Anainjatü maʼin wakuwaʼipa suʼupala wayuu

1. ¿Jamüsü anainjatka wakuwaʼipa suʼunnaa tü outkajawaa miyoʼu apünüinkat kaʼi?

¹ Ponusü maʼin saaʼin wayuu shiʼrapa anain maʼin tü wakuwaʼipakat sünain tü outkajawaa miyoʼu apünüinkat kaʼi eeka juyawai. Makalaka anainjatüin maʼin wakuwaʼipa süpüla nuʼwaajünüinjachin Jeʼwaa (Lev. 20:26). Kamaneeinjana waya jee anainjatü waʼanaaya süpüla sütüjaainjatüin saaʼu wayuu woushikajaain süchiirua nukuwaʼipa Kürisüto. ¿Kasa waainjüinjatka süpüla anainjatüin wakuwaʼipa suʼupala wayuu jee nuʼwaajünüinjachin Jeʼwaa suʼunnaa tü outkajawaa miyoʼu apünüinkat kaʼi? (1 Ped. 2:12.)

2. ¿Kasa waainjüinjatka süpüla sütüjaanüin saaʼu anain maʼin tü wakuwaʼipakat suʼunnaa tü outkajawaakat?

² Anainjatü maʼin wakuwaʼipa. Aijiraainjana waya jee anainjatü wakuwaʼipa suʼupala wayuu. Naatainjatü wakuwaʼipa suulia nakuwaʼipa na manoujüinsaliikana (Col. 3:10; 4:5; 2 Tim. 3:1-5). Kamaneeinjana waya otta anainjatü wanüiki namüin na wayuu aʼyataakana suluʼu oikkaalee eküülü otta eere tü atunküleekat, jaʼitairü kasain alatüin. Eesüjaʼa süpüla wasülajüin süpüshi wanneetse namüin müleka anashiire tia.

3. ¿Kasa jülüjüinjatka naaʼin na kachonshiikana? ¿Jamüsü naainjüinjatka tia?

³ Jülüjüinjana jaaʼin na jüchonniikana sünain tü outkajawaakat, suluʼu oikkaalee eküülü jee eere jutunküin (Prov. 29:15). Müsü sünüiki wanee wayuu laülaasü saaʼu wanee oikkaalee eküülü nachiki na aküjüliikana pütchi: «Ponusü maʼin waaʼin nakuwaʼipa na aküjüliikana pütchi. Kamaneeshii maʼin na jüchonniikana jee nnojoishii eʼrüliin wayumüin naya. Anasü maʼin nanüiki na wayuu aʼyataakana yaʼayaa jüchiki. Anashii weinshitaale jia sünain jüntüin saawanoʼu otta rimiinkoʼu yaamüin».

4. ¿Jamüinjatü sukuwaʼipa waʼanaaya suʼunnaa tü outkajawaakat miyoʼu?

⁴ Anainjatü sukuwaʼipa waʼanaaya. Anainjatü waʼanaaya sünain tü outkajawaakat miyoʼu. Nnojoluinjatü müin waʼanaaya maʼaka saaʼin tü anakat maʼin namüin na manoujüinsaliikana (1 Tim. 2:9). Anainjatü sukuwaʼipa waʼanaaya waneepia, jaʼitainna jalapünaain waya maʼaka saaʼin wamaa sümaa wantüin eeinjanale watunküin, woʼunüinjanapa jee shiale wamaa sümaa wawaraijaain yalapünaa. Makalaka talateerü maʼin waaʼin süka shiʼnnüin tü karaloukta wanüliamaajatkat suʼunnaa tü outkajawaakat. Nnojoleena japülin waya sünain aküjaa pütchi. Anainjatü waʼanaaya jee wakuwaʼipa suʼunnaa tü outkajawaa miyoʼu apünüinkat kaʼi. ¿Kasa apüla? Süpüla saapaainjatüin amaa wayuu tü pütchikat jee nuʼwaajünüinjachin Jeʼwaa (Sof. 3:17).

Sotuinjatü waaʼin süpüla tü outkajawaa miyoʼu apünüinkat kaʼi 2014

◼ Sükalia tü ekirajaanajatkat anain. Ojutanneerü soʼu tü piichikat 8:00 wattaʼa maalü. Oʼtteerü tü jayeechi aapajünakat palajana 9:20 watta maalü soʼu tü apünüinkat kaʼi. Suʼttapa tü muusikakat wachajaainjatü weinase süpüla anain suʼttia tü wekirajaainjatkalü anain. Ojutaajeerü tü outkajawaakat 4:55 aliika soʼu tü palajatkat otta tü piamakat kaʼi. Akatsaʼa soʼu tü apünüinkat kaʼi ojutaajeerü shia 3:50 aliika.

◼ Outkajawaa miyoʼu eere noutkajaain na wawalayuu naatakana oumain. Eejeerü waneeirua outkajawaa miyoʼu napülajatü na wawalayuu naatakana oumain. Yaawasü sutuma Weteet tü einasee napülajatkat, jeʼrainjatüin eʼejetü eeinjatka otta jalainjanain atunküin naya. Makalaka yaawain na wawalayuu suunejaakana Weteet süpüla tü outkajawaakat jee müshiʼiya na wawalayuu naatakana oumain. Müleka noʼunüle waneeinnua wawalayuu sünain wanee outkajawaa sümaa nnojoliin nounejaanüin sutuma Weteet, eesü süpüla sülanaaleeinya wayuu sünain tü outkajawaakat. Isale wachiki woʼunüin sünain wanee outkajawaa miyoʼu eeinjanale woutkajaain, nnojotsü anashiin woʼunüle sünain wanee outkajawaa miyoʼu eeinjanale noutkajaain na wawalayuu naatakana oumain.

◼ Süpülee kemion. Nnojoleerü achekajünüin süpülee kemion wayale aaʼinmajüin shia. Pachiiruaainjatü süshaʼwaleʼennüin tü kemionkat. Eeshii süpüla kojuyain na antakana suluʼu wanee kemion müleka joʼuuchonle tü süpüleekat kemion. Eeinjatüle süshaʼwaleʼennüin neʼejena na isakana achiki waraittaa namüiwaʼa, nnojotsü ashawaʼleʼenüinjatüin wanee kemion naata.

◼ Einasee. Sujutannapa soʼu tü piichikat eeinjanale woutkajaain, nnojotsü anain wawataale maʼin sünain achajawaa tü weinaseinjatkat. Nnojoishii sünain waya wanee ayoujirawaa süpüla müinjatüin wakuwaʼipa. Shiainjatü kapülaka waaʼin nakuwaʼipa na waneeinnua suulia tü wakuwaʼipakat. Waainjüle tia, atüjaaneerü aaʼu wayain na anoujüshii shiimainshiikana jee aʼwaajüneechi maʼin Jeʼwaa (Juan 13:34, 35; 1 Cor. 13:4, 5; 1 Ped. 2:12). Naya neʼe pükatalüinjanaka einasee na antakana jee na kepiakana pümaa otta na ekirajaakana pümaa sünain tü Wiwüliakat. Eesü kapüleere naikkalaainjanain kojuya wayuu sümaa wanee napüshi eekai laülaain otta ayuulin, süka palitchon tü einasee eʼitaanakat napüla. Nnojo püikkalaain saaʼu tia einaseekalüirua süka napülajatüin shia na laülaayuukana, na ayuuikana otta na wayuu akaaliinjakana naya.

◼ Eküülü. Anasü walüʼüjüle weküin suulia oʼunaa sünain ayaʼlajaa wanaa sümaa weemeraain kaleʼu. Nnojotsü alüʼüjünüinjatüin sünain tü outkajawaakat wanee kaawa miyoʼu otta maraaja. Eesü süpüla sülüʼüjünüin wanee kaawa joʼuuchon kettaaka suupünaa tü einaseekat.

◼ Nneerü asülajünaka. Sutuma talatüin waaʼin saaʼu wekirajünüin sünain tü outkajawaakat miyoʼu, anasü wasülajüle süpüshi wanneetse süpüla aküjaa pütchi sainküin mma.

◼ Püsajüle wunuʼu. Püsajüle wunuʼu aluwataaushi pümüin natuma na tottootkana, pülüʼüja shia süka nnojoleerüin saapünüin pümüin sünain tü outkajawaakat. Müleka suukarale püsha otta piʼiteʼerüinjachire utia pünain, nnojo pujutüin neʼe yalapünaa tü utiakat, kapüleesü shia süka ayuuleemaajatüin shia. Nnojo pujutüin shia saʼaka tü wasuura eekat suluʼu tü outkajaaleekat otta eere pütunküin.

◼ Asapaatsee. Eeinjatü waaʼin suulia weewaain sutuma washanaain jee wasiranajaain. Wainma wayuu eewaaka juyawai sutuma nasapaatse. Anasü jüneeküle sapaata eekai nnojoluin yaletüin shiine süpüla nnojoluin jeewaain wanaa sümaa waraittüin jia sooʼopünaa kaleera otta saaʼu saamajülee wüin.

◼ Wayuu macheʼeka. Sünain tü outkajawaakat alatinneerü tü ekirajaanajatkat anain suluʼu raawia (FM). Süpüla tia, choʼujaasü wanee raawiachon kanainka audífono.

◼ Neʼejena na joʼuuyuukana. Nnojotsü alüʼüjünüinjatüin tia sünain tü outkajawaakat. Akatsaʼa eein süpüla sülüʼüjünüin tü neinase eʼitaanakat naʼütpaʼa na kachonniikana.

◼ Koloonia. Eesü süttüle tü piichikat eeinjanale woutkajaain. Makalaka suchuntünüin wamüin nnojoliinjanain woʼyotüin müleʼu koloonia waaʼu jee nnojoluinjatü alin maʼin seejuu suulia motsotuin naaʼin na wayuukana sutuma (1 Cor. 10:24).

◼ Tü karalouktakat Sírvase visitar (S-43). Pülüʼüja wanee jee piamasü karalouktairua Sírvase visitar süpüla püshajüin nanülia na püküjakana amüin pütchi otta na ekirajaweekana sünain tü Wiwüliakat. Püleʼejapa sünainjee tü outkajawaakat miyoʼu, eesü süpüla paapüin tia karalouktakat eere shiitajünüin karaloukta jee shiale nümüin chi seküretaariokai eere puutkajaain.

◼ Atunkülee. Eere süpüla natunküin na wawalayuukana wepialuʼu, waashajaa nümaa chi seküretaariokai eere woutkajaain otta wepiraja tü karaloukta sümaajatkat. Puʼunüinjachire sünain wanee outkajawaa eeka wattain suulia pipia otta choʼujaale eeinjachire putunküin, paashajaa nümaa chi seküretaariokai, pipiraja tü karaloukta süpülajatkat tia otta paapa shia nümüin chi wawalakai süpüla nuluwataain shia eeinjatüle tü outkajawaakat. Nnojo paaʼinrüin tia sülüʼütpa maʼin tü outkajawaakat süka sumojujeʼereerüin sukuwaʼipa naʼyataain na wawalayuu achajaakana tü atunküleekat (1 Cor. 14:40). Na wawalayuukana otta na nachonnii makatakana nepialuʼu na wawalayuukana, kojutüinjatü namüin nepia, nnojoluinjatü namojujeʼerüin tü korolo namaʼanakat otta nnojoluinjana ekerotuin eere natunküin na kepiakana. Tü atunküleekat süpülajatü neʼe tü kaʼi eeinjatkat oʼu tü outkajawaakat. Nnojotsü anain makatüle waya kojuya kaʼi süchikijee tü outkajawaakat süpüla eʼraajaa tü kasa anakat maʼin eere saainjünüin tü outkajawaakat jee süpüla aaʼinraa waneeirua kasa.

◼ Eeka nakaaliinjeein. Na aʼyataweekana, arütkaainjana eemüin na shikiipüʼükana. Eeshi süpüla niʼyataain chi eekai 16 ouyase, akatsaʼa naainjüinjatü tia sümaa naaʼinmajünüin nutuma chi nüshikai, tü niikat jee niale wanee wayuu laülaakai naaʼu natuma na kachonniikana nia.