Piʼitaa suluʼu pukuwaʼipa tü nikirajakalü anain Jesuu (shiʼipa piama)

1-3. ¿Jamüsü sütüjaaka saaʼu wanee wawala kaaliin shia nüpüla Jeʼwaa wanaa sümaa suʼuraajüin nümüin?

EEJATÜINKA wanee wawala pürekutsoot rekulaat, Lana sünülia. Chejeejatüinka shia Alemania soʼu tü juyakat 2012, wainma tü kasa alatakat sümüin chejeechikü. Achuntüsü shia kaaliinwaa nümüin Jeʼwaa, ayatüsüjaʼa nükaaliinjain shia. Chapa shia suluʼu tü türeinkat, müsü shia nümüin Jeʼwaa: «Pükaaliinja taya süpüla tekirajüinjatüin wanee wayuu ekirajaweeka pünain». Mapa maʼin, süntapa eemüin tü süshaʼwajülekat katünasü, aküjünüsü sümüin suʼunaleejeerüin tü katünasü kaluʼuinjatkat shia waneemüin kaʼi. Suchuntaka nümüin Jeʼwaa nükaaliinjainjatüin shia süka manneetsein shia jee müsia nnojotsü joo eein wanee miichi eere sutunkaainjatüin.

² Yaauletchon süchikijee suʼuraajüin nümüin Maleiwa, antiraashi sümaa wanee wayuu koleejiajiraapuʼukai sümaa, shiʼikalaain nia tü niikat sümaa tü noushukot chamüinchika eemüin tü süshaʼwajülekat katünasü. Chaʼwai nia Sudáfrica. «Atak, yaasüle pia Lana», nümaka sümüin niʼraiwaʼaya shia. Süküjaka tü alatakat sümüin, amülialaasüjeseʼe naaʼin saalin. «Anasü wamaai pia miichipaʼamüin putunkaaiwa chaʼayaa», nama amüinrü shia. Oʼunüsüjaʼa shia mapa namaa. Chapa shia nepialuʼu, nasakiijüin shia sünain tü sunoujakalü anain jee tü shiʼyataainkat nümüin Maleiwa.

³ Waneemüin kaʼi, süküjüin Lana namüin süchiki waneeirua kasa nasakitka anain shia sünainjee tü Wiwüliakat. Mapa, süshajüin nanülia jee müsia tü dirección eere kepiain naya, saapüin tia karalouktakat namüin wanee wawalayuu chejeʼewalii chayaa süpüla nawaraijaainjanain saaʼu. Ayatsia pürekutsoolüin Lana maaʼulu yaa, talatashaatasü saaʼin süka nükaaliinjain shia Jeʼwaa soʼu kaʼikat tia (Sal. 65:2).

4. ¿Kasa wekirajaainjatka anain sünain ekirajaayakat tüü?

⁴ Wachuntapa kaaliinwaa nümüin Jeʼwaa, nükaaliinjamaatüin waya (Sal. 34:15; Prov. 15:8). Woʼuraajapa nümüin Maleiwa, wachuntüinjatü nümüin palajana tü kasa alanaʼleekalia naashin Jesuu. Sünain ekirajaayakat tüü, wekirajaajeerü anain pienchisü kasa wachuntüinjatka nümüin Maleiwa naashin Jesuu. Waaʼinrüle shia, ayateena waya waneepiain nümaa Jeʼwaa (paashajeʼera Mateo 6:11-13).

«ANAKAJA MÜLEKA PAAPAWAIRE WAMÜIN WEKÜIN SÜPÜLA WANEʼEWAI KAʼI»

5, 6. ¿Jamüshii wachuntüinjanaka kaaliinwaa nümüin Jeʼwaa napüleerua na wawalayuu maʼletsekana?

⁵ Anakajaʼa «paapawaire wamüin weküin», müinjatü wanüiki naashin Jesuu. «Paapa tamüin teküin», nnojoishii müinjanain waya. Müsia sukuwaʼipa nutuma wanee wawala Victor nünülia, alapalaai nia naaʼu na wawalayuukana chaa África. Anuu nünüiki: «Taapüin analuʼut nümüin Jeʼwaa süka eein tü teküinjatkat sümaa tü taʼwayuusekat nutuma jee müsia süka eein chi nneetchon wawalaajiainjatkat tü miichi kaluʼukat waya. Nakaaliinjain waya na wawalayuukana sünain tia makat. Tachuntüin nümüin Jeʼwaa nükaaliinjai na wawalayuu maʼletsekana».

⁶ Eesüjaʼa nnojorüle choʼujaain wamüin tü weküinjatkat, eepejeʼe wawalayuu müliakana sutuma nnojoluin wanee kasayaakejeʼe neküinjatka, eesü shiale neʼe wanee kasa antaka namüin. Wachunta nümüin Jeʼwaa napüleerua naya wawalayuukana. Anashii wakaaliinjüle naya sünain tü kasa choʼujaakat namüin. Anashii wasülajüle süpüshi tü wanneetsekat süpüla nakaaliinjünüin na wawalayuukana sainküinpünaa tü mmakat. Wejitüinjatü shia suluʼu tü kojoncheinkalüirua. Müle shia watuma, aneerü nakuwaʼipa na wawalayuukana (1 Juan 3:17).

7. ¿Kasa nüküjaka achiki Jesuu süpüla nikirajüin waya sünain nnojoluinjatüin shapaain waaʼin?

⁷ Süchikijee joo niʼiküin Jesuu na nikirajüinkana sünain oʼuraajaa, niʼitaain wanee sukuwaʼipa süpüla nikirajüin naya sünain nnojoluinjatüin shapaain naaʼin sutuma tü kasa choʼujaakat namüin. Naashin Jesuu, anashaatasü nutuma Jeʼwaa tü süsiikat wunuʼu, naaʼinmajüin shia. Akaʼaya wayakana, naaʼinmajeena waya Jeʼwaa, müsüjeseʼe nnojoluinjatüin shapaain waaʼin sutuma tü eekai choʼujaain wamüin (Mat. 6:30-34). Talatüinjana waya eere wamaʼana tü weküinjatkat jee tü choʼujaakat wamüin süpüla waneʼewai kaʼi. Anapejeʼe wachuntüle nümüin Jeʼwaa süpüla kepiainjanain waya, süpüla wantüin sünain wanee aʼyatawaa jee nükaaliinjain waya süpüla watüjüinjanain süpüleerua tü wakuwaʼipainjatkat ayuuipa waya. Eepejeʼe wanee kasa woʼuraajaleeinjatka maʼin achiirua. Wekirajaa sünain tia.

8. «Anakaja müleka paapawaire wamüin weküin süpüla waneʼewai kaʼi», ¿kasa wayaawataka aaʼu sutuma tia pütchikat? (Piirakaa sümüin tü ayaakuaa suluʼukat süpana 28)

⁸ Sutuma tü nümakat Jesuu wanaa sümaa nümüin «anakaja müleka paapawaire wamüin weküin süpüla waneʼewai kaʼi», wayaawata aaʼu wachuntajanain nümüin Jeʼwaa süpüla ayatüinjanain nikirajüin waya jee süpüla waʼaleewainjachin nia. Makaʼa wanüiki shia sutuma tü nümakat Jesuu: «Nnojotsü shiain sümüiwa tü pankat katüin atüma soʼu wayuu, kateerü oʼu shiaya sütüma süpüshua tü nünüikikat chi Maleiwakai» (Mat. 4:4).

«MOTO PAAʼIN TÜ WOJUYAALAKAT»

9. ¿Jamüsü maka aka saaʼin wojuyaala tü waainjalakat?

⁹ Wanaa sümaa nikirajüin Jesuu na nikirajüinkana sünain oʼuraajaa, müshi nia: «Moto paaʼin tü wojuyaalakat». Shiasaʼa soʼu wanee kaʼi, «anakaja motüle paaʼin tü waainjalakat», müshi nia (Mat. 6:12, TNM; Luc. 11:4). Makaʼa nünüiki Jesuu shia süka müin tü waainjalakat maʼaka saaʼin wojuyaala. Soʼu juyakat 1952, aküjünüsü suluʼu tü rewiisütakat Aapiria Wayuu, alinjachin wapüla Maleiwa sümaa woonooinjanain sümaa nünüiki. Shiasaʼa kaainjarale waya, müshii nnojoliikai wawalaajüin tü wojuyaalakat nuulia Maleiwa. Kojuyaalashii waya nuulia Maleiwa saaʼujee kaainjalain waya. Makalaka eein süpüla nuuʼulaain Jeʼwaa suulia aleewaa wamaa. Anuu süpüshi sünüiki tü rewiisütakat: «Kaainjalakaʼa wayuu shia sutuma maalin Maleiwa napüla» (1 Juan 5:3).

10. (1) ¿Jamüsü nülatitka Jeʼwaa sooʼopünaa naaʼin tü waainjalakat? (2) ¿Jamüsü paaʼin sutuma tü naainjakat Jeʼwaa püpüleerua?

¹⁰ Choʼujaasia motuinjatüin naaʼin Jeʼwaa weinshi tü waainjalakat. Nülatitpajaʼa shia sooʼopünaa naaʼin saaʼujee naapajiraain nikii Jesuu waaʼu. Alüʼütsü süpüla shikeraajüin 2.000 juya süchikijee tia. Waapüinjatü analuʼut nümüin Jeʼwaa saaʼujee tia. Nnojoliishiijeʼe taashin waya suulia kaainjalaa jee ouktaa, nnojoire naapajiraain nikii Jesuu waaʼu (paashajeʼera Salmo 49:7-9 otta 1 Pedro 1:18, 19). Wayaawata aaʼu choʼujaain namüin na wawalayuukana sülatinnüinjatüin naainjala noulia saaʼujee tü pütchikat «anakaja motüle paaʼin tü waainjalakat». Keeʼireesü naaʼin Jeʼwaa wakaaliinjain na wawalayuukana süpüla anainjatüin nakuwaʼipa nümaa. Jamüshiijaʼa kaainjarale naya woulia, walatireein sooʼopünaa waaʼin tü naainjalakat wamüin. Eesü nnojorüle mojuin maʼin tü naainjakat wamüin. Motule waaʼin naainjala na wawalayuukana, weeʼiyateerü sünain alin naya wapüla jee weeʼiyateerü sünain waapüin analuʼut nümüin Jeʼwaa saaʼu motuin naaʼin tü waainjalakat (Col. 3:13).

11. ¿Jamüsü motuinjatka waaʼin naainjala na wawalayuukana?

¹¹ Eesüjaʼa kapüleere wamüin motuin waaʼin naainjala wanee wawala. Makaʼa kapüleein shia wamüin shia süka kaainjaraliin waya (Lev. 19:18). Waküjataarüle nümüin wanee wawala tü aainjünakat waka, aneerü nünüiki wamüin jee mojujiraajeechi nia nümaa chi wawala kaainjalakai woulia. Shiasaʼa suluʼujee tia, nnojoleena paaʼinwain na wawalayuukana. Nnojorüle wachajaain sukuwaʼipa süpüla wanoukteʼerüin tia, mojutsat mata wamüin naapajiraain nikii Jesuu waaʼu (Mat. 18:35). Nnojorüle motuin waaʼin naainjala na wawalayuukana, nnojoleerü nülatirüin Jeʼwaa sooʼopünaa naaʼin tü waainjalakat (paashajeʼera Mateo 6:14, 15). Wanee kasa jülüjeeka maʼin waaʼin süpüla joo motuin naaʼin Jeʼwaa tü waainjalakat shia nnojoluinjatüin waaʼinrüin tü kasa yarüttüsükat (1 Juan 3:4, 6).

«NNOJO PIYÜÜLAJÜIN WAYA SÜPÜLA OOʼULAKÜNAA AAʼIN»

12, 13. (1) ¿Kasa alataka nümüin Jesuu süchikijee woutiisain nia? (2) Waainjüle tü kasa mojusü ooʼulakünakalü aka waaʼin, ¿jamüsü nnojoluinjatka weʼitaain naaʼu na waneeinnua sünain nayain kasirüin tia? (3) ¿Kasa niiʼiyataka Jesuu sükajee noonooin waneepia nümaa Maleiwa?

¹² Anuu süpüshi nünüiki Jesuu wanaa sümaa niʼiküin na nikirajüinkana sünain oʼuraajaa: «Nnojo piyüülajüin waya süpüla ooʼulakünaa aaʼin». Sutuma pütchikat tüü, sotojoosü waaʼin tü alatakat nümüin Jesuu süchikijee woutiisain nia. Nuuʼulaain nia Jeʼwaa «süpüla nuuʼulakünüin aaʼin nütüma Satanás» (Mat. 4:1; 6:13). ¿Jamüshi nuuʼulaaka Jeʼwaa nuuʼulakünüin aaʼin Jesuu? Shia süpüla sütüjaanüinjatüin aaʼu shiimainre tü nümakat Satanaa wanaa sümaa niyouktünüin Jeʼwaa nutuma Adán sümaa Eva süpüla niainjachin aluwataain naaʼu. Naashin Satanaa, nnojotsü anain sukuwaʼipa süpüshuaʼa tü kasa naainjakat Jeʼwaa nukumajaiwaʼaya na wayuukana. Nuuʼulakünüle aaʼin wanee wayuu jaʼitaichi anain maʼin nia, akatalaajeechi nuulia Maleiwa naashin Satanaa. Akaʼaya naluwanaajiraale na wayuukana saaʼu nakuwaʼipa namüiwaʼa, anaʼleejeeria maʼin nakuwaʼipa naashin chi Yolujaakai (Gén. 3:4, 5). Ayatapajaʼa Jesuu waneepiain nümaa Jeʼwaa mayaapejeʼe nuuʼulakünüin aaʼin. Sükajee tia, niiʼiyatüin sünain alawaain tü nümakat Satanaa. Alüʼütsü maʼin süpüla natüjaain saaʼu napüshuaʼa na chakana iipünaa jee na yaakana Mmapaʼa niain neʼe Jeʼwaa anaka süpüla aluwatawaa. Otta taasia, atüjaaneerü aaʼu alaain Satanaa.

¹³ Maainjalasai Jeʼwaa, müshijeseʼe nnojolin nuuʼulaküin saaʼin wayuu sükajee kasa mojusü. Nia müle Satanaa ooʼulakaka waaʼin (Mat. 4:3). Wayapejeʼe neʼe atüjaaka saaʼu müleka eejiraainjanale waya sümaa tü ooʼulakünakalü aka waaʼin jee waaʼinrüinjanale tü mojusü ooʼulakünakalü aka waaʼin (paashajeʼera Santiago 1:13-15). Wanaa sümaa nuuʼulakünüin aaʼin Jesuu nutuma Satanaa, niyouktamaatüin tü ooʼulakünakalü aka naaʼin jee nüküjüin jamüin sünüiki tü karaloukta nüchikimaajatkat Maleiwa. Eejiraashi Jesuu sümaa tia ooʼulakünakalü aka naaʼin süpüla ayatüinjachin nia jüüjüüin nümüin Jeʼwaa. Mayaainjeʼe nuʼunüin chi Yolujaakai nümaʼanajee Jesuu, aleʼejüshi nia nüchikuaʼa soʼu «wane kaʼi nüchekakat oʼu» (Luc. 4:13). Oonooshiaʼaya Jesuu waneepia nümaa Maleiwa. Sükajee müin nukuwaʼipa, niiʼiyatüin eein süpüla jüüjüüin wanee wayuu nümüin Maleiwa jaʼitaichi müliain nia atumawaa. Maaʼulu yaa, nuuʼulaküin waaʼin Satanaa süpüla nnojoliinjanain woonooin nümaa Jeʼwaa.

14. ¿Kasa waaʼinrüinjatka süpüla eejiraain waya sümaa tü ooʼulakünakalü aka waaʼin?

¹⁴ Choʼujaayülia süpüla sütüjaanaleein saaʼu alawaain tü nümakat Satanaa. Nuuʼulaainjeseʼe Jeʼwaa nuuʼulaküin waaʼin Satanaa. Nnojoipejeʼe niain Jeʼwaa ooʼulaküin waaʼin. Nütüjaa aaʼu Jeʼwaa waaʼinreerüin tü kasa anasükat jee nükaaliinjain waya süpüla wountüin tia. Akaʼaya nia, nnojotsü nüpüleeruaain waaʼin süpüla woonooinjanain sümaa nünüiki, nuuʼulaain wayain aneeküin woonooinjanale jee nnojoluinjanale woonooin nümaa. ¿Kasaka waaʼinrüinjatüin süpüla eejiraain waya sümaa tü ooʼulakünakalü aka waaʼin? Aleewainjana maʼin waya nümaa Jeʼwaa sümaa wachuntüin kaaliinwaa waneepia nümüin. Wekirajaa sünain tü naaʼinrakat Jeʼwaa wanaa sümaa wachuntüin kaaliinwaa nümüin.

15, 16. (1) Püküja waneeirua kasa eejiraainjanaka amaa waya (2) ¿Jaraiche maʼin kasitka naainjüle wayuu wanee kasa mojusü?

¹⁵ Nükaaliinjain waya Jeʼwaa nükajee chi naaʼinkai süpüla eejiraain waya sümaa tü nuuʼulakakalü aka waaʼin Satanaa. Nükaaliinjainya waya Jeʼwaa sükajee tü Wiwüliakat jee nakajee na wawalayuukana. Jamüshijaʼa Jeʼwaa, nüchiaain waya suulia washaittajaain süka tü nneetkat sümaa ouktiraain waya sünain aʼyatawaa süpüleerua ayaʼlajaa wanee kasa nnojotka choʼujaain wamüin. Eejachinka wanee wawala Espen nünülia otta Janne sünülia nuʼwayuuse. Chajana naya kepiain Europa, suluʼu wanee mma eere wainmain na washinnuukana. Kakalia naya sünain aküjaa pütchi eere paliʼirüin na wawalayuukana. Pürekutsootpuʼushii naya. Kapüleeitpa namüin pürekutsooliin naya maaʼulu süka piamainnapain nachonnii. Anuu nünüiki Espen: «Wachuntawalin kaaliinwaa nümüin Jeʼwaa süpüla nnojoluinjatüin waaʼinrüin wanee kasa mojusü ooʼulakünaka aka waaʼin. Wachuntüinya kaaliinwaa nümüin süpüla anainjatüin wakuwaʼipa nümaa jee süpüla talatüinjatüin waaʼin sünain aküjaa pütchi».

¹⁶ Wanee kasa eejiraainjanaka amaa waya shia suchuntaale waaʼin anajaa shiyaakua wayuu maichesat amaʼüjiraaka sukuwaʼipa. Wanajüle tia, «nia kasitka Satanaa otta na manoujainsaliikana», nnojoishii müinjanain waya, süka jamüin, waya neʼe wamüiwaʼa aneekaka tü waaʼinrajatkat. Eeshii na anajakana shiyaakua wayuu maichesat amaʼüjiraaka sukuwaʼipa süka jülüjakuʼu müin shia naaʼin paala. Wainmapejeʼe na wawalayuu ayouktajaakana sümaa tia kasa mojusükat. Akaʼaya wayakana, wounteerü eejiraain waya sümaa tia kasa mojusükat (1 Cor. 10:12, 13).

«ANASÜJE MÜLEKA PUʼTTEʼERÜLE WAYA NUULIA CHI KAMAʼÜRAIKAI»

17. (1) ¿Kasa nnojoluinjatka waaʼinrüin süpüla naaʼinmajüinjanain waya Jeʼwaa? (2) ¿Kasa naaʼinrajatka Jeʼwaa soʼu palit kaʼi?

¹⁷ «Anasüje müleka puʼtteʼerüle waya nuulia chi Kamaʼüraikai», wamüle nümüin Jeʼwaa, shia wachuntaka nümüin naaʼinmajüin waya nuulia Satanaa. Süka keeʼireein waaʼin naaʼinmajüin waya Jeʼwaa, nnojotsü wanaawain waaʼin namaa na manoujainsaliikana jee nnojotsü keejiain wamüin «tü kasa mojusü naaʼinrakat» (Juan 15:19; 1 Juan 2:15-17). Alüʼütsü maʼin nükalia Satanaa süpüla nüsürülüinjachin nia Jeʼwaa sümaa najaʼttiraleein süpüshuaʼa tü kasa nuluwataakalü aaʼu. Jashichishaatashi maʼin Satanaa süka nnojoluin jeʼrain kaʼi apütaaka nüpüla. Nüchajaainjeseʼe maʼin sukuwaʼipa süpüla wooʼulaainjanain suulia aʼyatawaa nümüin Jeʼwaa. Ayatüinjanapajaʼaya waya sünain achuntaa nümüin Maleiwa süpüla naaʼinmajüin waya nuulia Satanaa (Alat. Map. 12:12, 17).

18. ¿Kasa waaʼinrajatka suluʼuweere waya tü mma jeketkat?

¹⁸ Suluʼuweere waya tü mma jeketkat eere nnojoleechin Satanaa, waaʼinrüinjatü tü nümakat Jesuu wanaa sümaa niʼiküin na nikirajüinkana sünain oʼuraajaa. Wachuntüinjatü nümüin Jeʼwaa süpüla nüntirüinjatüin tü Nuluwataayakat, süpüla wuleinjatüin nutuma tü nünüliakat jee süpüla saainjünüinjatüin tü keeʼireekat naaʼin yaa Mmapaʼa. Weʼitaa waaʼin sünain naapeerüin Jeʼwaa wamüin weinshi tü kasa choʼujaakat wamüin jee nükaaliinjeenain waya süpüla ayatüin waya jüüjüüin nümüin.