Nükaalinjain waya Jehová süpüla talatüin waaʼin eepünaale eein waya

Soʼu 1979 chajachin Mats sümaa Ann-Catrin sünain tü Ekirajaaleekat Galaad. Aluwataanüshii naya chaa Irán, Mauricio, Myanmar, Tanzania, Uganda otta Zaire. «Talatüinjanain waya eepünaale eein waya» müshi chi wawalakai Jack Redford namüin. Jalouisü maʼin tia pütchikat namüin süka nakolojooinjanain kojuyatua. Naküjeerü wamüin süchiki tia.

Jüküja wamüin kasain jiʼraajaka akajee tü shiimainkat nüchiki Maleiwa.

Mats: Soʼunnaa tü Segunda Guerra Mundial chajachin kepiain chi tashikai chaa Polonia jee niʼrüin mojuin nakuwaʼipa na shikiipüʼükana tü iküleesia katoolikakat. «Tatüjaa aaʼu eein wanee iküleesia ekirajaka tü shiimainkat nüchiki Maleiwa», mapuʼushi nia tamüin. Tayaawataka mapa shiimain tü nümakat. Kamalainpuʼusü tamüin tayaʼlajüin karaloʼuta süpüla taashajeʼerüin. Tayaʼlajaka mapa wanee karaloʼutachon kanüliaka La verdad que lleva a vida eterna. Sutuma tatüjaweein saaʼu tü shiimainkat nüchiki Maleiwa taashajeʼeraka tia karaloʼutakat soʼu wanee ai. Tayaawataka sükajee tü taashajeʼerakat jaralin na ekirajakana tü shiimainkat nüchiki Maleiwa.

Oʼttushi taya sünain aashajeʼeraa tü karaloʼuta nashajakat na aküjaliikana pütchi nüchiki Jehová aaʼuriiroʼu soʼu 1972, tayaawataka saaʼu wainma kasa sutuma tü taashajeʼerakat. Talatüsü maʼin taaʼin süka müin taya maʼaka naaʼin chi wayuu oikaakai süpüshuaʼa tü kasa eejatkat nümaʼana süpüla niyaʼlajüin tü «kaaʼürüla» nüntakalü anain. Ekirajaweeshi taya suluʼu universidad süpüla tottooluinjachin taya, nnojotpejeʼe taaʼinrüin tia süpüla taʼyataainjachin waneepia nümüin Jehová (Mat. 13:45, 46). Woutiisashi taya diciembroʼu 10 soʼu 1972.

Wanee juya süchikijee tia, woutiisashii na kachooinkana taya nümaʼaleeya chi temüliakai. Pürekutsootshi taya rekulaat juulioʼu soʼu 1973. Teʼraajaka wanee wawala anaka maʼin anoula eere toutkajaain jee anachonsü maʼin shia, Ann-Catrin sünülia. Amüraajiraashii waya jee kasaatka waya soʼu 1975. Chajana waya kepiain suluʼu wanee pueulo Strömsund (Suecia), soʼunnaa pienchi juya, watta naalii na wayuu ekirajaweekana sünain tü Bibliakat chayaa.

Ann-Catrin: Süpülapünaa kettaain nutuma chi tashikai tü universidakat oʼttushi nia sünain ekirajawaa sünain tü Bibliakat chaa Estocolmo. Mayaainjeʼe joʼuuin taya nümaapuʼusü taya sünain tü outkajawaakat otta sünain aküjaa pütchi. Mojushiisü sümüin maama tü nunoujakalü anain papá süchajaainjeseʼe sukuwaʼipa süpüla niyaawatüin aaʼu papá alawaain tü nunoujakalü anain. Nnojotpejeʼe suuntuin tia. Sunoujaka mapa jee woutiisaka shia. Woutiisasü taya soʼu 13 touyase, pürekutsootka taya wanaa sümaa 16 touyase. Akolojoosü taya mapa suluʼu wanee mma kanüliaka Umeå eere choʼujaain Aküjalii pütchi. Taneekünaka süpüla pürekutsoolüin pesiaat taya.

Süchikijee kasaalüin waya wakaalinjain wainma wayuu süpüla aleewain naya nümaa Jehová. Maivor sünülia wanee majayüt wekirajaka sünain tü Bibliakat. Mayaainjeʼe eein süpüla sükanajüin wainma nneerü sünain tü shiʼyataainkat ooʼulaasü shia suulia tia süpüla shiʼyataain nümüin Jehová. Pürekutsootka shia mapa wanaa sümaa tü temiiruakat. Oʼunushii naya sünain tü Ekirajaaleekat Galaad soʼu juyaka 1984. Misioneeroshii naya maaʼulu chayaa Ecuador.

Aneekünüshii jia süpüla misioneeroin jia suluʼu waneirua mma, ¿kasa jaaʼinraka süpüla talatüin jaaʼin sünain aʼyatawaa nümüin Jehová eepünaale eein jia?

Mats: Waluwataanapa suluʼu waneirua mma jülüjasü waaʼin tü nukuwaʼipakat Jesús, nnojoluin yaletüin naaʼin (Col. 2:6, 7). Jamüshiijaʼa wantüle namaʼanamüin na wawalayuukana suluʼu waneirua mma jülüjasü waaʼin tü nakuwaʼipapalakat otta jamüin naaʼinraka waneirua kasa. Sutuma naatain sukuwaʼipa tü kasa waaʼinrakat nnojotsü wachuntuin namüin nashatüinjatüin shia, jama naatain wakuwaʼipa. Washatapa maʼin nukuwaʼipa Jesús müshii waya «maʼaka saaʼin wanee wunuʼulia eeka sotpaʼain wüin palatüsü», talatüshii waya eepünaale eein waya (Sal. 1:2, 3).

Ann-Catrin: Sülateʼennüle wanee maatachon choʼujaasü sümüin chi kaʼikai süpüla shimiyoʼulaainjatüin. Akaʼaya neʼe waya choʼujaashi wamüin Jehová süka müin aka nia naaʼin chi kaʼikai wamüin (Sal. 84:11). Süka kamaneein wamüin na wawalayuukana müshii aka naya saaʼin wanee nüsülain Jehová wamüin. Jamüsüjaʼa chaa Teherán (Irán), mayaainjeʼe palitchon na wawalayuu outkajaakana wamaa nakaalinjain waya, müshii naya maʼaka naaʼin na anoujashii namaiwajannuu süküjaka achiki tü Bibliakat. Nnojoishiaaje waya oʼuneein chaa Iránjee, najünajaapejeʼe waya na süʼlaülashiikana mma juulioʼu soʼu 1980 sutuma süpülajünüin waʼyataain chayaa. Aluwataanüshii waya natuma na wawalayuukana chaa África suluʼumüin wanee mma kanüliapuʼuka Zaire, República Democrática del Congo, sünülia maaʼulu yaa.

Aʼyalajüsü taya tatüjaapa saaʼu chainjana waya Áfricamüin jama mmoluin taya seema wüi jee ayuulii joutka chaʼayaa. «Nnojo mmoluin jia jiʼraajeena sukuwaʼipa tia mmakat, kamalainjeerü jümüin», namaka wamüin piamashii waʼaleewain chapuʼukana África. Shiimain tü namakat wamüin. Kamaneejüshii maʼin wamüin na wawalayuu chajanakana África. Aipiruapa juya waya kepiain chaa África, apülajünüsü woulia tü waʼyataainkat, woʼunaka chejee. Nnojotsü oʼuneein taya Zairejee süka kiʼrain taya chayaa. Tachuntaka nümüin Jehová makatüinjanain waya chayaa.

¿Kasa anasü jiʼraka sünain aʼyatawaa nümüin Jehová soʼunnaa tü juya alatüitkat?

Mats: Wainma tü kasa weʼrakat. Aleewashii waya namaa wawalayuu misioneerokana wanaa wamaa suluʼujeejanakana waneirua mma. Suluʼu waneirua mma ekirajüshii waya maʼaka 20 wayuu sünain tü Bibliakat, talatüshii maʼin waya sutuma tia. Ayateerü sotuin waaʼin kamaneein maʼin wamüin na wawalayuu chejeʼewaliikana África. Jamüshiijaʼa wanaa sümaa walapalaain naaʼu na wawalayuu chejeʼewaliikana Tanzania, washaʼwaleʼerapuʼuin weʼejena watunkaka aluʼu süʼütpaʼa nepia. Kamaneeshii maʼin naya wamüin, mayaainjeʼe maʼletsein na wawalayuukana «alanaʼaleesia tü naapakat suulia tü eejatkat namaʼana» (2 Cor. 8:3). Süpülapünaa watunkuin yootowaishii waya süchiki tü alatawaikat wamüin otta waapawalin analuʼut nümüin Jehová saaʼujee tü naaʼinrakat wapüleerua.

Ann-Catrin: Wanee kasa anasü teʼrakat shia teʼraajüin wainma wawalayuu naatakana oumain. Kojuyasü anüikii wekirajaakalü anain, maʼaka saaʼin francés, luganda, persa otta suajili otta wainma sukuwaʼipapala wayuu weʼraajaka. Wainma na wawalayuu aleewakana amaa waya. Eeshii wekirajüle na wawalayuu jekenakana sünain anoujaa otta aʼyanaajiraashii waya nümüin Jehová wanaa namaa (Sof. 3:9).

Suluʼu tü kojuyasü mma woʼunakalü aluʼu weʼrüin anain maʼin tü kasa nukumalakat Jehová otta anachoin maʼin shia. Wojuʼitüinjanale suluʼujee wanee mma müsü nuʼunirakai saaʼin wakuwaʼipa Jehová. Soʼunnaa wainma juya, wainma tü kasa nikirajakalü anain waya Jehová.

Jüküja wamüin kasain eejiraaka amaa jia otta tü jaaʼinrakat süpüla jüchecherüin jaaʼin

Mats: Kojuyatua ayuulin waya, ayuuishii waya sutuma tü malaria münakat jee kojuyatua suwaʼnnüin tü taʼwayuusekat. Wanee kasa shapaakalü atuma waaʼin shia laülaayuuinnapain na kachooinkana waya. Aaʼinmajünapejeʼe na kachooinkana taya nutuma chi temüliakai otta aaʼinmajünüshii na kachooinkana Ann-Catrin natuma na piamashiikana suwalayuu. Kojutusü maʼin wamüin naaʼinmajünüin jee alin naya napüla (1 Tim. 5:4). Eepuʼusü kaʼi mojuwaikalü oʼu waaʼin süka isain wachiki waaʼinrüin waneirua kasa napüleerua süka wattain waya noulia.

Ann-Catrin: Soʼujee 1983 wanaa sümaa chajanain waya Zaire mayeinjaasü taya sutuma cólera. Nümaka chi tottootkai nümüin Mats: «Anataashii juʼunule Áfricajee». Waneemüin kaʼi oʼunamaatüshii waya Sueciamüin suluʼu wanee katünasü alüʼüjaka chisooui.

Mats: Aʼyalajüshii maʼin waya süka wooʼulaainjanain waaʼinruʼu suulia misioneeroin waya. Mayaainjeʼe nüküjain wamüin chi tottootkai nnojoleerüin saawalaain tü taʼwayuusekat anasü shia mapa. Wanee juya süchikijee tia aleʼejüshii waya wachikuaʼa chaa Zairemüin suluʼumüin wanee pueulo kanüliaka Lubumbashi. Suajili nanüikipala na wayuu kepiakana chayaa. Palitchon na wawalayuu outkajaakana chayaa.

Ann-Catrin: Ipuotsü taya wanaa sümaa chajanain waya Lubumbashi, outaka chi tachonkai taleʼeruʼu. Mayaainjeʼe nnojoluin jülüjain waaʼin kachooinjanain waya aisü tamüin amüloulin chi tachonkai. Mojusü maʼin waaʼin sutuma tü alatakat wamüin. Nümülialapejeʼe Jehová waaʼin süka wainmain na wayuu wekirajakana sünain tü Bibliakat. Talatüsü maʼin waaʼin süka weʼrüin nakooʼomüinraain na wawalayuukana. 35 naya, 70 naya mapa otta akooʼomüinraasiaʼaya na wayuu outkajaakana wamaa, 220 süchikijee 40 paala waya. Atütülaasü maʼin waaʼin sutuma weʼrüin süpüshuaʼa tia sünainjee waaʼinmaain waʼyataain nümüin Jehová. Ayatüshiaʼaya sotuin waaʼin chi wachonchonkai, waʼatapajapejeʼe tü kaʼi nnojoleetkat oʼu mojuin waaʼin saaʼujee tia.

Mats: Süchikijee tia, amatchinjaawaisü saaʼin Ann-Catrin. Soʼu tia nüküjaka tamüin chi tottootkai ayuulin taya sutuma cáncer de colón, tawaʼnnamaataka. Aawalaaichipa taya maaʼulu yaa otta tü taʼwayuusekat ayatüsia saaʼinmaain shiʼyataain nümüin Jehová mayaainjeʼe nnojoluin anain maʼin shia.

Watüjaapejeʼe saaʼu nnojoluin wayain neʼe alatüin amüin kasa mojusü. Jamüsüjaʼa soʼu 1994 alatüsü wanee kasachiki chaa Ruanda. Süchikijee tia oʼunushii waya sünain alapalawaa naaʼu na wawalayuu chajanakana suluʼu campos de refugiados. Mayaainjeʼe müliain naya atumawaa ayatüshii kanoulain naya, nachecherüin naaʼin otta nakaalinjain na waneinnua. Wayaawata aaʼu sünainjee tia nükaalinjain Jehová na aʼyataakana nümüin neʼrüle müliaa (Sal. 55:22).

Ann-Catrin: Soʼu 2007 alatüsü wamüin wanee kasa keemakat maʼin wanaa sümaa woʼunuin sünain aapajaa tü pütchi saaʼujee jeketüitpain tü Weteet chajatkat Ruanda. Kettaapa tü outkajawaakat oʼunushii wamaa 25 misioneero otta weteliita chaa Nairobimüin (Kenia). Walüʼütpa süpüla wantüin chaa Keniamüin weʼrüin shiweetüin wanee kemion wapanapajee sümaa süsheʼetiraleeinñain tü weʼejenakat, jaʼraishii na wawalayuu outaleekana soʼu tia nümaʼaleeya chi chupeetkai. Outusü mapa wanee wawala chaa suluʼu tü pitaatkat. Waʼatapajüin tü kaʼi weʼreenakalü oʼu nachikuaʼa (Job 14:13-15).

Sülatapa jeʼra kaʼi ashatüsü tü walioʼukat. Jamüsüjaʼa tayakat nümaa chi taʼwayuusekai otta waneinnua wawalayuu shapaʼawaisü maʼin waaʼin sotopa waaʼin tü alatakat wamüin. Apatanajaapuʼusü taya saʼwai sümaa tachijiraain jee shapaain maʼin taaʼin sümaa kakuwashataain maʼin taaʼin. Wanee kasa anaka atuma waaʼin shia woʼuraajawalin nümüin Jehová otta waashajeʼerüin tü pütchi kamalainkat wamüin suluʼujeejatü tü Bibliakat sümaa wasakireʼerüin waaʼin sünain. Otta müsia eʼrajeʼetshii waya nümaʼanamüin wanee tottoot süpüla nnojoluin shapaain maʼin waaʼin. Maaʼulu yaa nnojoluitpa shapaain maʼin waaʼin saaʼujee tü alatakat wamüin. Wachuntuin nümüin Jehová nümülialüin naaʼin na wayuu alatakana amüin wanee kasa maʼaka saaʼin tia.

Sotusü taaʼin jüküjainkain tamüin müin jia maʼaka saaʼin sushuku kaliina najapuluʼu Jehová soʼunnaa jiʼrüin müliaa, ¿jamaluʼulu tia?

Mats: Maʼwaisü nanüiki na wayuu aashajaakana suajili «Tumebebwa kama mayai mabichi», «müshii waya maʼaka saaʼin sushuku kaliina najapuluʼu wanee wayuu suulia susottüin», maluʼulu shia. Tü waküjeekat sükajee tia, shia müin Jehová maʼaka naaʼin chia wayuukai, naaʼinmajüin waya soʼunnaa waʼyataain nümüin. Alanaʼaleesia tü kasa naapakat Jehová wamüin, naapüin wamüin tü choʼujaakat. Sutuma weʼrüin namülialüin waaʼin na Laülaashii Jülüjaka Aaʼin na Aküjaliikana Pütchi wayaawata aaʼu alin waya nüpüla Jehová.

Ann-Catrin: Sutuma tü nümakat Mats, sotusü taaʼin wanee kasa naaʼinrakat Jehová wapüleerua. Jamüsüjaʼa soʼu wanee kaʼi ayamaajünüsü taya süküjünaka tamüin mayeeinshaatain chi tashikai chaa pitaaraluʼu. Wanaa maʼin sümaa tia maʼlainsü naaʼin Mats süka ayuulin nia sutuma tü kanüliakat malaria otta nnojotsü nneerü wamaʼana süpüla woʼunajanain chaa Sueciamüin. Sutuma nnojoluin nneerü wamaʼana woiküinjatüin weʼejena. Shiasaʼa mapa niyamaajaka waya wanee wawala sümaa nuʼwayuuse sutuma naapüin süchiki tü alatakat wamüin nawalaajüin waneesia tasapia. Süchikijee tia shiyamaajaka waya wanee wawala jaʼapüirü otta süküjain wamüin süsülajeein wamüin wanee kojonchon kaluʼuka nneerü. Sünaajaain tia nneetkat süpüla saapüin shia nümüin wanee wayuu choʼujaaka amüin shia. Weʼrüin nükaalinjamaatüin waya Jehová süpüla woʼunuinjanain Sueciamüin (Heb. 13:6).

¿Kasa jütüjaka sünainjee jiʼyataain waneepia nümüin Jehová soʼunnaa tü 50 juya alatüitpakat?

Ann-Catrin: Tayaawata aaʼu sünainjee tü sümakat Isaías 30:15 wachechereerü maʼin waaʼin müleka nnojorüle shapaain maʼin waaʼin jee weʼitaale waaʼin nünain Jehová. Wanaa sümaa weʼitaain waaʼin nünain Jehová müshi nütkaakain aaʼin wapüleerua (2 Crón. 20:15, 17). Nnojorüle waaʼinmaain maʼin tü aʼyatawaa naapakat Jehová wamüin nnojotsüjeʼe weʼrüin maʼin tü kasa anasü naapakat wamüin.

Mats: Wanaa sümaa sülatüin kasa mojusü wamüin weʼitaainjatü waaʼin nünain Jehová, müle shia watuma weʼreerü tü kasa anasü naaʼinreetkat Jehová wapüleerua (Sal. 37:5). Nükaalinjain maʼin waya Jehová maʼaka nüküjatüjülin suluʼu tü Bibliakat. Ayatüshia nükaalinjain waya Jehová sünain aʼyatawaa nümüin suluʼu tü Weteet yaakat Myanmar.

Waküjeein namüin na jimaʼaliikana otta namüin na majayünnüükana nakooʼomüinrüle naʼyataain nümüin Jehová neʼreerü tü kasa anasü naaʼinreetkat Jehová napüleerua. Nükaalinjeena jia Jehová süpüla talatüin jaaʼin eepünaale eein jia.