Tü ekirajünajatkat anain na aküjüliikana pütchi
1. ¿Kasa oʼttaka soʼujee 1938? ¿Kasapülajatü tia?
1 Soʼu juyaka 1938, na wayuu nuʼunirakana Jeowa süka tü nütchinkat oʼttüshii sünain naaʼinrüin tü outkajawaa miyoʼu piamakat kaʼi süpüla noutkajaainjanain wainma wawalayuu. ¿Kasapülajatü tia? Tü karalouktakat Informador, tü kanüliakat Waʼyataain Nümüin Maleiwa, ojuʼitaka eneeroʼu, soʼu 1939 (suluʼu inkülee) müsü sünüiki süchiki tia: «Namaʼaleʼeya na wayuu Nuʼunirakana Jeowa süka tü nütchinkat süpüla aküjaa süchiki Nuluwataaya, eesü tü outkajawaa miyoʼu piamakat kaʼi. Tü ekirajünakat sünain choʼujaasü namüin na aneekana atuma sukuwaʼipa tü aʼyatawaa ajütünakat anain naya». Soʼu tü juyakat 1938 eejana 58.000 aküjülii pütchi otta soʼu 2009 kooʼomüinshii naya, alatüshi suulia 7.000.000. Jaʼyasü shikeraajüin tü aainjünakat apüla outkajawaakat tia, sükaaliinjüin na aküjüliikana pütchi sünain «tü aʼyatawaa ajütünakat anain naya».
2. ¿Kaseerü wekirajaaka anain sünain tü outkajawaa miyoʼu piamakat kaʼi soʼujee settienpüroʼu?
2 Sünüliainjatka. Waʼatapajüin maʼin tü ekirajaanajatkat anain soʼujee settienpüroʼu sümaʼaleʼeya watütüleʼennüin aaʼin natuma na wawalayuukana. Sünainjeejatü Juan 15:19 tü sünüliakat: «Nnojoishii wanaawain jia namaa [na manoujüinsaliikana]». ¿Kaseerü ekirajaanaka sünain? Ekirajaaneerü anain saawanoʼu jamüin waaʼinmajia sutuma waʼyataain waneepia nümüin Jeowa. Otta eejeerü apünüinsü pütchi aashajaainjatka süchiki nnojoluinjanain sünainpünaain waya «tü mürüt kashüülasükat», «tü jierü maaʼinsatkat» otta «na oikkaaliikana sainküinjee mma». Aküjüneerü wamüin rimiinkoʼu kojuyasü pütchi alinjachika atuma wapüla Jeowa noulia na manoujüinsaliikana. Süpüshi tü kasa wekirajaainjatkat anain shia nnojoluin nanainpünaainjanain waya manoujüinsaliikana süka naʼakain waya wayuu naataka woulia otta yalayalainjana waya süpüla wayamülüin na manoujüinsaliikana.
3. ¿Jameerü wakuwaʼipa woʼunüle sünain tü outkajawaa miyoʼu piamakat kaʼi?
3 Wanee wawala eemiajaaka anoula, shiyaawata aaʼu choʼujaain süsakireʼerüinjatüin saaʼin sünain tü kasa saaʼinrakat süpüla «sujuʼitüin sünain aküjaa pütchi otta nnojoluin saaʼinrayaainjatüin wanee kasa naata suulia». Saainjüin tia, süka chajatüin shia jekenainka sünain wanee outkajawaa miyoʼu piamaka kaʼi. Shiimain sükaaliinjeenain waya tü wekirajaainjatkat anain sünain tü outkajawaa miyoʼu piamakat kaʼi süpüla weeʼiyatüin alin wapüla Jeowa noulia na manoujüinsaliikana (1 Juan 2:15-17). Püchajaa sukuwaʼipa süpüla chainjachin pia sünain otta jülüja paaʼin tü ekirajünajatkat anain na aküjüliikana pütchi.