2 NOÉ
Atüjaana aaʼulu keraain wayuu süpüla sajaʼttinnüin
SÜCHIKIJEE nünaajaain Enoc, eʼrüliijaashii wayumüin waneinnua aapiee chaa sirumatuʼu süka suchuntaain naaʼin naʼluwajiraain nakuwaʼipa. Ashakatüshii naya mmapaʼamüin, wayuushii naya jee naʼwayuusesü tü jieyuu eekai nacheküin. Kachonshii naya namüin na jieyuukana jee miyoʼuyuu maʼin nachonnii sümaa neʼrüliin wayumüin, nefilim münüshii naya. Mojulaakalaka maʼin wayuu soʼujee tia mayaainjeʼe anapuʼuin maʼin nakuwaʼipa nutuma Maleiwa. Eepejeʼe wanee wayuu naatakai akuwaʼipa noulia, nia Noé, chi nülüinkai Enoc.
Lotusü nukuwaʼipa Noé maʼaka lotuin nukuwaʼipa Enoc. Saashin tü Bibliakat oonooshi waneepia Noé nümaa chi waneeshikai suluʼu Maleiwain. Kaʼwayuuseshi Noé mapa. Paaʼinwashi nia sümaa nuʼwayuuse sünain ekirajaa na apünüinshiikana nachonnii süpüla noonooinjanain nümaa Jehová. Naatakalaka nakuwaʼipa noulia na wayuu kaʼakajanakana naya.
Soʼu wanee kaʼi nüküjaka Jehová nümüin Noé najaʼttirajanain na wayuu mojulaashiikana süpaʼajee tü mmakat, eepejeʼe wanee kasa nuluwataaka anain nia. Nuluwataain sünain akumajaa wanee anuwa miyoʼu suulia wüinsirajüin na wayuu sulujunakana. Nnojotsü niʼraajaajüin aaʼu Noé wanee juya eekai miyoʼuin maʼin maʼaka saaʼin tü nüküjakalü achiki Jehová, nnojoishi nia aʼyataaichin sünain akumajaa wanee anuwa eekai miyoʼuin maʼin. Anoujapejeʼe Noé sünain nünüiki Jehová, müsüjeseʼe naaʼinramaatüin tia aʼyatawaakat.
Eeshii wayuu mojulaakana maʼin nümüin Noé sümaa nüpüshi, nayoutuin süchiki tü pütchi naküjakat jee tü kasa naʼyataakalü anain
Yalayalainjatü naaʼin Noé sümaa nüpüshi süpüla naʼyataain sünain akumajaa tü anuwakat. Apüleeruaanakajasaʼa maʼin naaʼin otta eejatkajasaʼa wayuu ataʼüleeka sukuwaʼipa tü naʼyataainkat. Mmotsü maʼin wayuu neema na aapiee mojulaashiikana otta eʼrülii maʼin wayumüin nachonnii, ayatapejeʼe Noé sünain akumajaa tü anuwakat, eejatü nümaa nuʼwayuuse, nachonnii otta naʼwayuuse nachonnii. Mekiisatshii naya napüshuaʼa, eeshiijaʼa naʼyataale maʼaka 50 juya sünain akumajaa tü anuwakat.
Soʼu nukumajüin Noé tü anuwakat naapirüin wayuu süchiki tü kasa alatajatkat. «Chi wayuu aküjakai süchiki kasa eekai lotuin sukuwaʼipa», müsü pütchi nüchiki. Nia chi palajachikai sünain aapiraa wayuu napüleerua na nüpüshikana. Nayapejeʼe neʼe aapaain sümaa tia na wayuu kepiakana nümaa. Eeshii na nüpüshi ayoutakana süchiki nanoutuin nakuwaʼipa, nnojotsü nanouteʼereein na wayuukana tü kasa mojusü naainjakat. Naata maʼin nukuwaʼipa Noé suulia nakuwaʼipa na manoujainsaliikana. «Sutuma kanoulain Noé atüjaana aaʼulu keraain na wayuukana süpüla najaʼttinnajanain», müsü tü Bibliakat nüchiki.
Kettaakalaka tü anuwakat mapa, nünaajüinjatpejeʼe Noé sümaa nüpüshi tü neküinjatkat sümaa tü wüin choʼujaajeetkat namüin suluʼu tü anuwakat jee tü choʼujaajeetkat sümüin tü wüchii nekerotirüinjatkat suluʼu. Sülatakalaka wanee kasa, antayaa müsü wüchii süpüshuaʼa, eekai tooloin jee müsia eekai jierüin, antüsü shia eemüin tü anuwakat. Shikeronuwaayaa sümaka sümüiwaʼa suluʼu piamawalin shia.
Nüküjatüjülia Maleiwa nümüin Noé nikerotüinjachin sümaa nüpüshi suluʼu tü anuwakat, jama choʼujaʼalaain neʼe akaratshi kaʼi süpüla süʼitüin tü juyakat. Jülüjataa waaʼin keraain natuma na nüpüshikana Noé tü kasa choʼujaajeetkat namüin sümaa noʼotuin shia suluʼu tü anuwakat. Eeshiijaʼa shimeeʼerainparale naya wayuu sutuma tia. Kettaapa süchise tü anuwakat, nüsürütkalaka Jehová tü supuettoʼusekat. Ooʼulaakajasaʼa na wayuukana suulia nemeeʼerainpalain naya neʼrapa tia. Süʼitakalaka tü juyakat sümaa kaʼüliain maʼin shia, miyoʼu maʼin tü sainñakat, 40 kaʼi süʼitaka oʼu tü juyakat, müsüjeseʼe nnojoluin jaʼyain tü uuchikalüirua sutuma miyoʼuin tü wüinkat. Najaʼttirakalaka Jehová na wayuu mojulaashiikana süpaʼajee tü mmakat.
Alatüsü suulia wanee juya sulujachin Noé tü anuwakat sümaa nüpüshi, anasü nakuwaʼipa wanaa sümaa tia. Shiyoolojopa tü wüinkat, sütükaaka tü anuwakat saaʼu wanee uuchi. Nüküjain Jehová mapa nujuʼitüinjachin Noé suluʼujee tü anuwakat. Ojuʼitüshijese nia sümaa nüpüshi. Naʼwaajakalaka Jehová jee naapaka tü analuʼutkat nümüin Jehová saaʼu noʼttaain nutuma suulia wüinsirüin naya. Nüküjakalaka Jehová nnojoluinjatüin nüʼitirüin süchikuaʼa wanee juya miyoʼu maʼin jee nujuʼitirüin wanee kasüpolüin süpüla shiyaawatüin saaʼu wayuu nnojoluinjatüin naaʼinrüin Jehová tia piantua.
Nüikeyuu waya na nüpüshikana Noé, waapüinjatkalaka maʼin tü analuʼutkat namüin saaʼu yalayalain naaʼin jee saaʼu naatain tü nakuwaʼipakat noulia na mojulaashiikana.
Paashajeʼera pütchikat suluʼujee tü Bibliakat
Yooto waya süchiki tüü:
¿Kasa naaʼinraka Noé sutuma yalayalain naaʼin?
Pikirajaa sooʼomüin
1. ¿Jamapuʼusü sukuwaʼipa wayuu süpülapünaa tü juya miyoʼukat? (w02 3/1 5, 6).
2. ¿Joujachi aluwataanüin Noé nutuma Maleiwa sünain akumajaa tü anuwa miyoʼukat? ¿Joujatü nüküjain Maleiwa nümüin Noé tü kaʼi süʼitajatkalü oʼu tü juya miyoʼukat? (w12 4/15 23 püt. 5-8).
3. ¿Jamüshii wanoujakaʼa sünain shiimain süʼitüin tü juya miyoʼukat? (ijwbq ekirajaaya 156 püt. 2-5 otta recuadro). 1
Historic Collection/Alamy Stock Photo
Ayaakuaa 1: Saashin tü karaloʼuta nashajakat na kanüliakana hindú, eejachi wanee wayuu akumajakai anuwa süpüla nuʼttaain süchikumüin wanee juya miyoʼu maʼin. Sajaʼttapa tü juyakat, eesü wanee kasa naapaka sümüin nümaleiwase, niakalaka sutuushin wayuu süpüshuaʼa chia wayuukai.
4. ¿Kasa alataka 100 juya süchikijee tü juya miyoʼukat? ¿Jamüsü naaʼin Noé süka nnojoluin jaa sümüin wayuu? (it «Noé» püt. 13). 2
Ayaakuaa 2
Paaʼinrajatka süpüla yalayalain paaʼin
¿Kasa wanaawaka aluʼu tü kasa alatakat maaʼulu sümaa tü alatakat soʼu nükalia Noé? (Mat. 24:36-39).
¿Kasa watüjaka sünainjee nukuwaʼipa Noé süchiki...
... nnojoluinjatüin walakaain wanee kasa watuma? 3
Ayaakuaa 3
... waʼyataaliinjanain? 4
Ayaakuaa 4
... nnojoliinjanain washapajaain? 5
Ayaakuaa 5
¿Kasa paaʼinrajatka süpüla yalayalain paaʼin maʼaka yalayalain naaʼin Noé?
Pütüjaka nüchiki Jehová
¿Kasa tatüjaka nüchiki Jehová sünainjee pütchikat tüü?
¿Kasapülajatche nüshajiraka Jehová suluʼu tü Bibliakat tü tekirajaaitpakalü anain?
¿Kasa tasakireechika anain Noé nüsoʼiraapa aaʼin nutuma Jehová?
Sooʼomüin tü pütüjaainjatkalü aaʼu
Pünaja tü naaʼinrakat wanee wawala laülaakai süpüleerua nüpüshi aʼyataakai maʼin süpüla nüshatüin nukuwaʼipa Noé.
Na anakana süpüla washatüin anoula: Noé noulia na eejanakana nükalioʼu (2:57)
Pikiraja püchonnii süpüla natüjain sünainjee nukuwaʼipa Noé.