PÜTCHI SÜNAINKA SÜTA TÜ REWIISÜTAKAT
Asakinnaka anain nachiki na kepiakana chaa iipünaa
¿Eeiria püsakirüin anain kasain eein chaa iipünaa otta jaraliin chain kepiain? Wainma wayuu asakitkana süchiirua tia makat. Watta saalii süküjala wayuu süchiki tia. Eeshii eekai nanoujain nayain na natuushinuu ouktakana chain chaa iipünaa otta kojutüinjana atumawaa naashin. Eeshii eekai jülüjain aaʼin nayain kepiain iipünaa na aapieekana jee na wayuu anamia ouktüinnapakana jee jimatuuisü chayaa naashin. Jee müsia naküjala waneeinnua, naya chakana kepiain chaa iipünaa na maleiwayaashiikana.
Saashin wainma wayuu, nnojotsü süpüla watüjaain saaʼu kasain eein chaa iipünaa süka nnojoluin weʼrüichin wanee wayuu ashakataka chejee süpüla nüküjüin wamüin kasain eein chayaa. Nnojotpejeʼe shiimain tia. Chajachi Jesuu kepiain iipünaa süpülapünaa nüntüin yaa mmapaʼamüin. Müshi nia namüin nekiipüʼü na fariseokana: «Ashakatüshi taya yaamüin chajee iipünaajee süpüla taaʼinrüinjatüin tü talatakat atüma naaʼin Maleiwa chi kajünalakai taya, nnojotsü shiain süpüla tü talatakat atüma neʼe taaʼin tayakai tamüiwa». Süchikijee, nümaka Jesuu namüin na aluwataaushiikana: «Chaa eere kepiain chi Tashikai, wainma maʼi paü» (Juan 6:38; 14:2).
Chi Nüshikai Jesuu nia Maleiwa, Jeʼwaa nünülia otta chashi nia kepiain iipünaa (Salmo 83:18). Sutuma tia, nia neʼe Jeʼwaa nümaa Jesuu pansaaka anüikii wamüin süchiki tü kasa chakat iipünaa. Neeʼiyatüin wamüin tü kasa eekat chaa iipünaa sükajee tü neʼrakat noʼutku na aʼyataapuʼukana nümüin Jeʼwaa sümaiwa.
Sünain tü wanee ekirajaayakat, wekirajaajeerü anain waneeirua pütchi suluʼujee tü Wiwüliakat aküjaka jaraliin na wayuu eʼrakana tü kasairua chakat iipünaa. Pikirajaapa sünain tü neʼrakat naya wayuukana, soteesü paaʼin meʼrujuin shia. Sutuma nnojoluin wayaawatüin saaʼu tü kasairua chakat iipünaa, niiʼiyatüin shia Jeʼwaa namüin waneeinnua wayuu aʼyataapuʼukana nümüin, niiʼiyatüin shia namüin sükajee tü kasairua weʼraajakat süpüla wayaawatüin saaʼu. Wekirajaale sünain tia, watüjaajeerü aaʼu jaraliin kepiain suluʼu tü «paü» chakat iipünaa.