Piamaipa aluwataaya

¿PÜTÜJAA aaʼu jamüsü nüchatajaka chi wayuukai tü kuluutkat? Nuluwataala nia Jeʼwaa. Ahíya nünülia chi wayuukai. Nünüikimaajachi Maleiwa nia, nüküjüin nümüin tü kasa alatajatkat.

Aashajaashi Ahíya nümaa Jeroboán suluʼu tü ayaakuaakat. Jeroboán nia wanee wayuu niʼyateʼeraka Salomón sünain tü aʼwaajüleekat. Nüntiraapa Ahíya nümaa Jeroboán naakataka nüsheʼin sümaa nüchatatüin 12 shiʼipa. Nümaka nümüin Jeroboán: ‹Paapaa 10 shiʼipa›. ¿Pütüjaa aaʼu jamüsü naapaka 10 shiʼipa nümüin?

Shia süka nnojoluinjachin ayatüin aluwataain Salomón naashin Ahíya. Naapüinjatü 10 eʼirukuu nümüin Jeroboán otta 2 nümüin Rehoboam, chi nüchonkai Salomón.

Jashichika maʼin Salomón sutuma nünüiki Ahíya, nuʼuteeka naaʼin Jeroboán. Nuʼunaka Jeroboán Egiptomüin. Mapa ouktaka Salomón, aluwataashi nia 40 juya. Rehoboam chi nüchonkai aluwataashi nüchikumüin. Naapapa Jeroboán ouktuin Salomón, nüleʼejaka Israelmüin.

Mojulaashi maʼin Rehoboam nuulia chi nüshikai. Aashajaashi Jeroboán otta wanee wayuuinnua nümaa süpüla anainjachin nia namaa na wayuukana. Akaisaʼa nia nnojoishi oonooin, mojulaashi maʼin. Sutuma tia nuluwataaka Jeroboán natuma na wayuukana saaʼu 10 eʼirukuu. Nuluwataaka Rehoboam saaʼu 2 eʼirukuu, Benjamín otta Judá.

Nnojotsü nücheküin Jeroboán noʼunuin na wayuukana Jerusalénmüin sünain aʼwaajaa Jeʼwaa. Naainjaka 2 shiyaakua paaʼa süka ooro süpüla naʼwaajüin shia. Mapa aainjüshii maʼin kasa mojusü na wayuukana.

Alatüsü kasa mojusü sümüin tü piamasükat eʼirukuu. Atkaashi chi aluwataaikai Egipto sümaa Jerusalén nuluwataapa Rehoboam. Nülüʼüjüin tü kasa kojutukat maʼin suluʼujee tü aʼwaajüleekat, nnojoluipa anain shia maʼaka sümaiwa.