Wanee aluwataaya paʼaraiisüinjatka atuma tü Mmakat

¿Pütüjaa aaʼu jaralüin tü aluwataaya waashajaainjatkalü achiki?... Shia süchiki tü Nuluwataayakat Maleiwa, tü paʼaraiisüinjatkalü atuma tü Mmakat. ¿Pütüjawee aaʼu sooʼomüin süchiki tia Aluwataayakat?...

Suluʼu wanee aluwataaya, aneekünüshi wanee wayuu süpüla nuluwataainjachin naaʼu na wayuukana. ¿Pütüjaa aaʼuchi jaralinjachin aluwataain suluʼu Nuluwataaya Maleiwa?... Nia Jesuu. Chashi kepiain nia sirumatuʼu. Soʼu palitchon kaʼi, aluwataajeechi Jesuu saaʼu mmaka süpüshuaʼa. ¿Talateetche saaʼin pümüin wayuu süpüshuaʼa nuluwataapa Jesuu saaʼu mmaka?...

¡Aa, talateerü maʼin saaʼin wayuu! Paʼaraiisüpa Mmaka, nnojoleerü atkaain wayuu. Aijiraajeerü wayuu süpüshuaʼa. Nnojoleerü eein ayuulii jee ouktaa. Koʼuinjana na moʼusaliikana. Na macheʼesaliikana, kacheʼeinjana naya. Na masaʼasaliikana, awataweena otta wonnoteena naya. Jouleerü maʼin eküülü. Anamieerü tü mürütkalüirua otta ashaitteena waya sümaa. Na wayuu ouktakana, kateerü noʼu nachikuaʼa. Kateerü noʼu nachikuaʼa na wayuu pikirajaakana achiki suluʼu karalouktakat tüü maʼaka naaʼin Elías, David, Rebeca otta Rahab. ¿Piʼreein naya sünain katüin noʼu nachikuaʼa?...

Aishi pia nüpüla Jeʼwaa otta keeʼireesü naaʼin talatüin paaʼin. Ayatüle pia pikirajaain nüchiki Jeʼwaa sümaa poonooin nümaa, kateerü poʼu waneepia suluʼu tü paʼaraiisükat. ¿Keeʼireesü paaʼin tia?...