¿Pütüjaa aaʼu?
¿Jamüshi kamaneeka Jehová namüin na israelitakana saaʼujee nuchuntuin namüin wawaachi otta moʼuwa?
SAASHIN tü Pütchi Aapünakat nümüin Moisés anasü nümüin Jehová süsülajünüle nümüin wawaachi jee moʼuwa. Asülajünawaisü tia piamasükat wüchii nümüin Jehová. Eesü süpüla naapüin wanee israelita wanee wawaachi jee shiale wanee moʼuwa (Lev. 1:14; 12:8; 14:30). Anasü tia süka eein süpüla alin shiiʼiree wawaachi. Wekirajaa sünain tia.
Wawaachi
Jooutsü maʼin wawaachi chaa Israel joutaleʼu. Soʼu tü kashikat oʼutuupüroʼu oʼunusü tü wawaachikalüirua uuchimüin sünain Israel eere nnojoluin juyapoʼuin jee aleʼejüsü süchikuaʼa Israelmüin joutaleʼu (Cant. 2:11, 12; Jer. 8:7). Müsüjeseʼe alin shiiʼiree wawaachi nasülajüinjatka nümüin Maleiwa juyapoʼu.
Moʼuwa (Paloma brava)
Naata sukuwaʼipa moʼuwa suulia wawaachi süka eein shia waneepia chaa Israel otta müsia epijünapuʼusü piichipaʼa (anasü paashajeʼerüle Juan 2:14, 16). Saashin wanee karaloʼuta «shipijapuʼuin wayuu maʼleekalia moʼuwa chaa Palestina, nakumajüin shipia sünain süsepü tü miichikat» (anasü paashajeʼerüle Isaías 60:8).
Moʼuwa suluʼu shipia
¿Kasa watüjaka nüchiki Jehová sünainjee tia? Shia niain wanee Maleiwa aipürai sümaa kamaneein, süka jamüin, nücheküin nasülajüin na israelitakana nümüin wüchii eekai nousütüin anain waneepia.