Kojutusü nümüin Jeʼwaa «amén» wamüle
KOJUTUSÜ nümüin Jeʼwaa tü waaʼinrakat süpüla waʼwaajüin nia. Jülüjashii waya naaʼin jee naapüin wanüiki. Kojutusü nümüin tü waaʼinrakat, jaʼitasü müin malaacheinkai saaʼin (Mal. 3:16). ¿Kojutusüche nümüin Jeʼwaa «amén» wamüle? Aa, kojutusü nümüin, jaʼitairü waküjain shia kojuyatua. Süpüla watüjaain saaʼu jamüin kojutuka shia nümüin Jeʼwaa, wekirajaa palajana sünain jamaluʼuluin tia pütchikat otta jamüin sünüiki tü Wiwüliakat süchiki.
«‹¡AMÉN!›, MÜINJANA NAPÜSHUAʼA NA WAYUUKANA»
Tü pütchikalü amén wayuunaikiruʼu «shiimain tia, kasataalejeseʼe shikeraajüin» maluʼulu. «Amén», mapuʼushii na wayuukana nanouteʼerüinjatpa sukuwaʼipa wanee kasa. Süchikijee naapüin nünüiki wanee wayuu, «amén» müshi nia süpüla niiʼiyatüin sünain naainjeerüin tü nümakat (Núm. 5:22). Shiasaʼa «amén» nümüle suʼupala wayuu, niiʼiyatüin sünain nikeraajeerüin tü nümakat (Neh. 5:13).
Suluʼu Deuteronomio, kapiitulo 27, ashajünüsü kojuyatua tü pütchikalü amén. Süchikijee nantüin na israeliitakana suluʼumüin tü Mma Aapünakat namüin, outkajaashii naya peje sünain tü utaikat Ebal otta Guerizim süpüla naapajüin tü nuluwataakalü anain Jeʼwaa otta süpüla naküjain naaʼinrüinjatüin tia. Süküjünapa namüin tü kasa eejeetkat sünainjee nnojoluin noonooin sümaa tü aluwataanakalü anain, «amén» müshii naya (Deut. 27:15-26). Soʼu tia, emetutsü maʼin nanüiki na tooloyuukana, na jieyuukana jee na tepichikana (Jos. 8:30-35). Nnojotsüjaʼa motuin naaʼin tü namakat soʼu tia. Watüjaa aaʼu nekeraajüin tü namakat süka sümüin tü Wiwüliakat: «Ayatüshiʼiya aʼyataain nümüin Jeʼwaa na israeliitakana nükalioʼu Josué jee nakalioʼu na laülaashii eejanakana nüchikumüin Josué, na eʼrakana süpüshuaʼa tü kasa naaʼinrakat Jeʼwaa napüleerua na israeliitakana» (Jos. 24:31).
«Amén» müshi Jesuu süpüla sütüjaain aaʼu wayuu shiimain tü nümakat. Naatapejeʼe sukuwaʼipa nutuma. Nnojoishi «amén» müin nia süchikijee nünüiki wanee wayuu. «Amén», müshi nia süpülapünaa nüküjain wanee kasa süpüla sütüjaanüin aaʼu shiimain tü nümakat. Tü aküjüneekalü achiki yaʼayaa, shia shiimain tü aküjünakat. Nuʼttule Jesuu sünain aashajawaa, eeshi «amén, amén», nümüle piantua (Mat. 5:18; Juan 1:51). Makaʼa sukuwaʼipa nutuma Jesuu, shia süpüla niiʼiyatüin sünain shiimainshaatain tü nümakat. Nia neʼe Jesuu aaʼinraka tia süka niain aneekünüin süpüla nikeraajüin süpüshuaʼa tü nüküjakalü achiki Maleiwa paala (2 Cor. 1:20; Alat. Map. 3:14).
«‹¡AMÉN!›, MÜSHII NAPÜSHUAʼA NA WAYUUKANA JEE NAʼWAAJÜIN JEʼWAA»
Soʼu naʼwaajüin Jeʼwaa na israeliitakana jee noʼuraajüin nümüin, «amén» müshii naya (Neh. 8:6; Sal. 41:13). «Amén» namüle na jutkatüshiikana, anasü namüin tü achuntunakat otta talatüsü naaʼin sünain aʼwaajaa Jeʼwaa. Müsia tü naaʼinrakat na israeliitakana wanaa sümaa niʼikajaain David tü Jurasükeetkat chaa Jerusalénmüin. Süchikijee tia, nüshajüin tü nuchuntakat nümüin Maleiwa jee shiiʼirajünaka maʼaka süküjünüin suluʼu 1 Crónicas 16:8-36. Anasü maʼin tü nümakat David, makalaka «‹¡amén!›, [namüin] napüshuaʼa na wayuukana jee naʼwaajüin Jeʼwaa». Sükajee müin nanüiki napüshuaʼa, talatüshii maʼin naya.
Akaʼaya na anoujashii eejanakana nükalioʼu Jesuu, «amén» müshii naya wanaa sümaa naʼwaajüin Jeʼwaa. Jee müshiʼiya noʼutku na ashajakana tü Wiwüliakat, nashajüin tü pütchikat «amén» (Roma 1:25, TNM; 16:27; 1 Ped. 4:11). Suluʼu tü karaloʼutakat Alateetkat Mapeena ashajünüsü nachiki waneinnua aapiee, «Amén, [...] anakaja waʼwaajüle pia», makana sünain aʼwaajaa Jeʼwaa (Alat. Map. 19:1, 4). Na anoujashiikana nükalioʼu Jesuu, «amén» müshii naya noʼuraajapa sünain tü outkajawaakat (1 Cor. 14:16). Nnojoliipejeʼe «amén» müinjanain neʼe naya süpaʼa mma.
¿JAMÜSÜ KOJUTUINJATKA WAMÜIN «AMÉN» WAMÜLE?
Sünainjee tü wekirajaaitpakalü anain, watüjaaitpa aaʼu kojutuinjatüin wamüin «amén» wamüle woʼuraajapa. Müle shia watuma, shiimain maʼin tü wamakat. Akaʼaya «amén» wamüle suluʼu waaʼin jee emeturüle wanüiki nuʼuraajapa wanee wawala, anasü wamüin tü nuchuntakat. Wekirajaa sooʼomüin süchiki jamüin kojutuinjatka wamüin «amén» wamüle.
Süka jülüjain waaʼin tü achuntunakat soʼu waʼwaajüin Jeʼwaa. Nnojoishi waʼwaajüin neʼe Jeʼwaa sükajee «amén» wamüin, waʼwaajüin nia sükajee kojutuin wamüin tü achuntunakat. «Amén» meena waya kojutule wamüin jee jülüjale waaʼin tü aküjünakat.
Süka paaʼinwajiraain waya namaa na wawalayuukana. Soʼu nuʼuraajüin wanee wawala, jülüjasü waaʼin wapüshuaʼa tü nuchuntakat (Aluw. 1:14, TNM; 12:5). Paaʼinwajiraashii waya «amén» wamüle wanaajiraa namaa na wawalayuukana. «Pikeraaja wamüin tü achuntunakat», müshii wamakai aaʼin nümüin Jeʼwaa «amén» wamüle suluʼu waaʼin jee emeturüle wanüiki.
«Amén» wamüle, waʼwaajüin Jeʼwaa.
Süka waʼwaajüin Jeʼwaa. Niʼrüin süpüshuaʼa tü kasa waaʼinrakat süpüla waʼwaajüin nia, jaʼitasü müin malaacheinkai saaʼin (Luc. 21:2, 3). Nütüjaa aaʼu tü suluʼukat waaʼin otta jamüin waaʼinreekat sümüin wanee kasa. Akaʼaya waapajüle tü outkajawaakat suluʼupünaa teleepono, naapüin wanüiki «amén» wamüle. «Amén» wamüle, waʼwaajüin Jeʼwaa wanaajiraa namaa na wawalayuukana.
Nnojotsü ashaitaain «amén» wamüle. Müleka «amén» wamüle saashin tü karaloʼutakat Perspicacia, «wanouja anainrü tü münakat, anasü wamüin tü achuntunakat otta waʼatapajüin shikeraajeerüin». Talateerü naaʼin Jeʼwaa watuma «amén» wamüle (Sal. 19:14).