14 RAHAB
Nia süneekaka Jehová noulia na wayuu kamaakana shia
KEPIAPUʼUSÜ Rahab eere sushokolooin süsepü tü pueulokot Jericó. Wayuu maaʼinsat shia, shiʼrawalin suluʼujee shiwentaanase nuwarala chi kaʼikai saaʼupünaa tü pueulokot Jericó, tü pueulo joutkalü aluʼu alana (Deut. 34:3). Shiasaʼa suwaraijaapa pueulopaʼamüin shiʼrüin mojuin maʼin naaʼin na wayuu kepiakana yala jee mmoluin maʼin naya. Natüjaa aaʼu nükaalinjeenain Jehová na israelitakana, naapeerüin namüin tü pueulokot Jericó jee nayamüleenain na wayuu kepiakana suluʼu.
Alatüirü suulia 40 juya niyuʼluin Jehová na israelitakana Egiptojee. Palaasitshi Faraón nutuma namaʼaleeya na nusurulaatsekana shiroku tü palaa kanüliakat Ishosü. Wanaa sümaa chajanain isashiipaʼa na israelitakana, nayamülüin Sehón otta Og, na amorreo aluwataashiikana wanaa sümaa tia. Yalajanaka jutkatüin na israelitakana süʼütpaʼa maʼin Jericó. Ashutajana naya saaʼu Jericó süpüla süsalainjanain nutuma Jehová naainjala na wayuu kepiakana suluʼu tü pueulokot.
Sütüjaa aaʼu Rahab kaainjaraliin maʼin na wayuu kepiakana Jericó. Eesüjaʼa suuʼulaweere suulia tü sukuwaʼipakat wayuu maaʼinsat. Müsüjeseʼe nnojoluin mmoluin shia saapapa süchiki tü alatajatkat nutuma Jehová. Talatüsü saaʼin sutuma tia. Shiyaawata aaʼu niain Jehová wanee Maleiwa aaʼinmajakai na wayuu kanoulakana otta kojutushii naya nümüin. Eetaayaai müin nakuwaʼipa namaleiwase na cananeokana. Müsüjeseʼe sürütkaweein Rahab nünainmüin Maleiwa, jama lotuin sukuwaʼipa kasa nutuma, wulein nukuwaʼipa otta kamaneein maʼin nia.
Antapaatüshii aipaʼa shipialuʼumüin Rahab piamashii wayuu. Achajaashii eeinjanale natunkapünaain. Shiyaawatapejeʼe Rahab israelitain naya wayuukana, nanaʼlaainjatü sümüin tü pueulokot Jericó. Nnojotpejeʼe shiain neʼe Rahab ayaawatüin naya wayuukana. Aküjünüsü nümüin chi aluwataakai saaʼu Jericó nantapaain piamashii wayuu anaʼlaainjanakana sümüin tü pueulokot. Nüjütüinjeseʼe piamashii wayuu shipialuʼumüin Rahab süpüla nataʼülüin naya. ¿Kaseetche saaʼinraka Rahab? ¿Saapeetche nekii naya wayuukana namüin na mojulaashiikana? ¿Niataajeechipa Jehová süneekaka süpüla sunoujain nünain?
Yalayala aaʼinrü maʼin Rahab, süneeküin Jehová süpüla sunoujain nünain, suunjuluin na piamashiikana israelita iipünaa sünain tü shipiakat. Süjütaka na mojulaashiikana suluʼupünaa wanee wopu naata, noʼunapa na mojulaashiikana, suwataaka Rahab eejanale suunjuluin na piamashiikana israelita. Süküjaka namüin jamüin suunjulajakaʼa nachiki. Anuu sünüiki: «Tatüjaa aaʼu naapeerüin Jehová jümüin mmakat tüü». Anoujaitpa shia nünain Namaleiwase na israelitakana. Süküjain namüin mmoluin maʼin na wayuu kepiakana Jericó neema na israelitakana. Suchuntaka namüin na piamashiikana israelita nnojoluinjatüin outuin shia najaʼttirapa Jehová tü pueulokot.
¿Jamüsü sunoujakaʼa Rahab nünain Jehová jee suuʼulaaka suulia sukuwaʼipa wayuu maaʼinsat?
Nnojoishii jamajüin atumawaa na piamashiikana israelita anaʼlaaka sümüin tü pueulokot süka nakaalinjünüin sutuma Rahab, nayaawataka saaʼu sunoujain nünain Jehová. Anakalaka namüin tü suchuntakat namüin, nnojoluinjatüin shia outuin sümaa süpüshi. Nnojotpejeʼe süküjainjatüin jalajanain suunjuluin na piamashiikana israelita. Naküjaka sümüin sükacherüinjatüin wanee jiiku ishosü soʼuluʼu tü shiwentaanase anooipaʼakat. Jimatüinjatü shia shipialuʼu soʼunnaa tü atkawaakat süpüla katüinjatüin soʼu sümaa süpüshi.
Sükacherüin Rahab wanee jiiku sünain shiwentaanase, nashakatiainjatü na piamashii israelita anaʼlaakana sümüin tü pueulokot. Shiasaʼa mapa saaʼinrüin Rahab tü namakat na piamashiikana israelita. Sükacherüin wanee jiiku ishosü sünain tü wentaanakat. Yalayala aaʼinrü maʼin shia, nnojotsü süküjain süchiki tü kasa naaʼinrakat na piamashiikana israelita. Naapülejeʼe süchiki na wayuu kepiakana Jericó suunjulüin na piamashiikana israelita, oʼutuna aaʼinrüjee shia. Saaʼinrüinña tü namakat sümüin na piamashiikana israelita, jimatüsü shia shipialuʼu sümaa süpüshi. Saapapa süchiki jimaʼalaa sümüin nutuma Jehová tü süchikat Jordán, shiyaawata aaʼu anain tü saaʼinrakat wanaa sümaa sükaalinjain na piamashiikana israelita. Mmotkajasaʼa maʼin na wayuu kepiakana Jericó neʼrapa na israelitakana naʼleeyatüin akaratshitua tü pueulokot. Naʼyalajitpa na sacerdotekana tü suʼuwakat anneerü soʼu tü akaratshikat kaʼi, aʼwaatüshii na israelitakana. Sujunnajaʼalaa sümaka süsepü tü pueulokot. Yalajatü Rahab sümaa süpüshi jimatüin shipialuʼu. Nnojotka kasain alatüin sümüin, katüsü soʼu sümaa süpüshi.
Süchikijee tü atkawaakat, ayuʼnnusü Rahab sümaa süpüshi natuma na israelita anaʼlaakana sümüin tü pueulokot maʼaka nüküjain shia paala Josué. Shiaʼala neʼe nnojotka ojuttuin eejatüle kepiain Rahab. Napüshisü mapa Rahab na israelitakana, kasaatsü shia mapa nümaa wanee israelita jee kachonniika naya. Kojuya juya süchikijee tia, ayuʼlaashi wanee wayuu nanainjee na suuʼuliwoʼukana Rahab, yalayala aaʼinchi, nia Jesucristo (Mat. 1:5, 16). Anasü maʼin sukuwaʼipa Rahab nutuma Jehová sutuma kanoulain jee yalayalain saaʼin.
Paashajeʼera pütchikat suluʼujee tü Bibliakat
Josué 2:1-24; 5:1; 6:14-25
Yooto waya süchiki tüü:
¿Kasa saaʼinraka Rahab sutuma yalayalain saaʼin?
Pikirajaa sooʼomüin
1. Püküja jamapuʼuin maʼin sukuwaʼipa Rahab chayaa Jericó (w13 11/1 12, 13).
2. ¿Jamüsü watüjaakaʼa saaʼu nnojoliin chajanain na piamashiikana israelita shipialuʼu Rahab shiiʼiree nainkaain sümaa? (it «Wayuu maaʼinsat» püt. 6).
3. ¿Jamüsü eejatkaʼa sümaʼana Rahab iipünaa sünain shipia suuʼulia lino pachaʼüwaaka sutuma? ¿Kasa aainjünapuʼuka süka tü linokot? (it «Lino, I» püt. 2-4). 1
Thanks for your interest in my photos/Moment Open via Getty Images
Ayaakuaa 1: Suuʼulia lino.
4. ¿Jamüsü nnojotkaʼa mojuin tü saaʼinrakat Rahab wanaa sümaa nnojoluin süküjain tü shiimainkat namüin na mojulaashiikana? (w04 12/1 9 püt. 1). 2
Ayaakuaa 2
Paaʼinrajatka süpüla yalayalain paaʼin
¿Jamüsü yalayalainjatkaʼa saaʼin Rahab süpüla shiiʼiratüin sukuwaʼipa jee suʼwaajüin Jehová wanaajiraa namaa na israelitakana? ¿Kasa natüjaka sünainjee sukuwaʼipa Rahab na wayuu ekirajaakana sünain tü Bibliakat?
Süküjain wamüin tü Bibliakat nnojoliinjanain waküjain waʼalain. Eejeenapejeʼe na nüʼünüükana Maleiwa apüleeruaajeenaka waaʼin shiiʼiree waküjain nachiki na wawalayuukana. Sülatüle tia wamüin, ¿kasa watüjaka sünainjee sukuwaʼipa Rahab? (Prov. 11:13; Ecl. 3:7; Éf. 4:25). 3
Ayaakuaa 3
Ayaakuaa 3
¿Kasa amaa paaʼinrajatka süpüla yalayalain paaʼin maʼaka yalayalain saaʼin Rahab?
Pütüjaka nüchiki Jehová
¿Kasa tatüjaka nüchiki Jehová sünainjee pütchikat tüü?
¿Kasapülajatche nüshajiraka Jehová suluʼu tü Bibliakat tü tekirajaaitpakalü anain?
¿Kasa tasakireetka anain Rahab süsoʼiraapa aaʼin nutuma Jehová?
Sooʼomüin tü pütüjaainjatkalü aaʼu
¿Kasa watüjaka sünainjee tü süchikimaajatkat Rahab süpüla katüin woʼu süntapa nükalia Jehová?
«¿Jalainjana waya süntapa sükalia sajaʼttajatüin kasa mojusü?» (w09 5/15 6-8)
Pikiraja püchonnii sükajee tü süchikimaajatkat Rahab.