21 SAMUEL
Jintüi yalayalakai aaʼin sünain aküjaa nünüiki Jehová
WANAAWASÜ nukuwaʼipa Samuel nümaa Sansón otta sümaa tü nüchonkat Jefté. ¿Kasa wanaawaka aluʼu? Aʼyataashii naya waneepia nümüin Jehová süka naapüin nanüiki nümüin Jehová na wayuu kachooinkana naya. Aʼyataashi Samuel waneepia nümüin Jehová maʼaka saaʼin tü nüchonkat Jefté (1 Sam. 2:11). Nazareo Samuel maʼaka nazareoin Sansón (Juec. 13:7). Yalayala aaʼinchi Samuel maʼaka yalayalain naaʼin nayakana.
Ana shia tü niikat Samuel. Saapatüjülia sünüiki nümüin Jehová, saapüinjachin chi süchonkai nümüin Jehová süpüla niʼyataainjachin waneepia nümüin suluʼu tü aʼwaajülee chakat Siló. Nüpütapa chi jintüikai maʼaka apünüin juya nuuyase, eʼikajaanüshi nia sutuma tü niikat. Oʼunajaʼawaisü shia naaʼu juyawai, akolojoʼowaisü shia nümüin wanee kuluulu jeketü. Miyoʼushi Samuel suluʼu tü aʼwaajüleekat, aaʼinmajünüshi nia nutuma Elí chi laülaashikai napüleerua na sacerdotekana. Wayuu laülaa chi makai anülia. Eeshijaʼa naaʼinmajünüle Samuel sutuma waneirua wayuu aʼyataakana nümüin Jehová suluʼu tü aʼwaajüleekat wanaa sümaa tia.
Ofní otta Finehás nanülia na nüchonniikana Elí. Aainjashii naya kasa mojusü suluʼu tü aʼwaajüleekat Jehová. Aʼluwajiraashii nakuwaʼipa namaa na jieyuu aʼyataakana nümüin Jehová suluʼu tü aʼwaajüleekat. Nuluwataain Ofní otta Finehás na aʼyataakana neʼipajee süpüla neimmolojuin na wayuu asülajakana kasa nümüin Jehová suluʼu tü aʼwaajüleekat. Naapaain saʼanasia tü kasa aapünakat nümüin Jehová. Nütüjaa aaʼu Elí tü kasa mojusü naaʼinrakat na nüchonniikana, naaʼayajaa aaʼinchii neʼe naya. Nnojoliipejeʼe oonooin naya sümaa nünüiki. ¿Kasakaʼa alatüin nümüin Samuel? Ayatüshia miyoʼuin Samuel suluʼu tü aʼwaajüleekat. Aishi nia nüpüla Jehová otta napüla na wayuukana. Nunouteʼerajatpa Jehová sukuwaʼipa tü alatakat, nüneeküin Samuel süpüla niainjachin aküjain nünüiki.
Soʼu wanee ai, ounejünüshi Samuel. Niayaa Elí ounejaka nia naaʼinruʼu. Nuwataaka nünainmüin Elí süpüla nüsakirüin nia. Laülaaichi Elí wanaa sümaa tia, moʼupaʼasai nia. Nüküjaka nümüin Samuel nnojolin nuunejüin nia otta niisalaainjachin nüchikuaʼa. Ounejünüshi Samuel piantua süchikijee tia. Niyaawataka saaʼu Elí niain Jehová ounejüin Samuel. Nüküjaka nümüin Samuel tü nünüikinjatkat nümüin Maleiwa nuunejapa nia. «‹¿Aa Jehová? Püküja maa tamüin, taapajüin pünüiki, püchepchia taya›, pümeechikaʼa nümüin», nümaka Elí nümüin Samuel.
Ounejünüshi Samuel nüchikuaʼa nutuma Jehová, pienchituaichi nia nuunejüin. «Samuel, Samuel», nümaka Jehová nümüin. Naaʼinraka chi jintüikai tü münakat nümüin nutuma Elí. «Taapajüin pünüiki, püchepchia taya», nümaka Samuel nümüin Jehová. Nüküjaka Jehová nunouteʼerüinjatüin tü kasa alatakat suluʼu tü aʼwaajüleekat chayaa Siló. Süsalainjachi Elí saainjala nüchonnii süka nnojoliin nüchiaain naya. Nüküjain Maleiwa tü alatajatkat nümüin Elí namaʼaleeya na nüchonniikana. Nüküjainjatka joo Samuel tia nümüin Elí.
Mayaainjeʼe niisalaain nüchikuaʼa Samuel, nnojotsü süküjain tü Bibliakat nutunkule nüchikuaʼa. Atamaashi nia jaʼyuupa, nujutatka supuettoʼuse süpaatiase tü aʼwaajüleekat maʼakaapuʼu shia nutuma. Mmotka Samuel, nnojotsü nüküjeein achiki nümüin Elí tü kasa naapakat. Nuunejünaka nutuma Elí, nüsakiraka nia jamüin nünüiki Maleiwa nümüin. «Nnojo puunjulajüin süchiki tia toulia», nümaka Elí nümüin Samuel süka niʼrüin mmoluin maʼin nia.
Mayaainjeʼe jintülin maʼin Samuel, nüküjain nümüin Elí tü alatajatkat nutuma Jehová
Kapüleekajasaʼa maʼin tia nümüin Samuel süka kojutuin Elí nümüin. Elí müshi aka naaʼin wane nutuushi nümüin. Akaʼaya Elí laülaashi nia napüleerua na sacerdotekana otta laülaashi nia napüleerua na israelitakana. Yalayala aaʼinchi Samuel, nüküjain süpüshuaʼa tü alatajatkat nümüin Elí. Nütüjaaka aaʼu Elí süsalainjachin nia tü kasa alatakat suluʼu tü aʼwaajüleekat. Nnojotpejeʼe atüjaanüin aaʼu nüchiaale Elí na nüchonnii kaainjalakana.
Anakuwaʼipai Samuel nutuma Jehová süka yalayalain naaʼin. Eejachi Jehová waneepia nümaa Samuel saashin tü Bibliakat. Nünüikimaajachi Jehová Samuel yalejeechiki, ekeraajüsü süpüshuaʼa tü nüküjakalü achiki. Ekeraajüsü tü nümakat süchiki tü alatajatkat nümüin Elí otta namüin na nüchooinkana. Soʼunnaa wainma juya, nuʼunirüin Jehová nakuwaʼipa na israelitakana nükajee Samuel. Waneepiashi Samuel nümaa Jehová sümaa nünüikimaajachin nia otta nekiipüʼüin nia na israelitakana. Akaalinjünüshi Samuel nutuma Jehová süpüla yalayalainjatüin naaʼin joʼuuiwaʼaya nia. Ayatüsia yalayalain naaʼin Samuel laülaapa nia. Anakuwaʼipaishi maʼin nutuma Jehová yalejeechiki.
Paashajeʼera pütchikat suluʼujee tü Bibliakat
Yooto waya süchiki tüü:
¿Kasa naaʼinraka Samuel sutuma yalayalain naaʼin?
Pikirajaa sooʼomüin
1. ¿Jamapuʼusü sukuwaʼipa tü pueulokot Siló eejatüle tü aʼwaajüleekat? (w92 11/1 8, 9). 1
Todd Bolen/BiblePlaces.com
Ayaakuaa 1: Eejatüle tü pueulokot Siló.
2. ¿Kasa naainjapuʼuka Samuel suluʼu tü aʼwaajüleekat Maleiwa? (ia 60-62 püt. 9-13). 2
Ayaakuaa 2
3. «Nnojoishi eʼraajünüin maʼin Jehová nutuma Samuel», ¿jamüsü sümakaʼa tü Bibliakat nüchiki Samuel joʼuuiwaʼaya nia? (1 Sam. 3:7; w02 12/15 8 püt. 5, 6).
4. ¿Jamüsü shikeraajia tü kasa aküjünakat süchiki nüpüshi Elí? (it «Elí, I», püt. 5-7).
Paaʼinrajatka süpüla yalayalain paaʼin
Anasü maʼin süpüla nashatüin na tepichikana nukuwaʼipa Samuel. ¿Kasa naaʼinrajatka süpüla...
... jüüjüüin naya? (1 Sam. 3:5).
... kojutuin namüin na waneinnua? (1 Sam. 3:6-10).
... naaʼinrüin tü aluwataanakalü anain naya? (1 Sam. 3:15). 3
Ayaakuaa 3
¿Kasa yalayalainjatka apüla naaʼin na tepichikana? ¿Kasa naaʼinrajatka süpüla nashatüin nukuwaʼipa Samuel?
¿Kasa amaa paaʼinrajatka süpüla yalayalain paaʼin maʼaka naaʼin Samuel?
Pütüjaka nüchiki Jehová
¿Kasa tatüjaka nüchiki Jehová sünainjee pütchikat tüü?
¿Kasapülajatche nüshajiraka Jehová suluʼu tü Bibliakat tü tekirajaaitpakalü anain?
¿Kasa tasakireechika anain Samuel süsoʼiraapa aaʼin nutuma Jehová?
Sooʼomüin tü pütüjaainjatkalü aaʼu
Jaʼitainna tepichin jee laülaayuuin waya, yalayalainjatü waaʼin süpüla waaʼinrüin tü kasa anakat. Pünaja videokot tüü süpüla puuntuin paaʼinrüin tia.
Mayaainjeʼe mojulaain na wayuu kepiakana nükalioʼu Samuel, nüneeküin niʼyataain nümüin Jehová.
«Nüneeküin Samuel niʼyataain nümüin Jehová» (ijwis ekirajaaya 15)