¿Yapashii waya süpüla tü eküülü nümaʼanajeejatkat Maleiwa?
1. ¿Kasa choʼujaaka süpüla aʼlakajawaa wanee eküülü?
1 Wainma aʼyatawaa sünain aʼlakajawaa wanee eküülü, achajaanajatü tü saʼakainjatkat süpüla jemetüin, aʼlakajaanajatü, eitajünajatü shia, keraainjatü watuma tü piichikat, tü meesakat otta waneeirua kasa. Müshiia na ounejaanüshiikana sünain ekaa yapainjana maalü, tia sünainpünaasü noʼunüinjanale wattamüin. Wainma aʼyatawaa sünainpünaaka, akatsaʼa ¿nnojotsü anain ekaa wanee eküülü jemetüsü namaa na wapüshikana otta na waʼaleewainkana? Alüʼütsü süpüla noutkajaain sainküin mma na aküjüliikana pütchi nüchiki Jeowa süpüla ekaa tü eküülü nümaʼanajeejatkat Maleiwa sümaa wainmain otta palitchoin naya sünain tü Outkajawaa miyoʼu Apünüinkat kaʼi kanüliaka ‹[Ayata] eejüin jaaʼin›. Wainma aʼyatawaa sünain ekeraajaa tü pütchi ekirajaanajatkat anain otta waneeirua kasa choʼujaaka süpüla aainjaa tü outkajawaakat. Akanasaʼa wayakana süpüla woʼunüinjanain otta wekirajaainjanain maʼin sünain yapainjana waya waneʼewai wakua (Pro. 21:5).
2. ¿Kasa paaʼinrajatka süpüla piküinjatüin tü eküülü nümaʼanajeejatkat Maleiwa?
2 Wekirajaa maʼin sünain. ¿Pütüjaaitpa aaʼu tü paaʼinrajatkat süpüla piküinjatüin tü eküülü nümaʼanajeejatkat Maleiwa? Maʼaka choʼujaale, paashajaa nümaa chi pülaamainkai otta püchunta tü kaʼi choʼujaakat pümüin süpüla puʼunüin sünain tü outkajawaakat. ¿Pütüjaaitpa aaʼu tü puʼunüinjatkat aluʼu otta eeinjachire pütunküin? Na laülaashiikana jülüjüinjatü naaʼin nakaaliinjünüle na laülaayuukana, na ayuuishiikana otta wanee wawala choʼujaaka amüin akaaliinjünaa (Aluw. 20:28; Gal. 6:10).
3. ¿Jamüshii moʼunüinjanaka waya sünain wanee outkajawaa eere nantüin na wawalayuu naatakana oumain nnojoliire wounejaanüin?
3 Watüjaa aaʼu aainjüneerüin suluʼu waneeirua mma outkajawaa miyoʼu eere nantüinjanain wawalayuu naata oumain. Soto paaʼin süneeküin Weteet na wayuu keraakana sümaa tü piichi aainjünajatkat aluʼu tü outkajaaleekat otta tü atunküleekat. Müsüjeseʼe nayainjanain neʼe oʼunüin na wawalayuu naatakana oumain otta na wawalayuu aneekünakana süpüla oʼunaa. Noʼunüle wanee aküjülii pütchi nnojoliika ounejaanüin sünain outkajawaakat tia eeshii süpüla nalanaʼaleein na wayuu keraakana sümaa tü piichi aainjünakat aluʼu shia.
4. ¿Kasa akaaliinjeenaka waya süpüla yapainjanain süpüla tü wekirajaainjatkat anain soʼu tü apünüinkat kaʼi?
4 Yapa pia süpüla püntüin maalü soʼu tü apünüinkat kaʼi süpülapünaa suʼttüin tü outkajawaakat. Süpüla yapainjatüin tü paaʼinkat süpüla tü pikirajaainjatkat anain, paashajeʼera motsoʼo tü ekirajaanajatkat anain süpülapünaa suʼttüin tü outkajawaakat (Esd. 7:10). Suʼttapa tü muusikakat nutuma chi shikiipüʼükai tü outkajawaakat paapaja shia otta yapa pia süpüla eeʼirajaa otta oʼuraajaa.
5. ¿Kasa naaʼinrajatka na apüshiikana süpüla nekirajaainjanain maʼin sünain tü outkajawaakat?
5 Kottüle na apüshiikana sünain tü outkajawaakat, jülüjeerü naaʼin na tepichikana tü pütchi aküjünakat (Deu. 31:12). Jaashajeʼera suluʼujee tü Wiwüliakat tü pütchi achuntünakat, jüshajüle süpüshi tü pütchi aküjünakat jülüjeerü jaaʼin tü ekirajünakat anain, sükajee tia soteerü jaaʼin mapa tü jikirajaakat maʼin anain. Nnojo jaashajaain otta jütamaain neʼe sutuma wanee kasa suʼunnaa tü ekirajaanakat anain. Nnojo jümojujeʼerüin jukuwaʼipa otta nakuwaʼipa na waneeinnua sünain aapajaa tü pütchikat sükajee tü jüselulaatsekat. Sajaʼttapa wanee kaʼi, jaashajaa süchiki tü anakat jümüin sünainjee tü pütchi ekirajaanakat anain.
6. ¿Kasa anaka maʼin sünain tü outkajawaa miyoʼu apünüinkat kaʼi? ¿Kasa waaʼinrajatka süpüla anainjatüin maʼin wakuwaʼipa sutuma?
6 Eesü wanee kasa eeka süpüla waainjüin sünain tü outkajawaa miyoʼu apünüinkat kaʼi, shia tü aijirawaakat namaa na wawalayuukana wanee kasa nnojotka natüjaain aaʼu na manoujüinsaliikana (Sal. 133:1-3; Mar. 10:29, 30). Piʼraajiraa namaa na wawalayuu joyotokana püʼütpaʼa otta paashajaa namaa wanaa sümaa tü eemerawaakat kaleʼu. Sutuma tia anasü maʼin alüʼüjaa weküin sünain tü outkajawaakat suulia oʼunaa sünain ayaʼlajaa shia. Puʼuna sünain tü outkajawaakat süpüla pütütüleʼerüin paaʼin namaa na wawalayuukana (Rom. 1:11, 12).
7. ¿Kasa jülüjüinjatka waaʼin wanaa sümaa waneeküin tü washeʼinkat?
7 Waʼanaaya. Sümaiwa paala aluwataanüshii na israeliitakana nutuma Jeowa sünain neʼitaainjatüin sünain sot nasheʼin wanee jiirü wüittüsü (Núm. 15:37-41). Sutuma tia, sotusü naaʼin naneekünüin süpüla nayainjanain na anoujüshii shiimainshiikana. Müsia maaʼulu, walaüleʼerüle waaʼin sünain anain waʼanaaya sünain tü outkajawaakat naateena waya noulia na manoujüinsaliikana sutuma. Neʼrüin maʼin tia na wayuukana wanaa sümaa wojuʼitüin sünain ekaa süchikijee tü outkajawaakat. Makalaka anain maʼin waneekajüle tü kuluulu waʼatüinjatkat.
8. ¿Jamüsü süpüla waküjüin pütchi eeinjatüle saainjünüin tü outkajawaakat?
8 Aküjaa pütchi. Yapale waya eeshii süpüla waküjüin pütchi eeinjatüle saainjünüin tü outkajawaakat. Wanee wawala oʼunüshi sümaa nuʼwayuuse suluʼumüin wanee oikkaalee eküülü. Süpüla nuʼttüin sünain aashajawaa nümaa chi eʼikajüikai eküülü niiʼiyatüin tü karaloukta sümaajatka nünülia otta nüsakitka nia: «¿Piʼrüin wainma wayuu yaapünaa sümaa karalouktakat tüü?» «Aa» nümaka, akatsaʼa nnojotsü nütüjaain aaʼu kasapülajatüin shia. Naashajaaka motsoʼo chi wawalakai nümaa otta nuunejaka nia sünain tü outkajawaakat.
9. ¿Jamüsü süpüla waapüin tü analuʼutkat nümüin Jeowa?
9 Mayaapejeʼe nayain na wawalayuukana ekirajüin, asakirüin otta eeʼiyatüin tü waainjüinjatkat, nia Jeowa chi Washi iipünaajachikai ounejaka waya sünain ekaa tü eküülü naapakat wamüin juyawai (Isa. 65:13, 14). Waapeere tü analuʼutkat nümüin, oʼuneena waya soʼu tü apünüinsükat kaʼi sünain ekaa tü eküülü naapakat wamüin. ¿Yapainnapa waya süpüla tü eküülü nümaʼanajeejatkat Maleiwa?
[Ayaakuaa suluʼuka süpana: 8]
Tü sotuinjatkat waaʼin süpüla tü outkajawaa miyoʼu apünüinkat kaʼi
◼ Sükalia tü wekirajaainjatkat anain. Tü wekirajaainjatkat anain soʼu tü apünüinkat kaʼi oʼttajatü 9:20 watta maalü. Ojutanneerü tü soʼukot piichi 8:00 watta maalü. Süpüla anain suʼttia tü wekirajaainjatkat anain wachajaainjatü weinase suʼttapa tü muusikakat. Ajaʼtteerü tü outkajawaakat 4:55 aliika, soʼu tü palajatkat otta piamaka kaʼi, otta müsia soʼu tü apünüinkat kaʼi ajaʼtteerü 4:00 aliika. Tü ekirajaanajatkat anain sünain tü outkajawaakat miyoʼu eere nantüin na wawalayuu naatakana oumain oʼtteerü jueewoʼu 1:00 aliika otta ajaʼtteerü 4:55 aliika.
◼ Süpülee kemion otta wisiküleeta. Süka joʼuuchoin tü süpüleekat kemion otta wisiküleeta, eesü süpüla wainmain na antakana suluʼu wanee kemion.
◼ Einasee. Naya neʼe wakatalüinjanaka einase na antakana jee na kepiakana wamaa. Müle shia watuma, weeʼiyateerü kojutüin wamüin na wawalayuu laülaakana, na ayuuikana otta na eiwaʼaliikana outkajaain wamaa.
◼ Eküülü. Anasü walüʼüjüle weküin suulia oʼunaa sünain ayaʼlajaa wanaa weemeraain kaleʼu. Nnojotsü alüʼüjünüinjatüin sünain tü outkajawaakat wanee kaawa miyoʼu, maraaja otta yootshi. Eesü süpüla sülüʼujünüin wanee kaawa joʼuchon ekerotoko suupünaa tü einaseekat..
◼ Nneerü asülajünaka. Süpüla waapüin tü analuʼutkat saaʼu tü outkajawaakat miyoʼu, wasülaja süpüshi wanneetse süpüla aküjaa pütchi sainküin mma. Eesü süpüla waainjüin shia sünain tü outkajawaakat jee suluʼu tü Piichi Outkajaaleekat.
◼ Eewawaa otta ayuuijawaa. Wanaa sümaa eein eewawaa otta ayuuijawaa sünain tü outkajawaakat, püküja süchiki nümüin wanee jülüjaka aaʼin na antakana eeka pejein süpüla naapirüin na Akaaliinjakana eeka Ayuulin. Süpüla neʼrajaainjatüin shia na atüjakana süpüleerua.
◼ Asapaatsee. Wainma wayuu eewaaka juyawai sutuma nasapaatse. Anasü jüneeküle sapaata eeka nnojoluin yaletüin, süpüla nnojoluin jeewaain wanaa sümaa waraittüin jia.
◼ Wayuu macheʼeka. Sünain waneeirua outkajawaa alatinneerü tü ekirajaanajatkat anain suluʼu raawia (FM). Saainjünüinjatüle tia, aküjüneerü soʼu tü palajatkat kaʼi. Süpüla tia, choʼujaasü wanee raawiachon kanainka autiipono.
◼ Akürawaajia: Nnojotsü eʼitaanajatüin wanee akürawaajia sünain tü raawia alatinnakat aka tü pütchikat sünain tü outkajawaakat. Mojule nakuwaʼipa na waneeinnua sünain aapajaa, nnojotsü eʼitaanajatüin.
◼ Neʼejena na joʼuukana. Nnojotsü alüʼüjünüinjatüin tia sünain tü outkajawaakat. Akatsaʼa, eesü süpüla sülüʼüjünüin tü neinase eʼitaanakat naʼütpaʼa na nashikana.
◼ Tü karalouktakalüirua Sírvase visitar. Pipiraja tü karalouktakat Sírvase visitar (S-43) süka nanülia waneʼewai nakua na wayuu ekirajaweekana sünain tü Wiwüliakat wanaa sümaa püküjüin pütchi suʼunnaa tü outkajawaakat. Anasü nalüʼüjüle na aküjüliikana pütchi wanee jee piamasü karalouktakat tüü sünain tü outkajawaakat. Eesü süpüla saapünüin tü karalouktakat nümüin chi seküretaariokai suluʼu tü outkajaaleekat (paashajeʼera Waʼyataain nümüin Maleiwa ojuʼitaka pewüreeroʼu 2005, süpana 6).
◼ Atunkülee. Eere süpüla waapüin atunkülee, waashajaa nümaa chi seküretaariokai suluʼu tü outkajaaleekat otta wepiraja tü karaloukta sümaajatkat. Woʼunüinjanale sünain wanee outkajawaa eeka wattain suulia wepia otta choʼujaasü eeinjanale watunküin, waashajaa nümaa chi seküretaariokai, wepiraja tü karaloukta süpülajatkat tia otta waapa shia nümüin chi wawalakai süpüla nuluwataain shia eeinjatüle saainjünüin tü outkajawaakat. Nnojo paainjüin tia sülüʼütpa maʼin tü outkajawaakat süka sümojujeʼereerüin sukuwaʼipa naʼyataain na wawalayuu achajaakana atunkülee (1 Cor. 14:40). Na wawalayuukana otta na nachonnii aapünakana amüin atunkülee, kojutüinjatü namüin nepia na wawalayuukana nnojoluinjatü namojujeʼerüin tü korolo namaʼanakat nnojoluinjana ekerotüin eere natunküin na kepiakana tü piichikat. Tü atunküleekat süpülajatü neʼe tü kaʼi eeinjatkat oʼu tü outkajawaakat. Nnojotsü anain makatüle waya kojuya kaʼi süchikijee tü outkajawaakat süpüla eʼraajaa tü kasa anakat maʼin eere saainjünüin tü outkajawaakat jee süpüla aaʼinraa waneeirua kasa.