜIN TÜ VIDEOKOT TÜ TAAʼINRAKAT SÜPÜLA TALATÜIN TAAʼIN TACHIKUAʼA SÜNAIN AʼYATAWAA NÜMÜIN JEʼWAA, JUSOUTA SHIʼIPAJEE TÜÜ:

¿Jamüsü choʼujaaka wekirajaain sünain tü Wiwüliakat mayaainjeʼe walatirüin kojuya oora sünain aküjaa pütchi kashiwai?
¿Kasa waaʼinrajatka süpüla washatüin sukuwaʼipa María?
¿Joujawaisü püsakireʼerüin paaʼin sünain tü Nünüikikat Maleiwa?
¿Jamüsü kamalainka maʼin pümüin aküjaa pütchi?