Aluwataashi David

NÜTAʼÜLEEIN Saúl David, nuʼunaka namaa 3.000 surulaat süpüla nüchajaain nüchiki. Nütüjaapa saaʼu David nuluwataaka ajayajülii süpüla nachajaain nüchiki Saúl. Nümaka namüin piamashii nümaajana: ‹¿Jara oʼuneeka tamaa eemüin Saúl?›

Nümaka Abisai: ‹Oʼuneechi taya›. Abisai süchon Zeruyá wanee nuwala David. Wanaa sümaa nutunkuin Saúl otta na nümaajanakana antüshi David otta Abisai nanainmüin, nalüʼüjaka tü japüinkat otta tü jatü nukorolokot Saúl. Nnojoishii naya eʼnnüin otta aapünüin nepisana.

Süchikijee, nuʼluwataaka David otta Abisai saaʼumüin wanee uuchi. Nümaka David nümüin chi shikiipuʼukai na surulaatkana sümaa nuʼwaatüin: ‹Abner, ¿jamüshi nnojoika paaʼinmajüin chi pülaamainkai? ¿Jalasü tü japüinkat otta tü jatü nukorolokot?›

Nüchijiraaka Saúl sümaa niyaawatüin nünüiki David, nümaka: ‹David, ¿pia aashajaaka?› ¿Piʼrüin Saúl otta Abner chaaʼaya wünaapünaa?

Nümaka David: ‹Aa laülaashikalee, ¿jamüshi pütaʼüleeka taya? ¿Kasa taainjaka pümüin? Anuu tü japüinkat otta tü jatü pukorolokot, püsaajira shia›.

Nümaka Saúl: ‹Mojusü tü taainjakat›. Nuʼunaka David otta nüleʼejaka Saúl nipialuʼumüin. Nümaka David: ‹Soʼu wanee kaʼi nuʼuteechi aaʼin taya Saúl, anakajaʼa taʼluwataale eemüin na filisteokana›. Naainjaka tia. Aleewayaaka nia namaa na filisteokana.

Mapa natkaaka na filisteokana namaa na israeliitakana. Ouktaka Saúl otta Jonatán sünain tia atkawaakat. Mojuka maʼin naaʼin David, nümaka sümaa niiʼirajüin: ‹Mojusü maʼin taaʼin paalii tawala Jonatán. ¡Aishi maʼin pia tapüla!›

Süchikijee tia nüleʼejaka David Hebrónmüin. Atkaashii chaaʼaya na wayuu aneekakana Is-bóset namaa na aneekakana David süpüla aluwatawaa, nakanajaka na nümaajanakana David. 30 nuuyase David wanaa sümaa nuluwataain, 7 juya nuluwataain Hebrón. Napüshi na nüchonniikana David nia Ammón, Absalón otta Adonías.

Mapa nushutaka David saaʼu Jerusalén. Joab, süchon Zeruyá tü nuwalakat David, nia shikiishika tia atkawaakat makalaka nekiipuʼuin nia na surulaatkana nutuma David. Nuluwataaka David Jerusalén.