Atüjainjana waya aküjaa pütchi: waküja pütchi namüin na naatakana anüiki

¿Jamüsü choʼujaaka? Keeʼireesü maʼin naaʼin Jeʼwaa shiʼraajüinjachin nia wayuu maʼleekalia (Aluw. 10:​34, 35). Naashin Jesuu aküjünüinjatü pütchi «sainküin mmakat süpüshua süpüla saapünüinjatüin sütüma wayuu süpüshua» (Mat. 24:14). Nüküjatüjülia Zacarías, eeinjatüin wayuu sainküinjee mmaka süpüshuaʼa ekeretokana sünain anoujaa (Zac. 8:23). Niiʼiyatüin Maleiwa nümüin chi aluwataaushikai Juan suʼttaain süchikijee Armagedón wainma «wayuu saʼakajee shiʼirukukat tü wayuukalüirua süpüshua, sainküinjee mmakat süpüshua» (Alat. Map. 7:9, 13, 14). Makalaka waküjüinjanain pütchi namüin na wayuu naatakana anüiki wantiraaka amaa eepünaale waküjüin pütchi.