Namaa waya na aikana apüla Jeʼwaa

¿Jamüshii namaainjanaka waya na aikana apüla Jeʼwaa? Shia süka eein süpüla anain jee mojuin wakuwaʼipa natuma na waʼaleewajaakana amaa (Pr 13:20). Jamüshijaʼa chi aluwataaikai Jehoás, aleewashi nia nümaa Jehoiadá, chi laülaakai napüleerua na sacerdootekana. Suluʼujee tia, wainma tü kasa anasü naainjakat Jehoás noʼuluʼu Jeʼwaa (2Cr 24:2). Outapa Jehoiadá, aʼaleewajaashi Jehoás sümaa wayuu mojulaasü, wainmakalaka kasa mojusü naainjaka noʼuluʼu Jeʼwaa (2Cr 24:17-19).

Soʼu nakalia na nikirajüinkana Jesuu, nüküjain Pablo müin nakuwaʼipa na anoujashiikana maʼaka saaʼin «wane miichi eekai shipiain washinnuu» otta na nepiajanakana, müshii aka saaʼu «iita» naashin. Müshii waya aka «saaʼin tü iita kojutsükat» nnojoliire waya aleewain sümaa wayuu aainjaka kasa mojusü noʼuluʼu Jeʼwaa, jaʼitakajeʼe neʼe naküjaliire pütchi jee wapüshire naya (2Ti 2:20, 21). Naya anakana süpüla waʼaleewain na aikana apüla Jeʼwaa otta na atütüleʼerakana waaʼin süpüla waʼyataain nümüin.

SÜCHIKIJEE JÜNAJÜIN TÜ VIDEOKOT NA NNOJOLIIKANA ANAIN SÜPÜLA WAʼALEEWAIN, JUSOUTA SHIʼIPAJEE TÜÜ:

• ¿Eesüche süpüla anajüin wamüin aleewaa namaa na nnojoliikana anain süpüla waʼaleewain?

• ¿Kasa akaalinjaka na apünüinshiikana wawalayuu süpüla nooʼulaain suulia aleewaa namaa na nnojoliikana anain akuwaʼipa?

• ¿Jarat tü pütchiirua suluʼukat tü Wiwüliakat akaalinjeenaka waya süpüla anain naneekia na waʼaleewainjanakana?