Eeshi süpüla püküjüin pütchi eepünaale pia

1. (1) ¿Kasa wayuu tü aküjaakat pütchi eepünaale wayuu? (2) Naʼakajee na yaakana jutkatüin, ¿jeʼrashii na anoujakana sutuma süküjünüin pütchi namüin eepünaale naya?

¹ Naʼakajee na anoujakana eere puutkajaain, ¿jeʼrashii na anoujakana sutuma süküjünüin pütchi namüin eepünaale naya? Watta naaliin. ¿Kasa wayuu tü aküjaakat pütchi eepünaale wayuu? Shia aashajawaa namaa na wayuukana süchiki tü pütchi anasükat eepünaale naya wapüla: suluʼu koleejiaa, sünain aʼyatawaa, ayaʼlajaa, oʼunajawaa, wawaraijaapa saaʼu wapüshi, na kepiakana waʼütpaʼa otta waneeirua kasa eeka waainjüin. Naʼakajee waneeinnua wawalayuu, alanaʼaleeka suulia 200, eeshii maʼaka 80 atüjaaka saaʼu tü shiimainkat sutuma süküjünüin namüin pütchi eepünaajanale naya. Shiiʼiyatüin tia anain maʼin waküjüle pütchi eepünaale waya.

2. ¿Jaralii na aküjawaipuʼukana pütchi eepünaale naya saashin tü Wiwüliakat?

² Aküjawaishii pütchi na nikirajüinkana Jesuu eepünaale naya. Jamüshijaʼa Jesuu wanaa sümaa nülatapünaain Samaria, aküjüshi pütchi sümüin wanee jierü ajaʼitüsü wüin suluʼujee nüsüle Jacob (Juan 4:6-26). Müsü nünüiki Felipe nümüin wanee wayuu chejeʼewai Etiopía, aashajeʼerakai tü karaloukta nüshajakat Isaías: «¿Eesüya piyaawata aaʼu türa paashajeʼetkat?» (Aluw. 8:26-38). Wanaa sümaa püreesain Pablo chayaa Filipos, aküjüshi nia pütchi nümüin chi kaatsetpüʼükai (Aluw. 16:23-34). Otta «kapülawaisü naaʼin süpüshuaʼa tü eekai suwaraijaain naaʼu» wanaa sümaa püreesain nia otta «aküjashi süchikü tü nükuaippakat Maleiwa sünain aluwatawaa otta ekirajüshi nia nooʼopünaa chi Senyotkai Jesucristo» (Aluw. 28:​30, 31). Nainküle shia nayakana, püinkeerü shia jaʼitaichi japüleʼein pia. ¿Jamüinjatü sukuwaʼipa putuma?

3. ¿Kasa waaʼinrajatka süpüla nnojoluin japülin waya?

³ Tü puʼttüinjatkat aka. Kapüleesü wamüin aashajawaa sümaa wayuu nnojotka weʼraajüin. Jaʼitaichi niain wanee weʼraajüin, eeshii süpüla mmoluin waya seema aküjaa pütchi nümüin. Akatsaʼa, keeʼireejeerü waaʼin aküjaa pütchi wasakireʼerüle waaʼin sünain anamiain Jeowa, tü korolo kojutüsü naapakat wamüin otta sünain mojuin nakuwaʼipa na wayuukana (Jon. 4:11; Sal. 40:5; Mat. 13:52). Otta müsia, eesü süpüla wachuntüin nümüin Jeowa yalayalain waya nutuma (1 Tes. 2:2). Müsü nünüiki wanee ekirajaashi Galaad: «Isale tachiki aashajawaa namaa na wayuukana, anawaisü taaʼin toʼuraajüle nümüin Maleiwa». Mmorüle pia, puʼuraaja motsoʼo nümüin Maleiwa suluʼu paaʼin (Neh. 2:4).

4. ¿Kasa anaka süpüla waainjüin süpülapünaa waküjüin pütchi? ¿Jamüsü waaʼinrajatka shia?

⁴ Nnojotsü choʼujaain anainjatüin maʼin wanüiki otta waashajeʼerüinjatüin wanee pütchi suluʼujee tü Wiwüliakat süpüla waküjüin pütchi eepünaale waya. Shia anaka neʼe waashajaale namaa na wayuukana sümaa nnojoluin waküjamaatüin pütchi namüin. Naashin na wawalayuukana, anasü naaʼin süpüla aküjaa pütchi süchikijee naainjüin tia. Nnojorüle saashajaweein wanee wayuu nnojo püpüleeruain saaʼin. Püpütaa süpüla sümaa kamaneein pia.

5. ¿Kasa saainjaka wanee wawala süpüla süküjüin pütchi eepünaale shia?

⁵ Müsü tü saainjakat wanee wawala japüleʼe: shiyaʼlajaale, eirakaasü namüin na wayuukana otta akulemeraasü namüin. Nakulemeraale sümüin asouktüsü namüin otta nasouktüle shiʼipajee ayatüsia aashajaain namaa. Saapajüin tü nanüikikat otta shiyaawata aaʼu jaralüin tü pütchi anakat süpüla süküjüin namüin. Sutuma saainjüin tia, wainmairü karaloukta saapaka namüin na wayuukana otta oʼttüirü sünain ekirajaa wanee wayuu.

6. ¿Kasa waainjüinjatka süpülapünaa woʼttüin sünain aküjaa pütchi eepünaale waya?

⁶ Süpüla woʼttüin sünain aashajawaa. ¿Jamüinjatü wanüiki waashajaaiwaʼaya? Süpüla naashajaain Jesuu sümaa tü jierü ajaʼitüsükat, ojulijüshi nia wüin saaʼu (Juan 4:​7, 8). Makalaka eein süpüla wasaküin jee wasakirüin na wayuukana süpüla woʼttüin sünain aashajawaa namaa. Shiʼipaʼaya paashajaain namaa eesü süpüla püküjüin wanee pütchi suluʼujeejatü tü Wiwüliakat süpüla makataleein shia suluʼu naaʼin (Ecl. 11:6). Eeshii wawalayuu anaka akuwaʼipa sünain aküjaa pütchi sükajee naküjüin wanee kasa naashajaweeka atuma na wayuukana otta nasakireeka anainjee. Wanee shiyaawase: sümaʼainruʼu paʼatapajüin chi tottootkai, eeshi süpüla pümüin: «¡Talateerü maʼin taaʼin sajaʼttapa tü ayuuliikat!».

7. ¿Jamüsü süpüla waküjüin pütchi eepünaale waya sutuma jülüjüin waaʼin nakuwaʼipa na wayuukana?

⁷ Jülüjüle waaʼin nakuwaʼipa na wayuukana sükaaliinjeena waya süpüla aküjaa pütchi. Weʼrüle laülaain naaʼin süchonnii wanee wayuu, waküja sümüin anain tü saainjakat otta wasakira shia: «¿Kasa paainjaka süpüla anain nepijia na püchonniikana?». Jülüjüsü saaʼin wanee wawala tü naashajaakat achiki na shiʼyataajiraakana amaa süpüla saapüin mapa tü karaloukta aashajaakat süchiki tia. Tia wawalakat, saapa achikirü kasaalüinjatüin wanee shiʼyataajiraa amaalü, makalaka saapüin sümüin wanee ¡Despertad! aashajaaka süchiki tü saainjüinjatkat wanee wayuu eeka kasaalüinjatüin. Sutuma tia, aashajaasü shia sümaa süchiki tü Wiwüliakat.

8. ¿Jamüsü süpüla woʼttüin sünain aashajawaa namaa na wayuukana süka tü karaloukta weitajakat?

⁸ Wanee kasa akaaliinjeenaka waya süpüla oʼttaa sünain aashajawaa namaa na wayuukana shia waashajeʼerüle noʼupala tü karaloukta weitajakat. Eeshi wanee wawala aashajeʼerakai La Atalaya jee ¡Despertad! sümaa jiattain nünüiki, shia naashajeʼeraka wanee pütchi naashajaweeka achiki na wayuukana. Niʼrüle, niʼrajaanüin nutuma wanee wayuu sünain aashajeʼeraa tü rewiisütakat, nüsakirüin nia jee nüküjüin nümüin tü naashajeʼerakat achiki. Sutuma naainjüin tia, oʼttüshi nia sünain ashajawaa namaa na wayuukana otta sünain aküjaa pütchi. Weʼitaale wanee karaloukta eere jaʼyashiin shia, eesü süpüla nasakirüin sünain tü saashajaakat achiki na aʼyataajiraakana wamaa otta na koleejiakana wamaa.

9, 10. (1) ¿Jamüsü süpüla wachajaain sukuwaʼipa süpüla waküjüin pütchi eepünaale waya (2) ¿Jamüsü sukuwaʼipa putuma?

⁹ Püchajaainjatü sukuwaʼipa. Choʼujaashaatasü maʼin waküjüin pütchi maaʼulu, makalaka nnojoliinjanain waküjüin neʼe pütchi eepünaale waya maka sotule shia waaʼin. Wachajaainjatü sukuwaʼipa süpüla waküjüin pütchi eepünaale waya. Jülüja paaʼin jaraliin na wayuu püntiraainjanakana amaa otta tü pünüikinjatkat namüin süpüla anain shia namüin. Pülüʼüja waneepia tü Wiwüliakat otta waneeirua karaloukta ayuʼluushika sünainjee süpüla paapüin shia namüin na aapajakana pünüiki (1 Ped. 3:15).

¹⁰ Wainma aküjülii pütchi achajaaka maʼin sukuwaʼipa süpüla naküjüin pütchi eepünaale naya. Wanee wawala kepiaka suluʼu wanee miichi eere eein wijilante soʼuluʼu, oʼunawaisü eeka tü ashaittüleekat otta sukumajawaika wanee miʼirooui kanainka shiyaakua wanee mma anasü. Wanaa sümaa nalatüin na wayuukana, anasü maʼin saaʼin namüin tü ayaakuaakat. Sutuma tia, aashajaʼawaisü tü wawalakat namüin süchiki tü sümakat tü Wiwüliakat, ‹shiiʼiratüinjatüin kasa süpüshua chaa iipünaa je yaa mmoluʼu› (Alat. Map. 21:1-4). ¿Eesü wanee akuwaʼipaa jülüjaka paaʼin süpüla püküjüin pütchi eepünaale pia?

11. ¿Kasa waaʼinrajatka süpüla wekirajüin na wayuu waküjakana amüin pütchi eepünaale waya?

¹¹ Pikiraja na aapajakana pünüiki. Eere wanee wayuu aapajakai pünüiki, pikiraja nia. Makalaka eein süpüla pümüin nümüin: «Anasü maʼin aashajawaa pümaa. ¿Jalashi kepiain pia süpüla ayatüin waashajaain?». Eeshii wawalayuu aapaka sunuumerose nateleeponose otta nepia jee müshii naya namüin: «Anashaatasü maʼin tü waashajaakat achiki. Keeʼireere paaʼin pütüjaweein sooʼomüin puuneja taya». Nnojorüle süpüla pikirajüin wanee wayuu, paapamaata tü karalouktakat Sírvase visitar (S-43) nümüin chi seküretaariokai eere puutkajaain süpüla nikirajünüin natuma na wawalayuu aküjakana pütchi eere kepiain nia.

12. (1) ¿Jamüsü wayaawajüinjatka tü minuuto waküjakat oʼu pütchi eepünaale waya? (2) ¿Kasa eeka sutuma waküjüin pütchi eepünaale waya? (Paashajeʼera tü pütchi suluʼukat süpana 6.)

¹² Wayaawajüinjatü tü minuuto waküjakat oʼu pütchi eepünaale waya. Püshajawai shia, jaʼitairü palitchoin shia. Naküjüle pütchi weinshi soʼu jaʼrai minuuto na aküjüliikana pütchi, alateerü suulia 17.000.000 tü oora naküjakat oʼu pütchi eepünaale naya sajaʼttapa tü kashikat.

13. ¿Kasa waküjüinjatka atuma pütchi eepünaale waya?

¹³ Aküjüshii waya pütchi eepünaale waya süka alin wapüla Maleiwa otta na wayuukana (Mat. 22:37-39). Süka kojutüin wamüin tü akuwaʼipaa eekat nünain Jeowa otta tü kasa naaʼinrajatkat mapeena, aküjüshii waya pütchi süchiki «naʼanasia sünain aluwatawaa» (Sal. 145:​7, 10-12, NM). Aküjüshii waya pütchi waneepia namüin na wayuukana süka wakaaliinjeein naya otta eeyülüinya kaʼi süpüla waainjüin shia (Roma 10:​13, 14, NM). Yapale waya otta watüjaale saaʼu tü waainjüinjatkat, eeshii süpüla waküjüin pütchi eepünaale waya. Otta talateena waya sutuma wakaaliinjüin wanee wayuu sünain eʼraajaa tü shiimainkat.

[Epiikürape suluʼu süpanaka 4]

Piʼitaa püpüleerua püküjüin pünülia otta paashajaain namaa na wayuukana, nnojoleetka kapüleein pümüin aküjaa pütchi

[Epiikürape suluʼu süpanaka 5]

Wainma aküjülii pütchi achajaaka maʼin sukuwaʼipa süpüla naküjüin pütchi eepünaale naya

[Epiikürape suluʼu süpanaka 5]

Tü paainjüinjatkat süpüla puʼttüin sünain aashajawaa

◼ Püchunta yalayalain paaʼin nutuma Jeowa

◼ Paashajaa namaa na kamaneekana otta na nnojoliikana ashapajaain

◼ Piirakaa namüin na wayuukana, pukulemeraa namüin otta püküja süchiki wanee kasa naashajaweeka achiki

◼ Paapaja nanüiki

[Epiikürape suluʼu süpanaka 6]

Eesü kasa anasü sutuma aküjaa pütchi eepünaale waya

• Aʼatapajüshi wanee wawala sukumajünüin neʼejena, nüküjaka pütchi namüin na wayuu eejanakana yala otta nuunejaain naya sünain aapajaa tü pütchi süpülajatkat wayuu süpüshuaʼa sünain wanee outkajawaa miyoʼu. Wanee juya süchikijee tia, asakünüshi nia sünain wanee outkajawaa miyoʼu nutuma wanee wawala nnojoikai niʼraajüin. Nia wanee wayuu eejachikai naʼaka na wayuu nuunejaakana eejatüle sukumajünüin neʼejena. Oʼunüshi nia sünain aapajaa tü pütchikat otta nüchuntaka nikirajünüin sünain tü Wiwüliakat. Anoujüichipa nia sümaa tü nuʼwayuusekat.

• Wanee wawala eʼraajaka tü shiimainkat süka süküjünüin pütchi sümüin eepünaale shia, aküjawaisü pütchi namüin na shiʼraajakana nanainjee apünüinshii süchonnii. Sutuma tia, aashajaasü shia namaa na kepiakana süʼütpaʼa, na shiʼraajakana suluʼu tü koleejiakat otta namaa nashi na tepichikana wanaa sümaa noutkajaain suluʼu tü koleejiakat. Wanaa sümaa süküjüin sünülia, süküjüin motsoʼo jamüin sükaaliinjia sutuma tü Wiwüliakat sünain epijaa na süchonniikana, mapa aashajaasü süchiki wanee kasa naata. Sutuma saainjüin tia, mapüleesat sümüin aashajawaa süchiki tü Wiwüliakat soʼu wanee sukua. Makalaka polooirüin piamamüin wayuu sükaaliinjaka süpüla woutiisain naya.

• Wanee aʼyataai sünain ashajiraa wayuu süpüla sümüliajünüin sülatüle kasa mojusü sümüin, antüshi nia shipialuʼumüin wanee wawala otta süküjaka pütchi nümüin. Süsakiraka nia kateere noʼu waneepia, aneere nia otta talateere naaʼin. «Aa», nümaka sümüin otta nüsakiraka shia kasain aapüinjatüin tia nümüin. Süküjaka nümüin tü naainjüinjatkat Maleiwa. Nüchekaka süpüshi tü karaloukta weitajakat otta naashajeʼeraka shia süpüshuaʼa soʼu wanee ai. Saashajaaka nümaa süpüla nikirajünüin sünain tü Wiwüliakat. Nuʼunaka sünain tü outkajawaakat otta mapa, woutiisaka nia.

• Wanaa sümaa suʼunajaain wanee wawala suluʼu katünasü, aküjüsü shia pütchi sümüin tü eejatkat saʼatoʼu. Nantapa eemüinjanale naya, saapüin tü wawalakat sunuumerose süteleeponose otta shipia. Otta süküjüin sümüin süchuntüinjatüin shikirajünüin sünain tü Wiwüliakat nantapa shipialuʼumüin na aküjüliikana pütchi. Waneemüin kaʼi süchikijee tia, antüshii piamashii Aküjülii Pütchi shipialuʼumüin. Oʼttüsü shia sünain ekirajawaa sünain tü Wiwüliakat, sünoukteʼeramaatüin sukuwaʼipa, woutiisasü shia otta shikirajamaatüin apünüinsü wayuu sünain tü Wiwüliakat.

• Wanee wawala moʼupaʼasai, 100 nuuyase otta kepiashi eere kepiain na laülaayuukana, mawaishi: «Choʼujaasü wamüin Nuluwataaya Maleiwa». Sutuma müin nünüiki, asakinnawaishi nia natuma na enperümeerakana otta waneeinnua laülaayuu, nüküja müsia kasain wayuu Nuluwataaya Maleiwa. Soʼu wanee kaʼi asakinnüshi nia sutuma wanee aʼyataat suluʼu piichikat tia, kasain naainjüinjatüin suluʼu tü Paʼaraiisükat. Müshi chi wawalakai: «Koʼupaʼaweechi otta waraiteechi taya tachikuaʼa, taʼajeetka tü teinase kooʼuisükat. Süka moʼupaʼain nia, nüchuntüin sümüin saashajeʼerüinjatüin nümüin tü rewiisütakalüirua. Soʼu wanee kaʼi antüsü tü nüchonkat sünain anaʼlawaa nümüin, süsakinnaka sutuma tü aʼyataatkat maka eere süpüla sülüʼüjüin tü rewiisütakalüirua shipialuʼumüin. Sümaka wanee enperümeera sümüin tü nüchonkat: « ‹Choʼujaasü wamüin Nuluwataaya Maleiwa› müshii joo waya».

• Eejatü wanee wawala aʼatapajaka ayaʼlajaa shiküin suluʼu wanee oikkaalee eküülü, saapaka nanüiki waneeinnua wayuu aashajaaka süchiki poliitika. Nümapa wanee isain nachiki na aluwataashiikana najaʼttirüin tü kasa mojusü alatakat namüin na wayuukana, majiraasü tü wawalakat: «Acheküsü taküjüin pütchi». Suʼuraajaka motsoʼo suluʼu saaʼin otta sürütkaaka nanainmüin. Palajana, süküjüin sünülia mapa, süküjüin shiainjatüin Nuluwataaya Maleiwa ajaʼttirajatka tü kasa mojusü alatakat sümüin wayuu otta saapaka wanee poyeeto. Nüntaka chi aluwataakai suluʼu tü oikkaaleekat eküülü. Saaʼin sümüin tü wawalakat nüjünajaainjatia shia saashin, nümaka neʼe sümüin naapajüin tü saashajaakat achiki otta keeʼireein naaʼin wanee poyeeto. Süntaka wanee aʼyataat sümaa shiʼyalajüin, saapajüin tü saashajaakat achiki. Ekirajaasü paala shia sünain tü Wiwüliakat otta shikirajaweeka jooluʼu süchikuaʼa.