WAKUWAʼIPA SÜNAIN ANOUJAA

Anale sukuwaʼipa otta kojutule nia sümüin eeshi süpüla nunoujain

Eeshi süpüla nunoujain chi suʼwayuusekai wanee anoujasü müleka anale maʼin sukuwaʼipa. Eepejeʼe süpüla sülatüin wainma juya süpüla nunoujainjachin mayaapejeʼe nnojoluin wanaawain naaʼin paala sümaa nuʼwayuuse sünain anoujaa (1Pe 2:21-23; 3:1, 2). Müliale paaʼin atumawaa, ayataʼaya piyamülüin tü kasa mojusükat süka tü kasa anasükat (Ro 12:21). Anale maʼin tü pukuwaʼipakat, eesü süpüla suʼwanajaain nukuwaʼipa chi puʼwayuusekai.

Kapüla paaʼin nukuwaʼipa chi puʼwayuusekai (Flp 2:3, 4). Pümülialaa naalin puʼwayuuse otta paainja tü aʼyatawaa eʼitaanakat pajapuluʼu pipialuʼu. Jülüja paaʼin tü aküjünakat pümüin (Snt 1:19). Nnojo püshapajaain aaʼin otta püküja nümüin alin nia püpüla. Müleka nnojorüle jamajatüin nümüin puʼwayuuse kojutuin nia pümüin otta alin nia püpüla, nnojo mojuin paaʼin sutuma tia, niʼrüin Maleiwa anain tü paaʼinrakat nüpüleerua chi puʼwayuusekai (1Pe 2:19, 20).

SÜCHIKIJEE JÜNAJÜIN TÜ VIDEOKOT NÜKATCHINRÜIN WAAʼIN JEʼWAA SOʼUNNAA TÜ MÜLIAA WEʼRAKAT, JUSOUTA SHIʼIPAJEE TÜÜ:

¿Jamapuʼusü sukuwaʼipa tü wawalakat Grace Li wanaa sümaa kasaalüin shia?
¿Kasa kamalainka sümüin shikirajaaiwaʼaya sünain tü Wiwüliakat?
Süchikijee woutiisain tü wawalakat Li, ¿kasa akaalinjaka shia soʼunnaa tü müliaa shiʼrakat?
¿Kasa suchuntaka tü wawalakat Li nümüin Jeʼwaa nüpüleerua chi suʼwayuusekai?
¿Kasa anasü shiʼraka tü wawalakat Li sutuma anain sukuwaʼipa otta sutuma kojutuin sümüin chi suʼwayuusekai?

Ayaakuaakalüirua: Shiʼipa tü videokot «Nükatchinrüin waaʼin Jeʼwaa soʼunnaa tü mülia weʼrakat», eere shiiʼiyatüin tü saaʼinrakat Grace Li süpüla sunoujain. 1. Aʼyalajüsü Grace suluʼu wanee callejón. 2. Wanee wawala shikirajüin Grace Li sünain tü Wiwüliakat. 3. Oʼunusü Grace namaa na süchonniikana sünain tü outkajawaakat. 4. Grace namaa na mekietsatshiikana süpüshi suluʼu tü Piichi Outkajaaleekat. — ¡Anasü maʼin anale sukuwaʼipa wanee wayuu otta kojutule sümüin chi suʼwayuusekai!