Nukumajala Maleiwa tü sirumatuʼukat otta tü Mmakat

Nukumajala waya Jehová. Nukumajala kasa süpüshuaʼa, tü kasa weʼrakat otta tü nnojotkat weʼrüin. Süpülapünaa nukumajüin tia, nukumajüin watta naalii aapiee. ¿Pütüjaa aaʼu kasain wayuu na aapieekana? Nukumajala naya Jehová sünain müin aka naaʼin niakai. Nnojoishii süpüla weʼrüin naya maʼaka nnojolin weʼrüin Jehová. Chi palajachikai aapiee nukumajakai Jehová, aʼyataajiraashi nümaa sünain akumajaa tü jolotsükalüirua, tü kasa chakat iipünaa otta tü wane kasakalüirua. Jee müsia tü Mmakat, nakumajala wapüla.

Anaka maʼin sukuwaʼipa tü Mmakat nutuma Jehová süpüla kepiainjatüin wayuu saaʼu otta tü mürütkalüirua. Warattuuisü nutuma nuwarala chi Kaʼikai saaʼupünaa Mmakat. Jee müsia, nukumajüin tü uuchikalüirua, tü palaakat otta tü süchikalüirua.

¿Kasakaʼa alatüin süchikijee tia? «Anakaja eere wunuʼulia jee aʼttiee», nümaka Jehová. Eekalaka joo watta saalii wunuʼulia sümaa naatawalin süsii otta süchon. Jee müsia nukumajüin Jehová watta saalii mürüt, eekai suwatüin iipünaapünaa, eekai shirokuin wüin otta lemütüin mmoluʼu. Nukumajüin mürüt joʼuuchein maʼaka saaʼin atpanaa otta mürüt miyoʼuyuu maʼaka saaʼin elepante. ¿Jarat tü mürüt kamalainkat pümüin?

«Anakaja jooluʼu wakumajüle wayuu», nümaka Jehová nümüin chi palajachikai aapiee. Naatainjatü nakuwaʼipa na wayuukana suulia tü mürütkalüirua. Nountuinjatü nakumajüin wanee kasa, naashajaain, nasirajüin otta noʼuraajüin nümüin Maleiwa. Naaʼinmajüinjatü tü Mmakat sümaa tü mürütkalüirua. ¿Pütüjaa aaʼu kasaichin nünülia chi palajachikai wayuu? ¿Pütüjawee aaʼu tia?