Yapa waya süpüla tü Outkajawaakat eere Sotuin Waaʼin Outuin Jesuu

Soʼujee juyakat tüü, eejeerü kaʼi süpüla yapain waya süpülapünaa tü Outkajawaakat eere Sotuin Waaʼin Outuin Jesuu. Saainjünüinjatüle tia outkajawaakat süseʼeruʼu semaanaka, nnojoleerü aainjünüin tü outkajawaakat Wakuwaʼipa otta Waʼyataain nümüin Maleiwa. Jee saainjünüinjatüle saawanoʼu jee rimiinkoʼu tü Outkajawaakat eere Sotuin Waaʼin Outuin Jesuu, nnojoleerü eein tü outkajawaakat eere süküjünüin wanee pütchi süpüla wayuu süpüshuaʼa otta shikirajaanüin anain Aapiria wayuu. ¿Kasa waaʼinrüinjatka soʼunnaa tia? Yapainjana waya süpülapünaa süntüin sükalia tü outkajawaakat, maʼakaapuʼu natuma na anoujashiikana soʼu nükalia Jesuu (Lu 22:7-13; km 3/15 1). ¿Jamüinjatü sukuwaʼipa watuma süpüla yapainjanain waya?

• Wasakirüinjatü waaʼin sünain jamüin choʼujaaka woʼunüin sünain tia outkajawaakat (1Co 11:23-26).

• Achuntajana waya nümüin Jeʼwaa otta wayaawatüinjatü saaʼu jamüin wakuwaʼipa nümaa (1Co 11:27-29; 2Co 13:5).

• Waashajeʼerüinjatü pütchi aashajaaka süchiki jamüin saainjünaka tü Outkajawaakat eere Sotuin Waaʼin Outuin Jesuu jee wasakirüin waaʼin sünain (Jn 3:16; 15:13).

Eeshii wawalayuu aashajeʼerakana tü wetsiikuloirua sünainpünaaka tia outkajawaakat eʼitaanaka suluʼu tü poyeetokot Pikirajaa waneepia sünain tü Nüchikimaajatkat Maleiwa jee asakireʼetshii naya naaʼin sünain tia pütchikat. Eeshii na anaʼlawaikana sümüin tü pütchi süttakat yaa wünaapünaa. Otta eeshii na ekirajaakana sünain tü pütchi ojuʼitakat suluʼu Aapiria Wayuu aashajaaka süchiki tia jee süchiki alin maʼin waya nüpüla Jeʼwaa otta Jesuu. Tü pütchi eekai püneeküin süpüla pikirajaain sünain, sükaaliijeechi pia süpüla pürütkaain maʼin nünainmüin Jeʼwaa jee müshia chi Nüchonkai.