«Ayata jütütüleʼerajiraain jaaʼin»

1. Saashin 1 Tesalónica 5:11, ¿kasa waaʼinrajatka wapüshuaʼa?

¿EEINNA akumajüin jee anoutuin waya Piichi Outkajaalee? Mülejeʼe tia, eesüjaʼa sotule waaʼin tü palajatkat wakua sünain outkajawaa suluʼu tia piichikat, waapashaatain maʼin analuʼut nümüin Jehová saaʼu tia. Eesüjaʼa talatüle maʼin waaʼin sümaa waʼyalajeematüin sümaʼinruʼu weeʼirajüin tü palajatkat jayeechi. Shiimainña kojutuin maʼin Jehová atumawaa wanaa sümaa wakumajüin Piichi Outkajaalee anaka maʼin ayolojo. Kojutpejeʼe maʼin nia sünainjee wanee kasa aaʼinnaka, tia shia wanaa sümaa watütüleʼerüin naaʼin na wayuu outkajaakana suluʼu tia piichikat. Shiaʼaya jülüjaka naaʼin tia chi aluwataaushikai Pablo wanaa sümaa nüshajüin tü pütchi «jütütüleʼerajiraain jaaʼin» makat suluʼu 1 Tesalónica 5:11, TNM (paashajeʼera). Tü pütchikat «atütüleʼeraa aaʼin» makat, «akumajaa kasa» maluʼulu shia suluʼu griego.

2. ¿Kasa wekirajaainjatka anain sünain ekirajaayakat tüü?

² Süpüla watütüleʼerüinjatüin naaʼin na wawalayuukana, jülüjainjatü waaʼin tü naaʼinrakat chi aluwataaushikai Pablo. Nütüjaa aaʼu Pablo jamüin naaʼin na waneinnua. Sünain ekirajaayakat tüü, wekirajaweerü anain tü naaʼinrakat Pablo süpüla nütütüleʼerüin naaʼin na anoujashiikana soʼunnaa neʼrüin müliaa, süpüla anajiraainjanain naya otta süpüla nakooʼomüinrüin nanoula nünain Jehová. Anashii wekirajaale sünain tü naaʼinrakat Pablo süpüla washatüin nukuwaʼipa (1 Cor. 11:1).

ATÜTÜLEʼENNÜSÜ NAAʼIN NA ANOUJASHIIKANA NUTUMA PABLO

3. ¿Kasa naaʼinmaaka maʼin Pablo?

³ Aishii maʼin na anoujashiikana nüpüla Pablo. Saaʼujee wainmain tü müliaa niʼrakat Pablo, atüjashi nia amüliajaa wayuu otta niyaawata aaʼu jamüin saaʼin wayuu shiʼrapa müliaa. Soʼu wanee kaʼi manneetsesai nia, niʼyataakalaka süpüleerua tü choʼujaakat nümüin otta tü choʼujaakat namüin na naʼaleewainyuukana (Aluw. 20:34). Aʼyataashi nia sünain aainjaa loona. Nüntapa Corintomüin, aʼyataashi nia nümaa Áquila otta Priscila, aainjashii naya loona wanaa nümaa. Soʼu tü kaʼi neemeraakalü oʼu na judíokana, aküjawaishi pütchi Pablo namüin na judíokana otta namüin na griegokana. Shiasaʼa nüntapa Silas otta Timoteo, oʼttushi Pablo sünain aküjaa waneepia süchiki tü Nünüikikat Maleiwa (Aluw. 18:2-5). Nütüjaa aaʼu Pablo shiainjatüin naaʼinmaain waneepia tü niʼyataainkat nümüin Maleiwa. Süka wayuuin tütüshi Pablo, kaawainsü tü nünüikikat namüin na anoujashiikana. Müsüjeseʼe nütütüleʼerüin naaʼin süpüla naaʼinmaainjatüin tü aʼwaajaakat Maleiwa suulia shapaain maʼin naaʼin saaʼujee tü alatakat namüin otta saaʼujee tü choʼujaakat sümüin napüshi (Filip. 1:10, TNM).

4. ¿Kasa naaʼinraka Pablo nümaa Timoteo süpüla nakaalinjain na anoujashiikana soʼunnaa müliain naya atumawaa?

⁴ Süchikijeechon nekerotuin waneinnua wayuu sünain anoujaa chaa Tesalónica, müliashii naya atumawaa. Nayasaʼa waneinnua wayuu eʼrüliikana wayumüin süka nnojoliin nantüin nünain Pablo nümaa Silas, nataʼülakalaka waneinnua anoujashii süpüla namaainjanain naya namaʼanamüin «na laülaayuukana suluʼu tü pueulokat». Müshii naya nekiiseruʼu: «Napüshuaʼa nayakana, neʼra amüinrü tü nuluwataakat anain chi romano laülaashikai saaʼu mmakat süpüshuaʼa, chi Césarkai» (Aluw. 17:6, 7). Mmotkajasaʼa naaʼin na anoujashii jekenakana sutuma müliain naya natuma na wayuu kottiraakana namaa suluʼu tia pueulokot. Saaʼujee tia alatakat, eesü süpüla sümalajaain tü naʼyataainkat nümüin Jehová. Nnojotpejeʼe keeʼireein naaʼin Pablo tia. Mayaainjeʼe nuʼunuin Pablo nümaa Silas suluʼujee tia pueulokot, nachajaainña sukuwaʼipa süpüla nakaalinjain naya anoujashiikana. Anuu nünüiki Pablo namüin: «Wajütüin jünainmüin chi wawalakai Timoteo süpüla nüchecherüinjatüin jaaʼin sünain anoujaa. [...] Eesü waaʼin jaaʼu suulia juuʼulaain suulia anoujaa sükajee jainkuuin aaʼin sütüma tü müliaa jiʼrakat sünainjee tü junoulakat» (1 Tes. 3:1-3). Eeshijaʼa müliale maʼin atumawaa Timoteo sümaʼinruʼu chajachin nia kepiain Listra. Niʼrüin tü naaʼinrakat Pablo süpüla nütütüleʼerüin naaʼin na anoujashii kepiakana suluʼu tia pueulokot otta tü naaʼinrakat Jehová süpüla nükaalinjain naya. Müsüjeseʼe eein süpüla nüküjain Timoteo namüin na anoujashiikana aneenain naya (Aluw. 14:8, 19-22; Heb. 12:2, TNM).

5. ¿Jamüsü nukuwaʼipa Bryant sutuma nükaalinjain nia wanee laülaashi?

⁵ ¿Kasa amaa naaʼinraka Pablo süpüla nütütüleʼerüin naaʼin na anoujashiikana? Nüleʼejapa Pablo nümaa Bernabé nachikuaʼa Listramüin, Iconiomüin otta Antioquíamüin, naneeküin waneinnua wayuu süpüla laülaashiinjanain naya napüleerua na anoujashiikana (Aluw. 14:21-23). Wainma na anoujashii natütüleʼerakana aaʼin maʼaka naaʼinrüin shia na laülaashiikana maaʼulu. Anuu nünüiki wanee wawala kanüliakai Bryant: «Wanaa sümaa 15 touyase oʼunushi chi tashikai piichipaʼajee otta ojuʼitinnüsü tü teikat naʼakajee na wawalayuukana. Mojushaatasü maʼin taaʼin, müshi tamüiwaʼakai taaʼin sutuma tia». ¿Kasa atütüleʼeraka naaʼin soʼunnaa tia? Anuu sooʼomüin nünüiki: «Eeshi wanee laülaashi Tony nünülia, aashajaʼawaishi nia tamaa. Eeshi naashajaale tamaa sünain tü outkajawaakat. Akuentajawaishi nia tamüin nachiki waneinnua wawalayuu talatakana aaʼin mayaainjeʼe wainmain tü müliaa neʼrakat. Naashajeʼerüin tamüin tü sümakat Salmo 27:10 otta aashajaʼawaishi nia tamaa nüchiki Ezequías, chi wayuu waneepiakai nümaa Jehová mayaainjeʼe nnojoluin anain nukuwaʼipa chi nüshikai nüpüleerua». ¿Jamakaʼa nukuwaʼipa Bryant sutuma nükaalinjünüin? Müshi nia: «Sutuma nükaalinjain taya Tony, aʼyataashi taya mapa waneepia nümüin Maleiwa. Talatakalaka taaʼin sutuma tia». Jiakana laülaashiikana, jütütüleʼera naaʼin na wawalayuu choʼujaakana amüin sütütüleʼennüin naaʼin (Prov. 12:25).

6. ¿Jamüsü nüküjaka Pablo namüin na anoujashiikana süchiki sukuwaʼipa nanoula na wayuu namaiwajanakana?

⁶ Nüsoʼira aaʼinchii Pablo na anoujashiikana süchiki sukuwaʼipa nanoula na wayuu alatakana süchikumüin tü müliaa neʼrakat sutuma nükaalinjain naya Jehová (Heb. 12:1, TNM). Nütüjaa aaʼu Pablo atütülaajeerüin naaʼin naya anoujashiikana sutuma sukuwaʼipa nanoula na wayuu namaiwajanakana otta süpüla naaʼinmaain maʼin naʼyataain nümüin Jehová (Heb. 12:22, TNM). Müshiʼiya wayakana, sütütüleʼerüinña waaʼin nakuwaʼipa. ¿Aashin atütülaain waaʼin waashajeʼerapa tü naaʼinrakat Jehová süpüla nükaalinjain Gedeón, Barac, David, Samuel otta waneinnua anoujashii? (Heb. 11:32-35). Akaʼaya maaʼulu, atütülaasia waaʼin sutuma sukuwaʼipa nanoula na wawalayuukana. Eejeere sukumajünüin tü waʼyataainkat wainma na wawalayuu aluwataakana karaloʼuta eere naküjain sükatchinraain nanoula sutuma naashajeʼerüin tü nachikimaajatkat na wawalayuu waneepiakana nümaa Jehová.

NÜKAALINJAIN PABLO NA ANOUJASHIIKANA SÜPÜLA ANAJIRAAIN NAYA

7. ¿Kasa watüjaka sünainjee tü nümakat Pablo suluʼu Roma 14:19-21?

⁷ Wanee kasa waaʼinrajatka süpüla watütüleʼerüin naaʼin na wawalayuukana shia anajiraale waya namaa. Nnojoishii waya aʼülüjiraain sutuma naatawalin tü jülüjakat waaʼin, anale saashin tü Bibliakat tü aainjünakat, nnojoishii waya macheʼein süchiirua tü wamakat. Waashajaa süchiki tü alatakat namüin na anoujashii chajanakana Roma. Eejana anoujashii judío otta nnojoliikana judíoin. Süka nnojoluitpain choʼujaain maʼin naaʼinrüin tü pütchi aapünakat nümüin Moisés, nnojoluitpa apülajünüin noulia waneirua eküülü (Mar. 7:18, 19). Eeshii waneinnua anoujashii judío nnojoliikana mojushiin amüin neküin tü eküülü apülajünapuʼukat noulia. Eepejeʼe na mojushiikana amüin tia. Nnojoishii paaʼinwajiraain naya saaʼujee tia. Anuukalaka nünüiki Pablo namüin na anoujashiikana: «Müleka kaainjarale nia sütüma weküin asalaa, nnojotsü weküinjatüin shia. Müleka kaainjarale nia sütüma wasüin wiino, nnojotsü wasüinjatüin shia» (paashajeʼera Roma 14:19-21). Sükajee tia nümakat Pablo namüin na anoujashiikana, nayaawata aaʼu mojeerüin nakuwaʼipa otta mojeerüin nakuwaʼipa namaa na wane anoujashiikana mojujiraale naya. Jülüjasü naaʼin Pablo nakuwaʼipa na waneinnua suulia naaʼinrajüin wanee kasa mojushiijeetka namüin (1 Cor. 9:19-23). Maʼaka naaʼin Pablo, eesü süpüla watütüleʼerüin naaʼin na waneinnua otta anajiraain waya namaa nnojoliire waʼülüjiraain saaʼujee macheʼein waya süchiirua tü wamakat.

8. ¿Kasa naaʼinraka Pablo süpüla nukumajirüin sukuwaʼipa wanee kasa alataka namüin na anoujashiikana?

⁸ ¿Kasa waaʼinrajatka nnojorüle wanaawain tü jülüjakat waaʼin süchiki wanee kasa? Anasü waaʼinrüle tü naaʼinrakat Pablo süpüla anajiraain waya. Naʼakajee na anoujashii eejanakana nükalioʼu Pablo, apüleeruaanüsü naaʼin na nnojoliikana judíoin süpüla suchotoonuin süta nakorolo nekerotule sünain anoujaa. Eesüjaʼa naaʼinrüle tia suulia mojuin sünüiki wayuu nachiki (Gal. 6:12). Mayaainjeʼe niyoutuin Pablo tü namakat naya anoujashiikana, nnojotsü naaʼinrüin tü anakat saaʼin nümüin. Tü naaʼinrakat shia nuʼunuin namaʼanamüin na aluwataaushikana otta na laülaashii chajanakana Jerusalén süpüla nakumajüin sukuwaʼipa tia (Aluw. 15:1, 2). Sutuma müin sukuwaʼipa nutuma Pablo, anajiraashii otta talatajiraashii na anoujashiikana (Aluw. 15:30, 31).

9. ¿Kasa waaʼinrajatka süpüla washatüin nukuwaʼipa Pablo?

⁹ Nnojoliire paaʼinwajiraain waya sünain wanee kasa, wachunta kaalinwaa namüin na wawalayuu nüneekakana Jehová süpüla noʼunirüin wakuwaʼipa. Tü ashajünakat suluʼu tü karaloʼuta aapünakat wamüin otta tü namakat na wawalayuu oʼunirakana sukuwaʼipa waʼyataain, naküjain tü anakat süpüla waaʼinrüin wanaapünaa sümaa tü sümakat tü Bibliakat. Jüüjüüle waya sümüin tü aküjünakat wamüin suulia woʼunuin süchiirua tü anakat neʼe saaʼin wamüin, paaʼinwajiraajeena waya namaa na wawalayuukana.

10. ¿Kasa amaa naaʼinraka Pablo süpüla anajiraainjanain na anoujashiikana?

¹⁰ Eesü wanee kasa naaʼinraka Pablo süpüla paaʼinwajiraain na anoujashiikana. Nüküjain tü kasa anakat natuma na anoujashiikana suulia tü kasa mojukat natuma. Sajaʼlajaayamüin tü karaloʼuta nüshajakat namüin na anoujashii chajanakana Roma, nüküjain tü kasa anasü naaʼinrakat waneinnua anoujashii. ¿Kasa waaʼinrajatka süpüla washatüin nukuwaʼipa Pablo? Shia waküjale tü kasa anasü naaʼinrakat na waneinnua. Waaʼinrüle tia aijiraajeena maʼin na wawalayuukana otta aleewajiraajeena naya.

11. ¿Kasa waaʼinrajatka mojujiraale waya?

¹¹ Eeshii mojujiraale na wawalayuu laülaakana aaʼin sünain anoujaa saaʼujee wanee kasa jee naʼülüjaajiraale namaa na waneinnua. Alatüsü tia nümüin Pablo nümaa Bernabé, eerejeʼe aleewajiraain maʼin naya. Mojusü nümüin Pablo namaale Marcos nachikuaʼa sünain aküjaa pütchi wattapünaa. Anuu sünüiki tü Bibliakat süchiki tü alatakat: «Eekalaka natüma wane mojujirawaa miyoʼu sütümajee tia» (Aluw. 15:37-39). Nukumajapejeʼe Pablo, Bernabé otta Marcos sukuwaʼipa tia mojujirawaakat. Atüjaana aaʼu sünainjee tü naaʼinrakat shiain anain namüin anajiraain jee paaʼinwajiraain na anoujashiikana. Shiasaʼa mapa, anasü nünüiki Pablo nüchiki Bernabé otta nüchiki Marcos (1 Cor. 9:6; Col. 4:10). Müshiʼiya wayakana, wakumajamaatüinjatü sukuwaʼipa wanee mojujirawaa namaa na wawalayuukana otta jülüjainjatü waaʼin tü kasa anasü naaʼinrakat. Waaʼinrüle tia, anajiraajeena otta paaʼinwajiraajeena waya (Éf. 4:3, TNM).

NÜKAALINJAIN PABLO NA ANOUJASHIIKANA SÜPÜLA NAKOOʼOMÜINRÜIN NANOULA

12. ¿Kasa alataka namüin na wawalayuukana maaʼulu yaa?

¹² Watütüleʼerüin naaʼin na wawalayuukana wakooʼomüinrüle nanoula. Eeshii wawalayuu meeʼerapalakana natuma na napüshi manoujainkana, na aʼyataajiraakana namaa otta na koleejiajiraakana namaa. Eeshii na ayuuikana maʼin otta na mojukana aaʼin saaʼujee wanee kasa alataka namüin. Eeshii na kakaliainnakana woutiisain sümaa mojuin naaʼin sutuma nnojoluin süntamaatüin nükalia Maleiwa. Süpüshuaʼa tia makat, eesü süpüla sümalajaain nunoula wanee anoujashi sutuma. Eeshii na anoujashii namaiwajanakana alatakana amüin tia. ¿Kasa naaʼinraka Pablo süpüla nütütüleʼerüin naaʼin naya anoujashiikana?

13. ¿Kasa nükaalinjaka akajee Pablo na meeʼerapalakana saaʼujee nanoujain?

¹³ Nukooʼomüinrüin Pablo nanoula na anoujashiikana sükajee tü Nünüikikat Maleiwa. Eesüjaʼa isale nachiki na anoujashii judíokana jamüinjatüin nanüiki süküjünapa namüin shiain alanaʼaleein tü nanoujakalü anain na judíokana suulia tü nanoujakalü anain na anoujashiikana. Atütülaakajasaʼa naaʼin naya anoujashiikana sutuma tü karaloʼuta nüshajakat Pablo namüin na hebreokana (Heb. 1:5, 6; 2:2, 3; 9:24, 25). Naya anoujashiikana eesü süpüla naashajaain süchiki tü akuwaʼipaa nikirajakalü anain Pablo süpüla nnojoluinjatüin jamüin nanüiki na wayuu ayoujakana naya. ¿Jama wayakana? ¿Kasa waaʼinrajatka süpüla wakaalinjain na wawalayuu meeʼerapalakana natuma na waneinnua? Wakaalinja naya süpüla natüjain asoutaa namüin na asakitkana naya süchiirua tü nanoujakalü anain sükajee tü karaloʼuta eekat natuma na Aküjaliikana pütchi. Sükajee tü poyeetokot ¿Es la vida obra de un Creador? otta El origen de la vida. Cinco cuestiones dignas de análisis, eeshii süpüla wakaalinjain na jimaʼaliikana otta na majayünnüükana süpüla natüjaain saaʼu jamüin niaka Maleiwa kakumalain kasa süpüshuaʼa.

14. ¿Kasa naaʼinraka Pablo mayaainjeʼe wainmain tü naaʼinrakat sünain aküjaa pütchi otta ekirajaa wayuu?

¹⁴ Nüküjain Pablo namüin na anoujashiikana aijiraainjanain naya sümaa naaʼinrüinjanain kasa anasü napüleerua na waneinnua (Heb. 10:24). Nnojotsü nütütüleʼerüin neʼe naaʼin sükajee nünüiki, nütütüleʼerüinña naaʼin sükajee tü naaʼinrakat napüleerua. Eejatüinka wanee jamü antaka nanainmüin na anoujashii chajanakana Judea. Niakalaka Pablo akumajüin sukuwaʼipa süpüla nükaalinjain naya (Aluw. 11:27-30). Mayaainjeʼe wainmain tü naaʼinrakat Pablo sünain aküjaa pütchi otta ekirajaa wayuu, ayatüsia nüchajaain maʼin sukuwaʼipa süpüla nükaalinjain na anoujashii maʼletsekana (Gal. 2:10). Saaʼujee tü naaʼinrakat nütütüleʼerüin naaʼin na anoujashiikana süpüla neʼitaainjatüin naaʼin sünain naaʼinmajeenain naya Jehová. Müsia maaʼulu yaa, watütüleʼerüin naaʼin na wawalayuukana walatirüle kaʼi namaa, wakaalinjale naya soʼunnaa kasa mojusü otta wasülajawaire nneerü süpüla tü aküjaakat pütchi sainküin mma. Saaʼujee waaʼinrüin tia, watütüleʼerüin naaʼin süpüla neʼitaainjatüin naaʼin sünain naaʼinmajeenain naya Jehová waneepia.

15, 16. ¿Kasa waaʼinrajatka napüleerua na wawalayuu eemiajaakana anoula?

¹⁵ Nnojoishi niyüülajüin Pablo na anoujashii eemiajaakana anoula. Nümüliajüin naya otta nüküjain pütchi atütüleʼeraka naaʼin (Heb. 6:9; 10:39). «Müshiʼiya wayakana», müsü nünüiki Pablo kojuyatua suluʼu tü karaloʼuta nüshajakat namüin na anoujashii hebreokana süpüla nayaawatüin saaʼu naaʼinrüinjatüin Pablo wanaa namaa tü nümakat namüin (Heb. 2:1, 3). Maʼaka naaʼin Pablo, nnojoishii wayüülajüin na wawalayuu eemiajaakana anoula. Tü waaʼinrakat shia watütüleʼerüin naaʼin otta waküjain namüin alin naya wapüla. Sotuinjatpejeʼe waaʼin nnojoluinjatüin anain neʼe wanüiki namüin, kamaneeinjanaʼaya waya namüin waashajaapa namaa.

¹⁶ Nüküjain Pablo namüin na anoujashiikana nnojoluin motuin naaʼin Jehová tü kasa anasü naaʼinrakat (Heb. 10:32-34). Eesü süpüla waaʼinrüin tia wanaa sümaa wakaalinjain wanee wawala eemiajaakai anoula. Eeshii süpüla yootuin waya nümaa süchiki jamakuwaʼipalin nia süpüla nunoujain jee wasakirüle nia süpüla sotuinjatüin naaʼin tü naaʼinrakat Jehová süpüla nükaalinjain nia soʼunnaa müliaa. Soʼunnaa tia, waküja nümüin nnojoluin motuin naaʼin Jehová tü kasa anasü naaʼinrakat paala otta nnojoleechin motuin nia naaʼin mapeena (Heb. 6:10; 13:5, 6). Waaʼinrüle tia, eesü süpüla sütütülaain naaʼin na wawalayuukana süpüla naʼyataain nachikuaʼa nümüin Jehová.

«AYATAʼAYA JÜTÜTÜLEʼERAJIRAAIN JAAʼIN»

17. ¿Kasa waaʼinrajatka süpüla watütüleʼerüin naaʼin na waneinnua?

¹⁷ Atüjashi shiʼipaʼaya mapa wanee wayuu sünain akumajaa piichi. Akaʼaya wayakana, atüjeena waya shiʼipaʼaya watütüleʼerüin naaʼin na waneinnua. Watütüleʼera naaʼin na wawalayuukana süpüla nachecherüin naaʼin soʼunnaa tü müliaa neʼrakat, waashajaa namaa nachiki na aʼyataapuʼukana nümüin Jehová achechetkana naaʼin soʼunnaa müliaa. Wachajaain sukuwaʼipa anajirawaa namaa na wawalayuukana wanaa sümaa waküjain süchiki tü kasa anasü naaʼinrakat otta wanaa sümaa wakumajamaatüin sukuwaʼipa wanee mojujirawaa. Wakooʼomüinra nanoula na wawalayuukana sükajee waashajaain namaa süchiki tü sümakat tü Bibliakat, sükajee waainjain kasa napüleerua otta sükajee wakaalinjain na eemiajaakana anoula.

18. ¿Kasa ayatüinjatka waaʼinrüin?

¹⁸ Talatüshii maʼin na aʼyataakana sünain akumajaa piichi eere nuʼwaajünüinjachin Maleiwa. Müshiʼiya wayakana, eesü süpüla talatüin waaʼin wakaalinjale na wawalayuukana süpüla katchin nanoula. Jamüsüjaʼa wanee piichi amojujaasü shiʼipaʼaya, eekajasaʼa tü waaʼinrakat napüleerua na wawalayuukana süpülajatü kaʼikat süpüshuaʼa. Ayataʼaya waaʼinrüin tü sümakat 1 Tesalónica 5:11: «Ayata jütütüleʼerajiraain jaaʼin sümaa jükaaliinjiraain maʼaka jaaʼinrüin müinmaʼa yaa».