Ajaʼtteerü süpüshuaʼa tü kasa mojusükat

Ponusü maʼin naaʼin Juan süpüshuaʼa tü pütchi naapakat nüchiki Jeʼwaa. Eepajaʼa wanee kasa mojuka atuma naaʼin. Nümaka nümüin Ramón: «Shiimainrejeʼe nukumajalain Jeʼwaa süpüshuaʼa tü kasakalüirua, pülale nia otta aipüraire nia, ¿jamaka joutka maʼin müliaa? ¿Jamaka joutka maʼin kasa mojusü?».

Nümaka Ramón nümüin: «Shiimain tü pümakat otta wainmainna na makana anüiki. Wanaa sümaa jülüjain waaʼin tü nukuwaʼipakat Jeʼwaa, weʼrüin nnojoluin nücheküin napüleerua na wayuukana mojuin nakuwaʼipa. Eeshijaʼa pümüle, ‹¿kasapülajatü nukumajaka Maleiwa tü mmakat? ¿Kasa amojujaka sukuwaʼipa tü mmakat?›. Süpüla watüjaain saaʼu jamüin joutka kasa mojusü maaʼulu, wasouktüinjatü eʼipajee palajana tia asakinnakalü anain.

Naashajeʼeraka Ramón wetsiikulokot tüü süpüla niiʼiyatüin jamüin naaʼin Jeʼwaa süchikijee nukumajüin tü kasakalüirua yaa saaʼu mmaka:

• «Nünanajakalaka joo chi Maleiwakai süpüshuaʼale tü nükumalakat sünain anashaatain maʼin shia niʼrüin» (Génesis 1:31).

Tü anaʼleekalia akumajia nutuma Jeʼwaa yaa saaʼu mmaka naya na watuushinuukana: Adán sümaa Eva. Anasü maʼin nakumajia nutuma Jeʼwaa otta nukumajüin naya süpüla katüinjatüin noʼu waneepia yaa saaʼu mmaka. Niʼitaain naya suluʼu wanee apain kanüliakat Edén, nnojotsü kasain choʼujaain namüin suluʼu tia apainkat (Génesis 2:8, 9). Nuluwataain naya Jeʼwaa sünain kachonniinjanain süpüla jouluinjatüin nooʼuliwoʼu sainküin tü mmakat süpüla laülaainjanain naya saaʼu tü kasakalüirua (Génesis 1:28). Shiiʼiyatüin wamüin tia, paʼaraiisüinjatüin tü mmakat süpüshuaʼa otta wainmainjatüin wayuu anaka akuwaʼipa saaʼu otta talataka aaʼin. Anashantasü tü kasa aapünajatkat namüin.

¿Kasakaʼa amojujaain tia? Süküjüin tia tü Wiwüliakat:

• «Kaainjalashi Adán nuulia Maleiwa sükajee niyouktajaain sümaa nünüiki nümüin. Ouktakalaka nia saaliijee. Je sükajee kaainjalain Adán, oʼttüsü wayuu ütamüinreʼeya sünain kaainjalaa. Ouktakalaka naya saaliijee» (Roma 5:12).

Aipürai Jeʼwaa makalaka nuluwataain Adán sümaa Eva sünain wanee kasa, naaʼinrüle tia kateerü noʼu waneepia suluʼu tü paʼaraiisükat (Génesis 2:15-17). Nnojoishii apüleeruaanüin aaʼin nutuma Jeʼwaa süpüla noonooinjanain. Nuuʼulaain Jeʼwaa neeʼiyatüin miyoʼuin naaliin napüla. Nuuʼulaain naneeküin tü nachekakat maʼaka wayakana waneeküin tü wachekakat. ¿Kasache naneekaka?

Shia naneekaka nnojoliin noonooin nümaa chi Kakumalakai naya. Kaainjalashii naya yalapünaa, nnojoliinnapa anain maʼin. Suluʼujee tia, laülaashii otta ouktüshii naya. Alatüsü namüin tü nüküjakat paala Jeʼwaa süka nnojoliin noonooin sümaa nünüiki (Génesis 2:17).

Süka nüikkeyuuin waya Adán sümaa Eva, waleʼeruʼusü tü kaainjalaakat makalaka laülaain jee ouktüin waya. Nüküjaka Ramón nümüin Juan, nnojoluin suʼwanajaain tü keeʼireekat naaʼin Jeʼwaa napüleerua na wayuukana. Ayatayülia keeʼireein naaʼin Jeʼwaa kepiain waya suluʼu tü paʼaraiisükat. Naashajeʼeraka Ramón nümüin Juan sümaa María wetsiikulokot tüü:

• «Anuu nünüiki Jeʼwaa chi Kakumalakai tü kasakalüirua chaa iipünaa, chi Maleiwa shiimainshikai, chi Kakumalakai tü mmakat, chi anakai atuma sukumajia tü mmakat. Nnojotsü nukumajaʼalüin neʼe shia, nukumajala süpüla kepiainjatüin wayuu suluʼu: ‹Taya chi kanüliakai Jeʼwaa otta nnojoishi eein wanee naata toulia›» (Isaías 45:18, TNM).

Nüküjüin Ramón nümüin Juan sümaa María tü kasa nüntireetkat chi Maleiwakai saashin tü Wiwüliakat. Nnojoleerü ayuulii, mojuu aaʼin otta müliaa. Aneerü shipia wayuu otta jouleerü eküülü, nnojoleerü ouktaa. Müinjatia paala sukuwaʼipa tü wayuukalüirua nutuma Maleiwa suluʼu tü paʼaraiisükat. Nnojotpajaʼa motuin naaʼin shia. Naashajeʼeraka Ramón nümüin Juan wetsiikulokot tüü:

• «Na lotokana akuwaʼipa, nayeena kepiaka saaʼu tü mmakat süpüla kaʼika süpüshuaʼa» (Salmo 37:29).

Shia tü nüntireetkat Maleiwa tia kasakalüirua.