6 REBECA
Anasü sümüin süpütüin suumain
ALÜʼÜJASÜ Rebeca wanee amüchi miyoʼu, ajaʼitajatü wüin suluʼujee wanee ishi, motsoshi chi kaʼikat wanaa sümaa tia. Eesüjaʼa sajaʼitawaire weinshi. Shiʼraka waneinnua wayuu naatajannuu sümaa kameeya sotpaʼa tü ishikat. Arütkaasüjeseʼe shia sotpaʼamüin tü wüinkat sümaa shipirajüin tü amüchikat.
Süpataapa Rebeca tü amüchikat, nuwataaka sünainmüin wanee laülaa naʼakajee na wayuu eejanakana sotpaʼa tü ishikat jee nümakalaka sümüin: «Püshakatira paala pümüchi, püsülajaiwa wüin tasüin». Nnojotsü moʼuyaain Rebeca noulia naya wayuu naatajanakana oumain, kamaneesü shia namüin. Süshakatiraka tü amüchikat sünain saapüin wüin nüsüin. «Anakajaʼa püsüle wüin taʼlaüla», sümaka nümüin. Nüsakalaka wüin chia laülaakai.
Nnojoipejeʼe niain neʼe chi laülaakai asülajünüin asüin wüin sutuma Rebeca, ajaʼitüsia shia wüin süsüin tü poloosükat kameeya neʼejenaka na naatajanakana oumain. Nünanajaa nümüsüjeseʼe shia chi laülaakai, niʼrüin tütüin maʼin tia majayütkat sünain ajaʼitaa wüin jee sünain shipirajüin tü anuwakat süpüla süsüin wüin tü kameeyakalüirua. Nüsakitkalaka jaralüin kachooin shia otta eerejeʼeya süpüla natunkapünaain namaʼana na kasayuukana sünain. Nnojotkalaka wainmajüin saaʼin Rebeca. Süküjain namüin anain natunkaapünaale nipialuʼu chi süshikai jee shikireʼerüin tü kameeyakalüirua.
Nukumajüin Jehová sukuwaʼipa süpüla nüntiraain chia laülaakai sümaa Rebeca, nnojotsü sütüjaain aaʼu Rebeca tia. Eeshijaʼa niale Eliezer chia laülaakai, nüchepchia nia Abrahán. Wayuu loto akuwaʼipachi jee kakaliaichi nia niʼraajüin Abrahán. Maʼaka jeʼra semaana paala, nuchuntuin Abrahán nümüin chi nüchepchiakai nuʼunajachin wattamüin süpüla nüchajaain wanee wayuu keraaka süpüla nuʼwayuusein Isaac, chi nüchonkai Abrahán, jama niainjachin niʼipünaain apüla nuwashirüin. Nuchuntuin Abrahán nümüin chi nüchepchiakai nüchajaainjatüin wanee wayuu eekai sunoujain nünain Jehová, oʼuraajüshijeseʼe Eliezer nümüin Jehová süpüla nükaalinjain nia sünain antaa sünain tia wayuukot. Nuchuntuin nümüin Maleiwa kamaneeinjatüin tia wayuukot namüin süpüla nütüjaain saaʼu shiain keraain süpüla nuʼwayuusein Isaac. Shiaʼaya saainjaka Rebeca tia. Kamaneesü shia nümüin Eliezer.
Nnojotsü wainmajüin saaʼin Rebeca sünain sükaalinjain na wayuu antapaatakana mayaainjeʼe nnojoliin shiʼraajüin naya. Shiimainñaaje kamaneepuʼuin wayuu sümaiwa suulialeʼeya maaʼutpünaa yaa. Jamüshiijaʼa na wayuukana maaʼulu, jashichishii naya jee nayouta achikirü aaʼinraa kasa anasü (2 Tim. 3:1, 3). Anapejeʼe maʼin sukuwaʼipa Rebeca süka yalayalain maʼin saaʼin.
Shiyaawata aaʼu Rebeca kasain nantüin eeʼiree naya wayuukana wattajee. Betuel nünülia chi süshikai Rebeca jee Labán nünülia chi suwalakai, ounejaanüshijeseʼe Eliezer natuma süpüla niküinjachin namaa. Shiapejeʼe nüküjain chi laülaakai kasain nüntüin eeʼiree, nüküjakalaka anain nukuwaʼipa nutuma Jehová süka nüntiraain sümaa Rebeca. «Niaʼaya Jehová kamaʼanajeejachika tia», nümakalaka Betuel nümaa Labán nayaawatapa saaʼu nünüiki Eliezer.
Shiyaawata aaʼu Rebeca nücheküin Jehová süpüleerua sukolojooinjatüin wattamüin jee nuʼwayuuseinjatüin shia wanee wayuu nnojoikai shiʼraajüin, ¿kaseetche saaʼinraka?
¿Kaseetche saaʼinraka Rebeca? Nütüjaa aaʼu Abrahán eein süpüla nnojoluin suʼunuin Canaánmüin nümaa Eliezer. Süneekajatpejeʼe Rebeca suʼunuinjatüle jee makatüinjatüle shia. Waneemüin kaʼi, nüsakirakalaka Eliezer nümaʼaleeinjatüle Rebeca. Süsakinnaka Rebeca palajana natuma na süpüshikana. «Aa, oʼuneesiaʼaya taya», sümakalaka namüin. Anasü sümüin Rebeca süpütüin shipia otta süpütüin süpüshi. Sütüjaapejeʼe aaʼu eein süpüla nnojoluin süleʼejüin süchikuaʼa namaʼanamüin. ¿Kasa yalayalaka atuma saaʼin? Shiajaʼa süka shiyaawatüin saaʼu nücheküin Jehová tia süpüleerua.
Eetaasü maʼaka jeʼra semaana noʼunaka oʼu saaʼu kameeya süpüla nantüin nipialuʼumüin Abrahán chayaa Canaán. Antüshii motsopa kaʼikat, shiʼraka Rebeca wanee wayuu warai müin nümüiwaʼa süpaʼapünaa wanee anoouishii, asakireʼetshi nia naaʼin. Sütüjaapa saaʼu niain Isaac, saapaakalaka wanee kuluulu süpüla sukoʼoyoluin suʼupünaa süka, jama shiyaawatüin saaʼu kojutuinjachin sümüin chi suʼwayuuseinjachikai. Wayuu anamia Isaac, asakireʼerawaishi naaʼin, eetaasü maʼaka 40 nuuyase, mojuyülia naaʼin sutuma sünaajaain Sara, tü niikat, apünüinrü juya neʼe süchikijee sünaajaain. ¿Yalayaleetche saaʼin Rebeca süpüla saaʼinrüin tü nüneekakalü apüla shia Maleiwa? ¿Nuʼwayuuseetche shia Isaac sümaa alin nia süpüla jee sümülialüin naaʼin? ¿Sükaalinjeeiche nia sünain aʼyatawaa nümüin Jehová otta süpüla anain nutuma shikiipüʼüin nia nüpüshi? Shiaʼaya saaʼinraka tia saashin tü Bibliakat. Süküjain tü Bibliakat jamüin naaʼin Isaac niʼraajaiwaʼaya Rebeca. Anuu sünüiki: «Müliakalaka nia shiiʼiree. Mayaainjeʼe mojuin naaʼin saaʼujee outuin tü niikat, anaitpa joo naaʼin».
Paashajeʼera pütchikat suluʼujee tü Bibliakat
Yooto waya süchiki tüü:
¿Kasa saaʼinraka Rebeca sutuma yalayalain saaʼin?
Pikirajaa sooʼomüin
1. ¿Kasa nnojoluitpaka aapünüin nümüin Eliezer saaʼujee kachooin Abrahán? ¿Kasa wayaawataka anainjee nnojolin nuchunjüin saaʼujee tia? (Gén. 15:2-4; 24:12; w97 1/1 30 püt. 2).
2. ¿Jamüsü nuchuntakaʼa Abrahán sukolojooinjatüin Rebeca Canaánmüin suulialeʼeya niain okolojooin Isaac suumainpaʼamüin? (w97 1/1 30 püt. 3).
3. ¿Kasapülajatü tü asülajünakat sümüin Rebeca jee sümüin süpüshi? (it «Rebeca» püt. 4).
4. ¿Jamüsü sukuwaʼipa Rebeca wanaa sümaa suʼunuin chejee Harán chamüin Négueb eejachire kepiain Isaac? (wp16.3 14 püt. 9). 1
www.LifeintheHolyLand.com
Ayaakuaa 1: Wainmapuʼu wayuu kepiaka suluʼu tü mmakat Négueb, keküleuisü maʼin shia süpüla nümüʼlüin Abrahán.
Paaʼinrajatka süpüla yalayalain paaʼin
¿Kasa watüjaka nünainjee Abrahán, Isaac otta Rebeca waneekajatpa jaralüin waʼwayuuseinjatüin? (Gén. 24:2, 3; 27:46–28:1).
Aʼyataat Rebeca, asülajüt shia jee kojutusü wayuu sümüin. ¿Kasa naaʼinrajatka na wawalayuu jieyuukana süpüla nashatüin sukuwaʼipa? 2
Ayaakuaa 2
¿Kasa paaʼinrajatka süpüla yalayalain paaʼin maʼaka yalayalain saaʼin Rebeca?
Pütüjaka nüchiki Jehová
¿Kasa tatüjaka nüchiki Jehová sünainjee pütchikat tüü?
¿Kasapülajatche nüshajiraka Jehová suluʼu tü Bibliakat tü tekirajaaitpakalü anain?
¿Kasa tasakireetka anain Rebeca süsoʼiraapa aaʼin nutuma Jehová?
Sooʼomüin tü pütüjaainjatkalü aaʼu
Paashajeʼera süchiki yalayalain saaʼin Rebeca sünain alin süpüla suʼwayuuse otta süchonnii.
¿Kasa natüjaka na tepichikana sünainjee sukuwaʼipa Rebeca?
«Anasü maʼin sukuwaʼipa Rebeca» («Ayaakuaa tekirajaainjatka anain», suluʼuka jw.org)