«Nnojo mmoluin pia»
1. Maʼaka naaʼin Jeremías, ¿kasa eeka süpüla eejiraain amaa waya?
1 Wanaa sümaa nüneekünüin Jeremías süpüla nünüikimaainjachin nia Maleiwa, kapüleesü saaʼin nümüin tia aʼyatawaakat. Akaisaʼa nia, atütüleʼennüsü naaʼin nutuma Jeowa otta nümaka nümüin sümaa kamaneein nia: «Nnojo mmoluin pia». Katchinka naaʼin nutuma süpüla nikeraajüin tia aʼyatawaakat (Jer. 1:6-10, NM). Müshiʼiya wayakana, eeshii süpüla nnojoluin waküjüin pütchi sutuma japüleʼein otta mmoleʼein waya seema nanüiki na wayuu waküjakana amüin pütchi. ¿Kasa akaaliinjeenaka waya süpüla nnojoluin mmoluin waya? ¿Kasa weʼreetka sünainjee tia?
2. ¿Jamüshii nnojoleenaka waya mmoluin yapale waya?
2 Yapa waya. Nnojoleena waya mmoluin seema aküjaa pütchi yapale maʼin waya. Jamüsüjaʼa yapale watuma tü wanüikinjatkat, eesü süpüla watüjaain saaʼu tü wasouktüinjatkat namüin na ayouktakana tü wekirajakat anain shiiʼiree nnojoluin waküjüin pütchi namüin (Pro. 15:28). Soʼu tü Ai Puʼwaajakat oʼu Maleiwa sümaa Püpüshi, anasü puuʼulaküle tü pünüikinjatkat wanaajiraa sümaa tü alatawaikat pümüin sünain koleejiaa otta sünain aküjaa pütchi (1 Ped. 3:15).
3. ¿Jamüsü weʼitaainjatka waaʼin nünain Jeowa süpüla nnojoluin mmoluin waya?
3 Weʼitaa waaʼin nünain Jeowa. Wanee kasa anaka süpüla nnojoluin mmoluin waya shia weʼitaale waaʼin nünain Jeowa süka nüküjüin nükaaliinjeenain waya (Isa. 41:10-13). Anashaatasü maʼin tü nüküjakat wamüin. Jaʼitairü alatajaain wamüin wanee kasa, eeshii süpüla waküjüin pütchi nükajee chi naaʼinkai Maleiwa naashin Jesuu (Mar. 13:11). Müshijeseʼe wachuntawalinjachin chi naaʼinkai Maleiwa (Luc. 11:13).
4. ¿Kasa weʼraka sünainjee ayatüin waküjüin pütchi mayaapejeʼe sülatüin kasa mojusü wamüin?
4 Tü kasa weʼrakat sünainjee. Ayatüle waya sünain aküjaa pütchi mayaapejeʼe sülatüin kasa mojusü wamüin, nnojoleena mmoluin waya otta nayaawateerü aaʼu na waneeinnua eein wanain chi naaʼinkai Maleiwa (Aluw. 4:31). Otta tia, sükaaliinjeena waya süpüla walatüin süchikumüin tü ooʼulakünajatkat aka waaʼin. Nükaaliinjeena waya Jeowa süpüla nnojoluin mmoluin waya otta kanouleena maʼin waya jee weʼitaweerü waaʼin nünain (Isa. 33:2). Otta müsia, talateerü waaʼin süka watüjaain saaʼu talatüin naaʼin Jeowa watuma (1 Ped. 4:13, 14). Sutuma tia, nnojo mmoluin waya sünain aküjaa pütchi süchiki Nuluwataaya Maleiwa süka watüjaain saaʼu nükaaliinjüin waya Jeowa.