Mojulaasü Jezabel

OUKTAPA Jeroboán mojulaashii na aluwataakana saaʼu tü poloosükat eʼirukuu. Chi mojulaakai maʼin nia Acab. ¿Jamüshi mojulaaka nia? Shia süka nuʼwayuusein tü mojulaasükat Jezabel.

Nnojotsü israeliitain Jezabel. Nüchon shia chi aluwataaikai Sidón. Suʼwaajüin Baal chi sümaleiwasekai otta suʼwaajirüin Acab namaa na israeliitakana. Üttüsü saaʼin Jezabel nünain Jeʼwaa otta suʼuta aaʼinchii wainma nünüikimaajana. Eeshii eeka nounjulaain suulia. Oʼutusü shia saaʼin wayuu süpüla sümaʼanain tü keeʼireekat saaʼin.

Soʼu wanee kaʼi mojusü naaʼin Acab, süsakiraka nia Jezabel: ‹¿Jamüsü mojuka paaʼin?›

Nümaka Acab: ‹Shia sutuma nünüiki Nabot, nnojotsü nuikkeein tamüin tü naʼapainsekat›.

Sümaka Jezabel: ‹Tachajaajeerü sukuwaʼipa pümüin›.

Sümaka suluʼu karaloukta namüin na wayuu shikiipuʼukana tü mmakat eere kepiain Nabot: ‹Juluwataa wanee wayuuinnua süpüla naküjüin mojuin nünüiki Nabot nümüin Maleiwa otta chi aluwataaikai. Jujuʼitireechika nia süpüla juʼutuin naaʼin›.

Saapapa Jezabel ouktuin Nabot, sümaka nümüin Acab: ‹Puʼuna paapaa tü apainkat›. Süsalainjatü Jezabel tü saainjalakat.

Mapa nuluwataaka Jeʼwaa Jehú süpüla nuʼutuin saaʼin. Saapapa Jezabel nüntajachin Jehú, süshajaaka soʼu, anasüchonyaaka shia. Nüntapa Jehú niʼraka shia eeka tü wentaanakat, nümaka namüin na wayuu sümaajanakana: ‹¡Jujutirapan!› Nojutiraka shia maʼaka piʼrüin suluʼu tü ayaakuaakat, ouktaka shia.