Nüpüshi Jacob

PIIRAKAA sümüin nüchonnii Jacob, 12 naya napüshuaʼa. ¿Pütüjaa aaʼu kasaichi nanülia? Weʼraaja nanülia.

Na süchonniikana Lea nia Rubén, Simeón, Leví otta Judá. Mojuka saaʼin Raquel süka machoin shia, makalaka saapüin nümüin Jacob Bilha tü aʼyataasükat sümüin, süchonka Dan otta Neftalí. Mapa saapaka Lea nümüin Jacob Zilpa tü aʼyataasükat sümüin, süchonka Gad otta Aser. Mapa kachonka Lea, Isacar otta Zabulón nanülia.

Mapa kachonka Raquel, José nünülia sutuma, wekirajaajeechi anain nia mapeena. 11 nüchonnii Jacob wanaa sümaa kepiain nia nipialuʼu Labán chi süshikai Raquel.

Kachonshi Jacob jieyuu, waneesia neʼe tü süküjakat achiki tü Wiwüliakat. Dina sünülia.

Mapa nüleʼejaka Jacob Canaánmüin. Oʼunushi nia sümaa nüpüshi otta nümülüin.

Süchikijee naleʼejüin Canaánmüin, jemeyutsü Raquel. Süka mojuin sukuwaʼipa nümaa chi süchonkai ouktaka shia, akaisaʼa chi süchonkai katüsü noʼu. Benjamín nünülia nutuma Jacob.

Soteesü waaʼin nanülia na 12 nüchonniikana Jacob süka eein na israeliitakana nanainjee otta eʼitaanüsü nanain nanülia na polooshiikana nüchonnii Jacob otta nanülia piamashii nüchonnii José. Katüsü noʼu Isaac wainma juya süchikijee jemein na tepichikana, talatüshi maʼin nia süka wainmain nülüin. Wekirajaa sünain tü alatakat sümüin Dina tü nülüinkat.