Ekirajaaya 11
Sunoula otta sukuwaʼipa wayuu mojuka nümüin Maleiwa
¿Kasa sunoula otta sukuwaʼipa wayuu mojuka nümüin Maleiwa? (1)
¿Anoujuinjana na oʼunushiikana nüchiirua Cristo sünain apünüinshin sümaa waneeshiain Maleiwa? (2)
Na oʼunushiikana nüchiirua Cristo, ¿jamüshii nnojoluinjanaka naya sünainpünaain tü kaʼi jemeikat oʼu Jesús? ¿Tü ekeraajiraakat ouyasee? ¿Tü Semanasantakat? (3, 4)
¿Eeshii süpüla naainjüin kasa mojusü na ouktushiikana namüin na katoʼuchiikana? (5)
¿Ouktushi Jesús sünain wanee kuruusa? (6)
¿Jamüsü anaka maʼin talatüle naaʼin Maleiwa watuma? (7)
1. Süpüshuaʼa sunoula otta sukuwaʼipa wayuu nnojotsü mojuin. Akatsaʼa tü mojukat nümüin Maleiwa shia tü shikirajakat tü iküleesia nnojotkat shiimain ooʼulaka tü nnojotkat pansaain sümaa tü süküjakat tü Wiwüliakat (Mateo 15:6).
2. Apünüinshi sümaa waneeshiain Maleiwa: ¿Shiimain apünüinshin sümaa waneeshiain Maleiwa? Nnojo. Jeowa chi Washikai ‹nia chi waneeshikai otta shiimainshikai Maleiwain› (Juan 17:3; Marcos 12:29). Jesús nia chi Nüchonkai otta Maleiwa aluwataashi naaʼu (1 Corinto 11:3). Laülaa Maleiwa nuulia chi Nüchonkai (Juan 14:28). Chi naaʼinkai Maleiwa nnojoishi niain Maleiwa shia tü nütchinkat (Génesis 1:2; Aluwataaushikana 2:18).
3. Kaʼi jemeika oʼu Jesús otta tü Semanasantakat: Jesús nnojoishi jemein 25 tisienpüroʼu, jemeishi nia soʼutpünaa tü palajatkat kaʼi oktupüroʼu, soʼu juyakat tia na arüleejüliikana eejana süpaʼa wanee anooishii sünain aaʼinmajaa namüʼlüin (Lucas 2:8-12). Nnojoishii nuluwataain Jesús na oʼunushiikana nüchiirua sünain sotuinjatüin naaʼin tü kaʼi jemeikat oʼu nia. Tü sotuinjatkat naaʼin shia tü kaʼi ouktakat oʼu nia (Lucas 22:19, 20). Tü kaʼi jemeikat oʼu Jesús otta tü kasa aainjünakat soʼu kaʼikat tia shikirajala tü iküleesia sümaiwajatkat nnojotka shiimain. Müsia tü Semanasantakat eere nnojoluin shikünüin asalaa. Na oʼunushiikana nüchiirua Cristo sümaiwa nnojoishii sünainpünaain tü kaʼi jemeikat oʼu Jesús ooʼulaka tü Semanasantakat, müshiʼiya maaʼulu na shiimainshiikana oʼunuin nüchiirua Cristo.
4. Ekeraajiraa ouyasee: Saashin tü Wiwüliakat eeshii piamashii wayuu aainjüshii miʼiraa saaʼu shikeraajüin nouuyase, wayuukana naainnua nnojoishii anoujuin nünain Jeowa (Génesis 40:20-22; Marcos 6:21, 22, 24-27). Na oʼunushiikana nüchiirua Cristo sümaiwa nnojoishii aainjüin miʼiraa wanaa sümaa shikeraajüin nouyase. Akuwaʼipaakat tia shikirajala tü iküleesia sümaiwajatkat nnojotka shiimain. Na shiimainshiikana oʼunuin nüchiirua Cristo nnojoishii aʼatapajüin wanee kaʼi süpüla nakotchojiraain otta nasülajiraain kasa.
5. Mmoluu neema na ouktushiikana: Na ouktushiikana nnojoishii süpüla naainjüin otta natüjaain saaʼu wanee kasa. Nnojoishii süpüla wakaaliinjüin ooʼulaka naainjüin kasa mojusü wamüin (Salmo 146:4; Eclesiastés 9:5, 10). Ouktapa waya nnojotsü ojuʼitüin tü waaʼinkat, nnojotsü ayatüin katüin soʼu süchikijee ouktuin waya (Ezequiel 18:4). Akatsaʼa eeshii na aapiee mojulaashii kanüliakana yolujaa, nayayaashii na ouktushiikana. Tü naainjakat na wayuukana namüin na ouktushiikana süka mmoluin naya neema nnojotsü anain (Isaías 8:19).
6. Kuruusa: Nnojoishi ouktuin Jesús sünain wanee kuruusa, ouktushi nia sünain wanee wunuʼu lotusü. Tü pütchi griego «kuruusa» münakat, suluʼuka watta saalii Wiwülia shia wanee wunuʼu lotusü. Tü kuruusakat sümaʼanajeejatü tü iküleesia nnojotkat shiimain. Na oʼunushiikana nüchiirua Cristo sümaiwa nnojotsü naʼwaajüin tü kuruusakat. Sutuma tia, ¿anasü saaʼin pümüin wamaʼanale tü kuruusakat? (Deuteronomio 7:26; 1 Corinto 10:14).
7. Eesü süpüla kapüleein maʼin ooʼulawaa suulia tia anoulaakat otta tia akuwaʼipaakat. Eeshii süpüla naashajaain pümaa na püpüshikana otta na paʼaleewainkana süpüla nnojoluin puuʼulaain suulia tü punoujakat anain. Talatüle naaʼin Maleiwa anasü maʼin suulia talatüin naaʼin na wapüshikana watuma (Proverbios 29:25; Mateo 10:36, 37).
[Ayaakua suluʼuka süpana 22]
Nnojoishi apünüinshin sümaa waneeshiain Maleiwa
[Ayaakua suluʼuka süpana 23]
Tü kaʼi jemeikat oʼu Jesús shikirajala tü iküleesia sümaiwajatkat nnojotka shiimain
[Ayaakua suluʼuka süpana 23]
Nnojoluinjana waʼwaajüin otta mmoluin waya neema na ouktushiikana