EKIRAJAAYA 57
Paaʼinrajatka kaainjarale pia
Mayaainjeʼe alin püpüla Jehová jee piyoutuin tü kasa nnojotkalü anain noʼuluʼu, ayateeria mojukuwaʼipalüin putuma waneirua kasa. Eejeetpejeʼe tü kasa eeka mojuleein maʼin noʼuluʼu Jehová (1 Corinto 6:9, 10). Sülatüle pümüin tia, soto paaʼin ayatüin alin pia nüpüla Jehová, moteerü naaʼin paainjala jee nükaalinjeechi pia.
1. ¿Kasa waaʼinrajatka süpüla motuin naaʼin Jehová waainjala?
Mojusü maʼin naaʼin wanee wayuu aikai apüla Jehová kaainjarale nia. Nümülialapejeʼe Jehová naaʼin sükajee pütchikat tüü: «Jaʼitairü müin ishokai saaʼin tü jaainjalakat, kasuujeerü shia tatuma maʼaka saaʼin nieve» (Isaías 1:18). Wayaawajaale suulia waainjala, moteerü shia naaʼin Jehová. Ayaawajaashi suulia naainjala wanee wayuu mojule naaʼin saaʼujee tü kasa mojusü naaʼinrakat, nuuʼulaale suulia otta nuchuntule nümüin Jehová motuin naaʼin tü naainjalakat. Nüchajaain sukuwaʼipa süpüla nunouteʼerüin tü kasa mojusü jülüjakat naaʼin, nuuʼulaain tü kasa kaainjalakalü atuma nia jee pansaasü nukuwaʼipa sümaa tü nuluwataakalü anain nia Jehová (paashajeʼera Isaías 55:6, 7).
2. Kaainjarale waya, ¿kasa naaʼinraka Jehová süpüla nükaalinjain waya nakajee na laülaashiikana?
«Anakaja müleka neenajirüle na laülaashiikana suluʼu tü outkajaaleekat» müshi Jehová nümüin chi wayuu kaainjalakai (paashajeʼera Santiago 5:14, 15). Nnojoishi niain neʼe Jehová alin napüla na laülaashiikana, aishiʼiya napüla na nawalayuukana. Niʼitaala naya Jehová süpüla nakaalinjain waya sünain anouteʼeraa wakuwaʼipa (Galacia 6:1).
Waainjale wanee kasa eeka mojuin maʼin, ¿kasa naaʼinraka na laülaashiikana süpüla nakaalinjain waya? Aashajaweena wamaa piamashii jee apünüinshii laülaashii süpüla naküjain wamüin jamüin mojuka maʼin tü waainjalakat. Naküjeerü wamüin tü anakat süpüla waaʼinrüin jee natütüleʼereerü waaʼin süpüla nnojoluin waaʼinrüin shia süchikuaʼa. Kaainjarale wanee wayuu jee macheʼere nia süchiirua naainjala, ojuʼitinneechi naʼakajee na anoujashiikana. Naaʼinrüin tia na laülaashiikana süpüla nnojoluin mojuin nakuwaʼipa na waneinnua nünainjee chi kaainjalashikai.
WEKIRAJAA SOOʼOMÜIN
Wekirajaa sünain kojutuinjatüin wamüin otta waapaainjatüin sümaa tü nümakat Jehová wamüin kaainjarale waya.
3. Waküja süchiki tü waainjalakat süpüla anajiraain waya nümaa Jehová
Mojusü naaʼin Jehová kaainjarale waya, müsüjeseʼe waküjainjatüin süchiki tü waainjalakat nümüin. Jaashajeʼera Salmo 32:1-5 otta yooto jia süchiki tüü:
¿Jamüsü waküjainjatka nümüin Jehová süchiki waainjala?
Süchikijee waküjain nümüin Jehová tü waainjalakat, waküjainjatü shia namüin na laülaashiikana süpüla nakaalinjain waya. Müle shia watuma, aneerü waaʼin. Jünaja tü VIDEOKOT otta yooto jia süchiki tüü:
¿Kasa naaʼinraka na laülaashiikana süpüla nuuyantüin Canon nüchikuaʼa nünainmüin Jehová?
Süpüla nakaalinjain waya na laülaashiikana, waküjainjatü namüin tü shiimainkat. Jaashajeʼera Santiago 5:16 otta yooto jia süchiki tüü:
¿Jamüsü mapüleejeetka namüin na laülaashiikana nakaalinjain waya waküjale tü shiimainkat namüin?
Püküja süchiki tü paainjalakat namüin na laülaashiikana, nnojo puunjulajüin süchiki jee puuʼulaa nükaalinjain pia Jehová.
4. Amülialaasü naaʼin Jehová naalin na wayuu kaainjalakana
Macheʼere wanee wawala süchiirua naainjala, ojuʼitinneechi nia naʼakajee na anoujashiikana. Nnojoliinjana waya aʼaleewajaain nümaa. Jaashajeʼera 1 Corinto 5:6, 11, TNM otta yooto jia süchiki tüü:
Shijitünüle soolojia pan saʼaka wanee maasa, oolojoosü sutuma. ¿Mojeetche nakuwaʼipa na wawalayuukana waʼaleewajaale nümaa chi macheʼekai süchiirua naainjala? ¿Jamüsü mojeetka shia?
Nashatüin nukuwaʼipa Jehová na laülaashiikana amülialaasü naaʼin naalin na kaainjalakana jee nakaalinjain naya süpüla nouyantüin nünainmüin Jehová. Mayaainjeʼe mojuin naaʼin saalin nachiaanüin, nayaawata aaʼulu mojuin tü kasa naainjakat (Salmo 141:5).
¿Jamüsü watüjaaka saaʼu sümülialaain naaʼin Jehová, kamaneein nia jee niyaawatüin saaʼu jamüin naaʼin na kaainjalakana?
5. Moteerü naaʼin Jehová waainjala wayaawajaale suulia
Nüküjain Jesús sükajee wanee akuwaʼipaa jamüin naaʼin Jehová niyaawajaale wanee wayuu suulia naainjala. Jaashajeʼera Lucas 15:1-7 otta yooto jia süchiki tüü:
¿Kasa watüjaka nüchiki Jehová sünainjee tü nikirajakalü anain Jesús?
Jaashajeʼera Ezequiel 33:11 otta yooto jia süchiki tüü:
¿Kasa waaʼinrajatka shiimainre wayaawajaain suulia waainjala?
Müshi Jehová maʼaka naaʼin wanee anneetpüʼü jülüjakai aaʼin naʼanneetse.
EESHII WAYUU EEKAI NAMÜIN: «Wainmajüsü taaʼin saaʼu taküjain süchiki taainjala namüin na laülaashiikana, jama tojuʼitinnaleere».
¿Jameerü pünüiki pümünüle amüin?
WATÜJAAITPAKA AAʼU
Waaʼinrüle wanee kasa eeka mojuin maʼin noʼuluʼu Jehová jee wayaawajaale suulia sümaa nnojoluin waaʼinrüin shia piantua, moteerü naaʼin Jehová waainjala.
Pusouta shiʼipajee
¿Jamüsü waküjainjatka süchiki waainjala nümüin Jehová?
¿Kasa waaʼinrajatka süpüla motuin naaʼin Jehová waainjala?
Waaʼinrüle wanee kasa eeka mojuin maʼin noʼuluʼu Jehová, ¿jamüshii wachuntajanaka kaalinwaa namüin na laülaashiikana?
PÜNAʼLA SOOʼOMÜIN
Pünaja nüchiki wanee wayuu ayaawatakai saaʼu sümülialaain naaʼin Jehová naalin maʼaka süküjain Isaías 1:18.
¿Kasa naaʼinrajatkat na laülaashiikana süpüla nakaalinjain wanee wayuu kaainjalakai?
«Amülialaasü naaʼin na laülaashiikana naalin chi kaainjalashikai» (Aapiria Wayuu, akoosütoʼu 2024)
Jülüja paaʼin tü naaʼinrajatkat na laülaashiikana süpüla nakaalinjain na ojuʼitinnakana
Sünain tü pütchikat «Choʼujaasü tamüin touyantaain nünainmüin Jehová» ashajünüsü nüchiki wanee wayuu ayaawatakai saaʼu keeʼireein naaʼin Jehová nuuyantaain nünainmüin.
«Sunouteʼerüin nakuwaʼipa tü Bibliakat» (Aapiria Wayuu, aaʼuriiroʼu 1, 2012)