Wanee aluwataai anashi

NULUWATAAPA Josías saaʼu tü piamasükat eʼirukuu 8 nuuyase. Süka jintülin nia nükaaliinjünaka natuma wanee wayuuinnua sünain aluwatawaa.

Nuluwataapa Josías soʼu 7 juya naainjüin tü nümakat Jeʼwaa maʼaka naaʼin David, Jehosafat otta Ezequías. Jintüliiwaʼaya nia naainjüin wanee kasa.

Mojulaashii maʼin na israeliitakana, naʼwaajüin tü maleiwayaasükat. Makalaka nüsünneʼerüin Josías otta na nümaajanakana tü maleiwayaasükat. Wainma aʼyatawaa sünain süka wainmain na wayuu kamaʼanakana tia. Maʼaka piʼrüin suluʼu tü ayaakuaakat nusolojuin Josías otta na nümaajanakana tü maleiwayaasükat.

Süchikijee tia nukumajiraka Josías tü aʼwaajüleekat Jeʼwaa. Akotchajünüsü nneerü süpüla nawalaajünüin na aʼyataashiikana. Nuusüta anainrü Hilquías chi laülaashikai napüleerua na sacerdotekana tü nünüikimaajatkat Maleiwa nüshajalaka Moisés.

Shiʼikajaanapa tü karalouktakat nümüin Josías saashajeʼennaka nümüin. Nütüjaaka saaʼu nnojoluin naainjüin na israeliitakana tü nümakat Jeʼwaa. Mojuka maʼin naaʼin otta nüchatajaaka nüsheʼin, maʼaka piʼrüin suluʼu tü ayaakuaakat. Nümaka: ‹Jashichishi Jeʼwaa wamüin sükajee nnojoluin naainjüin na washikana tü ashajünakat suluʼu tü karalouktakat›.

Nuluwataaka Josías Hilquías süpüla nüsakirüin tü naainjüinjatkat Jeʼwaa. Nüsakiraka Hilquías Huldá, tü nünüikimaajatkat Maleiwa. Süküjaka wanee pütchi nümüinjatü Josías: ‹Süsaleena naainjala na israeliitakana süka naʼwaajüin tü maleiwayaasükat otta kaainjalain maʼin naya. Akatsaʼa süka paainjüin tü anasükat alateerü tia ouktapa pia›.