Pütchi süchiki Nuluwataaya Maleiwa Nuum. 37

PÜTCHI SÜMÜINJATÜ WAYUU SÜPÜSHUAA

¡Alüʼütsü süpüla sajalajaain tü iküleesia nnojotkat shiimain!

▪ ¿Jarat tü iküleesia nnojotkat shiimain?

▪ ¿Jamüinjatü sajaʼlajaaya?

▪ ¿Kasa paainjüinjatka süka sajaʼlajaainjatüin?

¿Jarat tü iküleesia nnojotkat shiimain?

¿Mojusü paaʼin sutuma noʼutuin saaʼin wayuu na suluʼukana tü iküleesia nnojotkat shiimain? ¿Mojusü paaʼin sutuma natkaain, müliain otta nemeejüin wayuu? ¿Jamüsü wainmaka kasa mojusü sutuma tü iküleesia nnojotkat shiimain?

Naashin Jesucristo tü iküleesia nnojotkat shiimain shia eere saainjünüin kasa mojusü maʼaka «mojuin nüchon wanee wunuʼu ittüshi» (Mateo 7:15-17). ¿Kasa naainjaka na wayuu suluʼukana tia iküleesiakat?

Na suluʼukana tü iküleesia nnojotkat shiimain . . .

◼ ... SÜNAINPÜNAASHII ATKAWAA OTTA POLIITIKA. Müsü tü karalouktakat Asiaweek: «Chaaʼaya Asia otta suluʼu wanee mma naata, na shikiipuʼukana tü iküleesia nnojotkat shiimain aluwataweeshii nakajee na wayuu anoujakana namaa süpüla nousütüin tü keeʼireekat naaʼin. Shapaasü saaʼin wayuu sutuma tia». Müshi wanee shikiipuʼu iküleesia chejeʼewai Estados Unidos: «Süpüla nnojoluinjatüin suʼutunuin maʼin saaʼin wayuu, anashii noʼutunule aaʼin napüshuaʼa na mojulaashiikana». Naashin, «aainjünajatü tia sükajee nünülia Maleiwa». Akatsaʼa tü Wiwüliakat müsü sünüiki: «‹Aishi tapüla chi Maleiwakai›, nümüle wane wayuu sünain kanain naaʼin nuwalayuu, aküjashi neʼe naʼalain» (1 Juan 4:20). Müshi Jesús: «Anashii aire jüpüla na jüʼünüükana» (Mateo 5:44). Wainma na suluʼukana tü iküleesia nnojotkat shiimain aluwataanaka sünain atkawaa.

◼ ... EKIRAJÜSHII ALAWAA. Ouktapa wanee wayuu oʼunusü tü naaʼinkat eemüin saaʼinpülee tü ouktusükalüirua saashin tü iküleesia nnojotkat shiimain. Sutuma tia, na suluʼukana tia iküleesiakat achuntushii nneerü süpüla naainjüin miisa naaʼu na ouktushiikana. Naata tü shikirajakat anain tü Wiwüliakat, müsü sünüiki: «Na wayuu katüshiikana oʼu natüjaa aaʼu ouktuinjanain naya; akanasaʼa na ouktushiikana nnojotsü kasain natüjaain aaʼu» (Eclesiastés 9:5, NM). Suʼunule naaʼin na ouktushiikana eemüin saaʼinpülee tü ouktusükalüirua nnojotsüjee nüküjüin Jesús susoʼiraainjatüin naaʼin na ouktushiikana (Juan 11:11-25). ¿Oʼunusü naaʼin na ouktushiikana eemüin saaʼinpülee tü ouktusükalüirua saashin tü iküleesia kaluʼukat pia?

◼ ... ANASÜ NAMÜIN TÜ AKUWAIPA YARÜTTÜSÜKAT. Suluʼu wanee mma naata eeshii tooloyuu eeka shikiipuʼuin iküleesia sümaa namaʼüjiraain nümaa wanee toolo, jierü sümaa wanee jierü jee kasaaleeshii naya. Eeshii eeka nataüjaain tepichi. ¿Jamüsü sünüiki tü Wiwüliakat süchiki tia? Müsü sünüiki: ‹Nnojoleena ekeroluin suluʼumüin nuluwataaya Maleiwa eeka nuʼluwajiraain nukuwaʼipa sümaa wayuu jierü otta wanee jierü nümaa wanee toolo, jee na kamaleiwaseyaashiikana, jee na eeka namaʼüjaain sümaa wayuu nnojotka nuʼwayuusein otta nnojoika suʼwayuusein, jee na tooloyuu amaʼüjiraakana sümaa tooloyuu› (1 Corinto 6:9, 10). ¿Paapüirü süchiki iküleesia eere saainjünüin tia?

¿Kasa alatajatka sümüin tü iküleesia aainjitkat kasa mojusü? Müshi Jesús: «Süpüshua tü wunuʼukolüirua eekai nnojolüin anain süchon, ashottüneerü sümaa sujutünüin soʼu siki» (Mateo 7:19). Ajaʼlajeʼennüinjatü tü iküleesia nnojotkat shiimain. ¿Jamüinjatü sajaʼlajaaya? ¿Joujeerü tia? Süküjüin wamüin Alateetkat Mapeena kapiitulo 17 otta 18.

¿Jamüinjatü sajaʼlajaaya tü iküleesia nnojotkat shiimain?

Kanain paaʼin shiyaakua tü jierü maaʼinsat joyotokot naaʼu wanee mürüt keemashi, 7 nikii otta 10 nuʼuwa (Alateetkat Mapeena 17:1-4). ¿Jarat tia jietkat? Nanainpünaasü shia ‹na aluwataakana maʼin saaʼu tü mmakat›, ishosü süsheʼin, alüʼüjüsü wanee wunuʼu jemeta eejuut otta washirü maʼin shia. Sükajee saainjüin tü naaʼinrakat na ouutshiikana ‹saainjirüin kasa mojusü tü wayuukalüirua süpüshuaʼa›. (Alateetkat Mapeena 17:18; 18:12, 13, 23). Tü jiet maaʼinsatkat saashin tü Wiwüliakat shia süpüshuaʼa tü iküleesia nnojotkat shiimain.

Chi mürüt keemakai naya na aluwataakana maʼin saaʼu tü mmakat (Alateetkat Mapeena 17:10-13). Tü iküleesia nnojotkat shiimain nanainpünaasü na aluwataaliikana.

«Chi wanülüükai [chi mürüt keemakai, NM], je na polooshiikana aluwataashii, najaʼttirüin tü pueulo kaainjaratkat kayaakuakat tü jietkat. Naʼluwateerü süpüshua kasa suluʼujee tü pueulokat. Yüütüüjeerü maʼi natüma. Je malaʼaleejeeria shia natüma sümaa naʼajeerüin» (Alateetkat Mapeena 17:16). Ajaʼlajeʼennüinjatü tü iküleesia nnojotkat shiimain natuma na aluwataakana maʼin saaʼu tü mmakat. ¿Jamüsü sülatajatka tia? Müsü Alateetkat Mapeena: «Aleinjatü nütüma Maleiwa namüin» (Alateetkat Mapeena 17:17). Na suluʼukana tü iküleesia nnojotkat shiimain süsaleena tü naainjalakat nutuma Maleiwa otta najaʼttirüinjatü tü iküleesia nnojotkat shiimain naka na aluwataakana maʼin saaʼu tü mmakat.

¿Kasa paainjüinjatka süka sajaʼlajaainjatüin tü iküleesia nnojotkat shiimain? Müshi wanee aapiee: «Jujuitta jumaala chajee suluʼujee» (Alateetkat Mapeena 18:4). Jujuʼita jooluʼu suluʼujee tü iküleesia nnojotkat shiimain. ¿Jalainjana jia ekeroluin? Nnojoishii manoulainjanain jia, tia nnojotsü anain (2 Tesalónica 1:6-9). Ekeroluinjana jia suluʼumüin tü iküleesia shiimainkat. ¿Jarat tü iküleesia shiimainkat?

¿Jarat tü iküleesia shiimainkat?

¿Kasa naainjaka na suluʼukana tü iküleesia shiimainkat? (Mateo 7:17).

Na suluʼukana tü iküleesia shiimainkat . . .

◼ ... AIJIRAASHII. Na suluʼukana tü iküleesia shiimainkat «nnojoliishii süpüshin naya tü manoujainsatkalüirua», nnojoishii katataawain sutuma naatain neʼiruku otta nakuwaʼipa, ‹aijiraashii› (Juan 13:35; 17:16; Aluwataaushikana 10:34, 35). Nnojoishii ekajiraain, nakaaliinjüin na wayuukana (1 Juan 3:16).

◼ ... KOJUTUSÜ NAMÜIN TÜ WIWÜLIAKAT. Na suluʼukana tü iküleesia shiimainkat nnojoishii ekirajüin pütchi süleʼeruʼujeejatü wayuu, shia nekirajaka tü suluʼujeejatkat tü Wiwüliakat (Mateo 15:6-9). ¿Jamüsü naainjaka tia? Shia süka ‹saapünüin tia pütchikat nutuma chi Naaʼinkai Maleiwa süpüla wekirajüinjatüin wayuu sünain. Jee na aapakana shia, achiajaaneena naya sutuma› (2 Timoteo 3:16).

◼ ... EKIRAJÜSHII WAYUU SÜPÜLA ANAIN OTTA WÜLEIN NAKUWAʼIPA. Na suluʼukana tü iküleesia shiimainkat nekirajüin na tooloyuukana süpüla ‹alinjatüin napüla naʼwayuuse›, na jieyuukana ‹kojutuinjanain natuma naʼwayuuse›, na tepichikana ‹noonooinjanain sümüin nei jee nashi› (Éfeso 5:28, 33; 6:1). Akaʼaya na laülaashiikana napüleerua na anoujashiikana suluʼu tü ouutkajaaleekat wuleinjatü nakuwaʼipa (1 Timoteo 3: 1-10).

¿Paapüirü süchiki iküleesia eere saainjünüin tia? Müsü tü karalouktakat Holocaust Politics, aainjuushika soʼu 2001: «Naainjüle napüshuaʼa na wayuukana tü nekirajakat na aküjüliikana pütchi nüchiki Jeowa nnojotsüjee müliain jee oʼutunuin maʼin saaʼin wayuu».

Na aküjüliikana pütchi nüchiki Jeowa suluʼuka 235 mma, nnojotsü shiain mülee nekirajüin anain tü akuwaʼipa wülesükat, naainjüin shia. Paashajaa namaa süpüla pütüjaain saaʼu tü nuchuntakat Maleiwa pümüin otta süpüla talatüin nia sümaa punoula. Paainja shia jooluʼu. Nnojo kamaʼain pia. ¡Alüʼütsü süpüla sajaʼlajaain tü iküleesia nnojotkat shiimain! (Sofonías 2:2, 3).

Pütüjeere sooʼomüin tü nekirajakat na aküjüliikana pütchi nüchiki Jeowa, püshaja karaloukta namüin otta puluwataa shia eemüin tü aküjünakat wünaapünaa.

□ Juluwataa tamüin tü karalouktakat ¿Kasa nuchuntaka Maleiwa wamüin?

□ Jüküja tamüin süchiki tü jikirajakat sünain tü Wiwüliakat.

[Ayaakuaa suluʼuka süpana 3]

Tü iküleesia nnojotkat shiimain nanainpünaasü ‹na aluwataakana main saaʼu tü mmakat›

[Ayaakuaa suluʼuka süpana 3]

«Jujuitta jumaala chajee suluʼujee»