Piamasü nneerü kachueerachen neʼe

Wanee kasa wakaaliinjaka aka tü aʼyatawaa sünainpünaakat Nuluwataaya Maleiwa, shia wasülajüle wanneetse süpüla süküjünüin pütchi sainküinpünaa mma. ¿Jama manneetsere waya?

Soʼu wanee kaʼi, niʼrüin Jesuu wanee wayuu oukta aʼwayuuset ejitaka piamasü nneerü kachueerachen neʼe suluʼu tü kojon suluʼukat tü aʼwaajüleekat. Süka alin Jeowa süpüla, «shijitüin süpüshua tü sünneetse sümaʼanajatkat» (Mar. 12:41-​44). Süka jülüjüin naaʼin Jesuu tü saaʼinrakat, jaʼyasü kojutüin nümüin Jeowa tü saaʼinrakat. Na wanee anakana süpüla ashatünaa akuwaʼipa naya na anoujülii eejanakana nükalioʼu Jesuu. Talatüshii maʼin naya sutuma eein süpüla nasülajüin, jaʼitainna washirüin jee müliain naya. Müsü nünüiki Pablo nachiki na macedoniajeʼewaliikana: «Mayasüjeʼe eein jaʼijawaa, eein mülia [...] wainmatua nachuntüin wamüin süka süpüshua naaʼin shiiʼiree nakaalinjeein na anoujashii chakana Judea» (2 Cor. 8:​1-4).

Jaʼitakajeʼe eein süpüla wasülajüin piamasü nneerü kachueerachen neʼe, wainmeerü shia sükotchojünapa. Wasülajüle süka waaʼin, watalateʼereerü naaʼin chi Maleiwakai ‹süka talatüin naaʼin nümaa chi wayuu asülajüikai› (2 Cor. 9:7).