PÜTCHI SÜNAINKA SÜTA TÜ REWIISÜTAKAT
¿Pütüjaa aaʼu kasaichin nünülia Maleiwa?
Aleeweere pia nümaa wanee wayuu, pütüjaainjatü aaʼu kasaichin nünülia, ¿aashimüin? «Aleeweere pia nümaa Maleiwa, pütüjaainjatü aaʼu kasaichin nünülia», müsü Irina, wanee wayuu chejeʼewat Bulgaria. Saashin tü pütchi wekirajaaitpakalü anain, keeʼireesü naaʼin Maleiwa warütkaain nünainmüin. Müsüjeseʼe nüküjüin Maleiwa wamüin suluʼu tü Wiwüliakat kasaichin nünülia. «Jeʼwaa tanülia», müshi nia (Isaías 42:8, TNM).
Nüküjüin Maleiwa wamüin suluʼu tü Wiwüliakat kasaichin nünülia. «Jeʼwaa tanülia», müshi nia (Isaías 42:8, TNM)
¿Keeʼireesüche naaʼin Maleiwa watüjaainjatüin saaʼu kasaichin nünülia sümaa wachuntajatüin shia? ¡Jamüsaʼa! Nüshajirüinjeseʼe nünülia maʼaka siete miittua suluʼu tü karaloukta Nüchikimaajatkat Maleiwa. Jee müsia ashajünüsü shia süka pienchisü leetüra suluʼu Hebreo. Wainmatua maʼin süshajünüin tü nünüliakat Maleiwa suluʼu tia karalouktakat, shia neʼe sümüiwaʼa makalü akuwaʼipa. Makalaka watüjaaitpain saaʼu keeʼireein naaʼin Maleiwa watüjaain saaʼu kasaichin nünülia sümaa wachuntajatüin shia.a
Piʼraajiraale nümaa wanee wayuu, jüküjiraain kasaichin jünülia. ¿Pütüjaa aaʼu kasaichin nünülia Maleiwa?
Mojuteechi Maleiwa watuma müleka wachuntüle tü nünüliakat naashin noʼutku na wayuukana. ¿Jamüsüche makaʼa nanüiki? Shia sutuma wulein nukuwaʼipa chi Maleiwakai sümaa pülashin maʼin nia naashin. Shiimain kojutüinjatüin wamüin tü nünüliakat Maleiwa maʼaka kojutüin wamüin nünülia wanee waʼaleewain. Akatsaʼa keeʼireein maʼin naaʼin Jeʼwaa wachuntajatüin nünülia wanaa sümaa waʼwaajüin nia otta waküjüinjatü shia sümüin wayuu (Salmo 69:30, 31; 96:2, 8). Soto waaʼin tü nümakat Jesuu wanaa sümaa niʼiküin na nikirajüinkana sünain oʼuraajaa: «Müinjatü jünüiki juʼuraajapa: Washikai chakai sirumatuʼu, wule putuma tü pünüliakat». Wulesü watuma tü nünüliakat Maleiwa wanaa sümaa waküjüin shia sümüin wayuu otta arütkaajeena waya nünainmüin waainjüle tia (Mateo 6:9, TNM).
Saashin tü Wiwüliakat, naapüin Maleiwa nanüiki na wayuu «kojutükana amüin tü nünüliakat» (Malaquías 3:16, TNM). Müshi Jeʼwaa namüin na wayuu kojutükana amüin tü nünüliakat: «Taaʼinmajeechi nia süka niʼraajüin tanülia. Takaaliinjeechi nia nuchuntüle kaaliinwaa tamüin. Eejeechi taya nümaa suʼunnaa niʼrüin müliaa» (Salmo 91:14, 15, TNM). Müleka keeʼireere waaʼin naʼaleewainjanain waya Maleiwa, watüjaainjatü aaʼu kasaichin nünülia sümaa wachuntajatüin shia.
a Jamüshiijaʼa na wayuu ashajakana tü Wiwüliakat suluʼu naata anüikii, nnojotsü nashajüin tü shiimainsükat nünülia Maleiwa. «Senyotkai» jee «Maleiwa», müshii neʼe naya nümüin. Pütüjeere sooʼomüin süchiki tü aküjünakat süchiki nünülia Maleiwa, paashajeʼera tü karalouktakat ¿Kasa shikirajaka maʼin tü Wiwüliakat? süpana 195 sünainmüin 197. Nakumajala na aküjüliikana pütchi nüchiki Jeʼwaa.