Kaʼataparaliinjana waya sünain aʼyatawaa nümüin Maleiwa
1. ¿Kasa niiʼiyataka aka Jeowa kaʼataparalin nia?
1 Jaʼyasü sünain nukuwaʼipa Jeowa namaa na wayuukana kaʼataparalin nia (Éxo. 34:6; Sal. 106:41-45; 2 Ped. 3:9). Niiʼiyatüin maʼin tia akuwaʼipaakat sükajee süküjünüin pütchi süchiki tü Nuluwataayakat. Eeirü maʼaka 2000 juya sünain nuunejüin Jeowa nünainmüin tü wayuu anamiakalüirua jee ayatayülia naainjüin tia (Juan 6:44). ¿Jamüsü süpüla washatüin nukuwaʼipa Jeowa sünain tia wanaa sümaa waʼyataain nümüin?
2. ¿Kasa weeʼiyataka aka eere waküjüin pütchi kaʼataparaliin waya?
2 Aküjaa pütchi sainküin piichi. Kaʼataparalii waya maʼaka naaʼin Jeowa waküjüle pütchi «waneepia» eere nnojoluyülüinya kasajatüin shia sümüin wayuu (Aluw. 5:42). Nnojoishii jashichijaain meeʼeraparale waya, müliale waya otta nnojorüle kasajatüin sümüin wayuu tü pütchi waküjakat (Mar. 13:12, 13). Jee kaʼataparalii waya ayatüleʼeya waküjüin pütchi mayaainjeʼe kapüleein antaa sünain wayuu aapajeeka wanüiki.
3. ¿Jamüshii nnojoliinjanaka wapüleeruain naaʼin na wouyantakana anainmüin otta na wekirajakana sünain tü Wiwüliakat?
3 Ekirajaaka sünain tü Wiwüliakat. Süpüla miyoʼuin wanee pünajüt waʼatapajüinjatü sülatüin kojuya kaʼi. Eesü süpüla waaʼinmajüin shia akatsaʼa isasü wachiki miyoʼumaatüin shia watuma (Sant. 5:7, NM). Müsia sukuwaʼipa nanoula na wayuukana, nnojotsü uatuwoʼushin shia (Mar. 4:28). Eesü kapüleere namüin na wekirajüinkana nooʼulaain suulia nanoujüin sünain wanee kasa mojuka saashin tü Wiwüliakat. Nnojo wapüleeruain naaʼin süpüla kooʼomüinjatüin nanoula, waʼatapajüinjatü nanoukteʼerüin nakuwaʼipa nutuma chi naaʼinkai Maleiwa (1 Cor. 3:6, 7).
4. ¿Jamüsü süpüla waküjüin pütchi namüin na wapüshi manoujüinkana kaʼataparaliire waya?
4 Wapüshi manoujüinka. Mayaainjeʼe keeʼireein maʼin waaʼin natüjüin tü shiimainkat na wapüshi manoujüinkana, waʼatapajüinjatü joujain anain süpüla waküjüin namüin tü wanoulakat jee nnojoluinjatü wainmain tü waashajaakat achiki namüin (Ecl. 3:1, 7). Shiajaʼa neʼe anaka weʼraajirüi naya tü shiimainkat sükajee wakuwaʼipa sümaa yapain waya süpüla waküjüin namüin tü wanoulakat sümaa kamaneein waya otta kojutüin naya watuma (1 Ped. 3:1, 15). Shiale maʼin jaʼyain kaʼataparaliin waya sünain waküjüin pütchi, aneerü maʼin otta talateechi Maleiwa sutuma.