¿Kasa waaʼinrüinjatka süpüla suluʼuinjanain waya tü mma jeketkat?

Maʼaka waashajeʼerüitpain, alüʼütsü süpüla najaʼttirüin Maleiwa tü wayuu mojulaasükalüirua jee tü kasa mojusü eekat mmapaʼa. ¿Jamüsü watüjaaka saaʼu naaʼinreerüin tia Maleiwa? Anuu tü sümakat tü Bibliakat:

«Yüüʼülaa meerü [tü kasa mojusükat] soʼuweena wane kaʼi» (1 JUAN 2:17).

Watüjaa aaʼu eejeerüin wayuu oʼttaajeetka soʼu tia sutuma müin süpüshi tia wetsiikulokot:

«Aluʼujasa chi wayuu aaʼinrakai tü nuluwataakat anain Maleiwa, ayateechi nümaa süpüla kaʼikat süpüshua».

Oonooinjana waya sümaa nünüiki Maleiwa süpüla woʼttaainjanain süchikumüin tia. Weʼraajüinjatpejeʼe nukuwaʼipa Maleiwa.

WEʼRAAJA MALEIWA SÜPÜLA WOʼTTAAINJANAIN

Kojuyasü ayaakuaa: 1. Wanee perümeera mapüsasü maʼin jee shapaasü saaʼin, ojoyoloosü shia. 2. Soʼunnaa sheemeraain, sünanajaa sümüsü wanee aʼyataajiraasü sümaa talatakai aaʼin sünain aashajeʼeraa wanee rewiisüta. 3. Saashajeʼeraka tü shiʼyataajiraakalü amaa wanee pütchi suluʼujee tü Bibliakat sümüin otta saapaka wanee tarüjeeta jw.org sümüin.

Müshi Jesuu: «Kateerü noʼu waneepia chi wayuu eekai niʼraajüin pia, chi waneeshikai sünain Maleiwain» (Juan 17:3, TNM). Süpüla woʼttaainjanain sajaʼttapa tü kasakat süpüshuaʼa jee süpüla katüinjatüin woʼu waneepia, weʼraajüinjatü nukuwaʼipa Maleiwa. Nnojotsü shiain neʼe watüjaainjatüin saaʼu eein nia jee watüjaainjatüin saaʼu mojukuʼu müsü süchiki tü nukuwaʼipakat, aleewainjana waya nümaa. Müleka aleeweere waya nümaa wanee wayuu, aashajaashii waya waneepia nümaa jee nümaashii waya. Müinjatia wakuwaʼipa nümaa Maleiwa. Waashajaa süchiki waneirua pütchi sümaka tü Bibliakat aleeweenaka anainjee waya nümaa Maleiwa jee anaka süpüla ayatüin aleewain waya nümaa.

Tü sümakat tü Bibliakat

Keeʼireetüjülia naaʼin Maleiwa kepiainjanain waya suluʼu wanee paʼaraiisü.

Nukumajüin Maleiwa Adán sümaa Eva jee niʼitaain naya suluʼu wanee apain Edén münüsü. Süka lotuin nakuwaʼipa nnojoishii ayuulin jee laülaayuuin naya. Naapüin Maleiwa namüin süpüshuaʼa tü kasa talatüinjatkalü atuma naaʼin. Katayüliije noʼu müleka aleewalejeʼe naya nümaa Maleiwa. Nnojoliipejeʼe naya oonooin sümaa wanee kasa mapüleesat nuluwataaka anain naya Maleiwa.

Tü müliakalü atuma waya jee tü alatakat wamüin.

Sutuma nnojoluin noonooin Adán sümaa nünüiki Maleiwa nnojoluichipa süpüla katüin noʼu waneepia, akaʼaya na wayuukana. Anuu sünüiki tü Bibliakat: «Kaainjalashi Adán nuulia Maleiwa sükajee niyouktajaain sümaa nünüiki nümüin. Ouktakalaka nia saaliijee. Je sükajee kaainjalain Adán, oʼttüsü wayuu ütamüinreʼeya sünain kaainjalaa. Ouktakalaka naya saaliijee» (Roma 5:12). Jamüshijaʼa kamojurale wanee wayuu, kamojuleena na nüchonniikana nünainjee. Müsia tü alatakat wamüin waya nuuʼuliwoʼukana Adán, laülaashii jee outushii waya sünainjee naainjala Adán.

Tü naaʼinrüitkat Maleiwa süpüla nükaalinjain waya.

Anuu sünüiki tü Bibliakat: «Süka alin maʼin nüpüla Maleiwa na wayuukana, naapüin nikii chi waneeshikai Nüchon süpüla nnojoliinjanain outuin na eʼitaakana naaʼin nünain otta süpüla katüinjatüin noʼu waneepia» (Juan 3:16, TNM). Nuluwataain Maleiwa Jesuu yaa mmapaʼamüin süpüla outajachin nia waaʼu. Jülüjataa waaʼin tü nümakat wanee wayuu süchiki tü naaʼinrakat Maleiwa, Prabhakar nünülia, 86 nuuyase jee kepiashi nia chaa India. Müshi nia: «Tayaawata aaʼu alin maʼin taya nüpüla Jeʼwaaa sutuma tü naaʼinrakat. Sutuma alin taya nüpüla taʼatapajüin katüinjatüin toʼu waneepia».

Eesü süpüla kojutuin wamüin tü naaʼinrakat Maleiwa wapüleerua.

Saashin tü Bibliakat kojuteerü wamüin tü naaʼinrakat Maleiwa wapüleerua müleka jaa wamüle «sümüin tü nuluwataakat anain waya» (1 Juan 2:3). Nikirajüin waya Jeʼwaa süka anakalü akuwaʼipa süpüla talatüinjanain waya maaʼulu (Isaías 48:17, 18, noota). Nnojotsü keeʼireein naaʼin Maleiwa müliainjanain waya. Müsüjeseʼe nüküjain wamüin talateenain waya woonoole sümaa nünüiki maaʼulu otta kateerüin woʼu süpüla kaʼikat süpüshuaʼa.

WAASHAJEʼERA TÜ BIBLIAKAT WEINSHI

Tü perümeerakat eirakaasü iipünaamüin süchikijee saashajeʼerüin wanee pütchi suluʼu tü Bibliakat soʼu shikaain. — Oʼttaajeena waya sajaʼttinnapa tü kasakat süpüshuaʼa wachuntule kaalinwaa nümüin Maleiwa jee waaʼinrüle tü nüchekakat wapüleerua.

Süpüla katüinjatüin woʼu, eküinjana waya soʼukaiwai. Anuupejeʼe nünüiki Jesuu: «Nnojotsü shiain sümüiwa tü pankat katüin atüma soʼu wayuu, kateerü oʼu shiaya sütüma süpüshua tü nünüikikat chi Maleiwakai» (Mateo 4:4).

Ashajünüsü nünüiki Maleiwa suluʼu tü Bibliakat. Sümaʼinruʼu wekirajaain sünain, watüjaweerü aaʼu tü kasa naaʼinrakat Maleiwa sümaiwa, maaʼulu jee müsia mapeena.

WACHUNTA KAALINWAA NÜMÜIN MALEIWA

Waainjeere tü nümakat Maleiwa wamüin, ¿kasa waaʼinrajatka kapüleere wamüin wooʼulaain suulia tü kasa nnojotkalü anain nuʼupala? Wanee kasa waaʼinrajatka shia weʼraajüle maʼin nukuwaʼipa Maleiwa.

Waashajaa süchiki tü saaʼinrakat wanee wayuu, Sakura wameetka amüin. Nnojotsü shiisattüin sukuwaʼipa nuʼupala Maleiwa. Shiasaʼa shikirajaapa sünain tü Bibliakat sütüjaa aaʼu wanee kasa nuchuntaka Maleiwa, tü makat: «Jalia jia suulia juʼluwajiraain jukuaippa sümaa wayuu jierü otta wane jierü nümaa wane toolo» (1 Corinto 6:18). Suchuntaka kaalinwaa Sakura nümüin Maleiwa jee suʼwanajaain sukuwaʼipa. Süchecherüinjatpejeʼe saaʼin suulia tü kasa mojusü suchuntaakat saaʼin. Anuu sünüiki: «Süntajaapa kasa mojusü tekiiruʼu, taküjain shia nümüin Jeʼwaa süka isain tachiki tachecherüin taaʼin tamüiwaʼa. Aleewasü maʼin taya nümaa Jeʼwaa süka toʼuraajüin nümüin». Watta maʼin saalii wayuu eʼraajaka nukuwaʼipa Maleiwa maʼaka saaʼin Sakura jee nükaalinjain Maleiwa naya süpüla naʼwanajaain nakuwaʼipa jee keisalain naya sümüin nakuwaʼipa nuʼupala (Filipos 4:13).

Sümaʼinruʼu weʼraajüin nukuwaʼipa Maleiwa, niʼraajeerü wakuwaʼipa jee aleeweena waya nümaa (Galacia 4:9; Salmo 25:14). Sutuma tia, oʼttaajeena waya sajaʼttinnapa tü kasakat süpüshuaʼa jee kateerü woʼu waneepia suluʼu tü mma jeket eejeetkat nutuma Maleiwa. ¿Kasa eejeetka suluʼu tia mmakat? Waashajaweerü achiki tia sünain tü wane pütchikat.

a Jeʼwaa nünülia Maleiwa saashin tü Bibliakat.