PÜTCHI SÜNAINKA SÜTA TÜ REWIISÜTAKAT
¿Jülüjüshiche pia naaʼin Maleiwa?
«Mojusü taaʼin otta wayuu müliashi taya. Jülüjüshi taya naaʼin Jeʼwaa.»a NÜNÜIKI DAVID, CHI ALUWATAAKAI SAAʼU ISRAEL, SOʼUJACHI TÜ JUYAKALÜIRUA SÜCHIKIJEEKAT MIIT SÜPÜLAPÜNAA WAKALIA.
«Na wayuukana müshii aka saaʼin wanee wüin yootchon maʼin suluʼu wanee waatte.» (ISAÍAS 40:15, NM)
¿Pansaasüche nünüiki David wanaa sümaa nümüin jülüjüin nia naaʼin Maleiwa? ¿Jülüjüshiche pia naaʼin Maleiwa? Watta saalii wayuu manoujüinka sünain jülüjüin naaʼin Maleiwa wayuu. ¿Jamüshiiche manoujüinka naya sünain tia?
Shia sutuma nnojoluin wantapünaain nünain Maleiwa naashin nayakana. Na wayuukana nümüin Maleiwa müshii aka saaʼin «wanee wüin yootchon maʼin suluʼu wanee waatte, müshii aka saaʼin sümamüla mma suluʼu wanee pesa» (Isaías 40:15, NM). Anuu nünüiki wanee wayuu manoulasai: «Malaa neʼe watuma wanoujüle sünain jülüjüin waya naaʼin wanee Maleiwa».
Otta eeshii eeka namüin nnojolin nümüliajüinjanain naya Maleiwa saaʼujee wainmain tü naainjalakat. Anuu nünüiki wanee wayuu kanüliashi Jim: «Achuntapuʼushi taya waneepia nümüin Maleiwa shiiʼiree tachecherüin taaʼin suulia aashichijawaa, nnojoittaashi taya nükaaliinjeein saaʼujee kaainjaralin taya sutuma ayatüinya taashichijaain».
¿Nnojoishiiche niʼrüin waya Maleiwa saaʼujee wattain maʼin nia? ¿Aishiiche nüpüla na wayuukana? Nüküjüin wamüin Maleiwa jamüin sukuwaʼipa tia. Nüküjüin wamüin sükajee tü Wiwüliakat nnojolin nia wattain woulia, jülüjüshii waya naaʼin waneʼewai wakua. Müsü tü süküjakat Aluwataaushikana 17:27: «Nnojoishijasa wattain Maleiwakai woulia waneʼewai wakua». Sünain tü wekirajaainjatkalü anain süchikijee tüü, watüjaweerü aaʼu jamüin sünüiki tü Wiwüliakat süchiki tia otta tü naainjakat Maleiwa süpüla niiʼiyatüin jülüjüin naaʼin pia sümaa wayuu maʼleekalia.
a Salmo 40:17, NM; Jeʼwaa nünülia Maleiwa saashin tü Wiwüliakat.