Tü shikirajakalü anain tü Bibliakat
Tü alatajatkat soʼu tü kaʼi kasalajaneetkalü oʼu saainjala wayuu
Sünain pütchikat tüü puunteerü anain suluʼu pibibliase susoutia tü pütchi eekat süpüla püsakirüin anain. Müleka keeʼireere paaʼin eesü süpüla pikirajüin namaa na aküjaliikana pütchi nüchiki Jehová susoutia tü püsakitkalü anain.
1. ¿Kasa alateetka soʼunnaa tü kaʼi kasalajaneetkalü oʼu saainjala wayuu?
Tü ayaakuaa yalakat pikialuʼujee shia tü alatajatkat soʼu tü kaʼi kasalajaneetkalü oʼu saainjala wayuu nutuma Maleiwa naashin na wayuukana. Jülüjataa waaʼin wattain saalii wayuu nümülatuʼu Maleiwa tü süsalainjatkalü atuma saainjala: noʼutku naya wayuukana aapüneerü namüin kataa oʼu chaa iipünaa jee müshiʼiya waneinnua ojutunushi naya saʼaka tü sikikat. Tü süküjakat tü Bibliakat süchiki tü kaʼi kasalajaneetkalü oʼu saainjala wayuu shia sajaʼttinnüinjatüin tü kasa mojusü eekat mmapaʼa (Salmo 96:13). Nia Jesús aneekünaka nutuma Maleiwa süpüla nunouteʼerüinjatüin nakuwaʼipa na wayuukana (Paashajeʼera Isaías 11:1-5 otta Aluwataaushikana 17:31).
2. ¿Kaseerü aainjünaka soʼunnaa tü kaʼi kasalajaneetkalü oʼu saainjala wayuu?
Chi palajachikai wayuu niʼitaakai Maleiwa yaa saaʼu tü mmakat kanüliakai Adán, eʼrüijaashi nia wayumüin nümüin, sutuma tü naaʼinrakat kaainjalashii na nüikeyuukana, müliashii naya jee outushii naya (Roma 5:12). Süpüla nunouteʼerüin Jesús tü kasa mojusü naaʼinrakat Adán, asoʼireʼenneerü naaʼin nutuma wayuu wattakana naalii outuinnapakana. Suluʼu tü karaloʼutakat Alateetkat Mapeena aküjünüsü süchiki tü naaʼinreetkat Jesús soʼunnaa tü miit juya nuluwataajeetkalü aaʼu (Paashajeʼera Alateetkat Mapeena [Apocalipsis] 20:4, 11, 12).
Nasoʼireʼennapa aaʼin na outushiikana kasalajaneerü naainjala, nnojoleetpejeʼe shiain saaʼujee tü kasa naaʼinrakat süpülapünaa outuin naya, shieerü sünainjee tü aküjüneekat suluʼu tü karaloʼuta süküjakalü achiki Alateetkat Mapeena kapiitulo 20 (Roma 6:7). Nüküja achiki chi aluwataaushikai Pablo eejeenain wayuu lotokana akuwaʼipa nnojoliikana lotuin akuwaʼipa asoʼireʼeneenakana aaʼin süpüla nekirajaain nüchiki Maleiwa (Paashajeʼera Aluwataaushikana 24:15).
3. ¿Kasa maa aainjüneetka soʼunnaa tü kaʼi kasalajaneetkalü oʼu saainjala wayuu?
Na wayuu outakana sümaa nnojoluin neʼraajüin Jehová, eeshii süpüla naʼyataain nümüin jee naaʼinrüin tü nüchekakat. Naainjale tü münakat namüin kateerü noʼu waneepia, eekajasaʼa na nnojoliikana oonooin sümaa nünüiki Maleiwa süsaleena naya nutuma, outeena naya (Paashajeʼera Juan 5:28, 29 otta Isaías 26:10; 65:20).
Sajaʼttapa tü kaʼi kasalajaneetka oʼu saainjala wayuu niiteʼereerü Jehová nakuwaʼipa na wayuukana maʼaka saaʼin nukumajatüjülin naya paala (1 Corinto 15:24-28). Anakatche maʼin tü eejeetkat namüin noonoole sümaa nünüiki Jehová. Soʼunnaa tia miitkat juya suʼtteechi chi Yolujaakai nutuma Maleiwa suluʼu wanee ishi, nujuta nümeechia nia süpüla nuuʼulaküin naaʼin na wayuukana. Nüchajaajeerü maʼin sukuwaʼipa Satanás süpüla nükayaleʼerüin na wayuukana nuulia Jehová, na nnojoliikana oonooin sümaa nünüiki chi Yolujaakai kateena oʼu yaa saaʼu tü mmakat süpüla kaʼikat süpüshuaʼa (Paashajeʼera Isaías 25:8 otta Alateetkat Mapeena 20:7-9).
4. ¿Jeʼtsü tü wane kaʼi kasalajaneetkalü oʼu saainjala wayuu?
Süküjain tü Bibliakat eein wane kaʼi kasalajaneetka oʼu saainjala wayuu. Shia tü alateetkat palit kaʼi ajaʼttireetka kasa mojusü eekat maaʼutpünaa yaa, antajalameerü shia maʼaka tü juya miyoʼu eejatkat nükalioʼu Noé. Najaʼttiraka na wayuu mojulaashii eejanakana soʼu tia. Meeria soʼu palit kaʼi, ajaʼttinneena na mojulaashii eekana maaʼulu yaa süpüla anashiinjatüin kepiaa namüin na wayuu lotokana akuwaʼipa (Paashajeʼera 2 Pedro 3:6, 7, 13).