Wanaʼlaamaata namüin na wayuu ekirajaweekana
Süchikijee sunouktünüin jw.org akooʼomüinraashii na wayuu achuntakana suluʼupünaa Internet nekirajünüin sünain tü Wiwüliakat. Süka süküjünüitpain pütchi eere jouluin maʼin wayuu, akooʼomüinraashii na achuntakana nekirajünüin sünain tü Wiwüliakat. Eejüsü naaʼin na wawalayuukana chaa Weteet sünain tia. Jamüshijaʼa eere wanee wayuu achuntakai suluʼupünaa jw.org nikirajünüin sünain tü Wiwüliakat, alatüsü neʼe piama kaʼi süpüla naashajaanüin amaa na laülaashii ajütünüinjanakana. Akatsaʼa waapüin süchiki sülatawalin kojuya semaana süpüla nüntajachin wanee wawala nipialuʼumüin chi wayuu achuntakai nikirajünüin. ¿Kasa waaʼinrajatka süpüla wakaaliinjamaatüin na wayuukana suulia seemiajaain nanoula? (Mar. 4:14, 15.)
Eere wanee wayuu ekirajaweeka sünain tü Wiwüliakat shiasaʼa müin wattain shipia suulia tü püpüleekat sünain aküjaa pütchi, pipirajamaata tü karalouktakat Sírvase visitar (S-43) otta paapa shia nümüin chi seküretaariokai sünain tü wanee outkajawaakat. Nuluwataainjatü shia waneemüin kaʼi chaa Weteetmüin jee shiale namüin na wawalayuu aküjakana pütchi eere kepiain tü wayuukot. Nuluwataainjatü shia suluʼupünaa jw.org, eere sümüin Congregación. Nojutalüinjatü weinshi jw.org na laülaashiikana. Süküjünüle namüin eein wanee wayuu ekirajaweeka sünain tü Wiwüliakat, nachajaainjatü sukuwaʼipa süpüla sünaʼlaanamaatüinjatüin amüin. Chi wawala ajütünakai sünain anaʼlawaa, oʼunamaatüinjachi nia. Yüütüüle nüpüla, eesü süpüla nüshajüin suluʼu wanee karaloukta tü nünüliakat otta sunuumerose nüteleeponose nüpüteetka shia süpüla tü wayuukot.