Nnojotsü kasain isain nüchiki Jehová

1. ¿Jamüsü watüjaakaʼa saaʼu kanoulain maʼin Moisés nünain Jehová wanaa sümaa niyuʼluin na israelitakana Egiptojee?

ASHAJÜNÜSÜ suluʼu tü karaloʼutakat namüinjatka na hebreokana nachiki wainma wayuu kanoulakana maʼin nünain Jehová. Wanee nia Moisés, kanoulashi maʼin nia (Heb. 3:2-5; 11:23-25). Niiʼiyatüin kanoulain maʼin nia wanaa sümaa niyuʼluin na israelitakana Egiptojee. Nnojoishi mmoluin nia neema chi Faraónkai jee neema na nusurulaatsekana, kanoulashi maʼin nia nünain Jehová jee nuʼunirüin na israelitakana pasanainpünaa sünain tü palaa Ishosükat jee isashiipaʼapünaa (Heb. 11:27-29). Mayaainjeʼe wainmain na israelita manoujainkana sünain naaʼinmajeena naya Jehová nnojotsü müin nukuwaʼipa Moisés maʼaka naaʼin nayakana. Kanoulashi maʼin nia jee nnojoishi niyüülajüin nia Jehová. Naapüin Jehová tü kasa choʼujaakat namüin na israelitakana: tü neküinjatkat, tü wüin nasüinjatkat süpüla katüinjatüin noʼu chaa isashiipaʼa (Éx. 15:22-25; Sal. 78:23-25).a

2. ¿Jamüshi nüsakitkaʼa Jehová Moisés sünain tü pütchi sümakat Números 11:21-23?

² Maʼaka wanee juya süchikijee nojuʼitüin na israelitakana Egiptojee nüküjain Jehová namüin eküinjanain asalaa naya nutuma. Mayaainjeʼe kanoulain maʼin Moisés wainmajüsü naaʼin sünain nikeraajeerüle Jehová tü nümakat namüin na israelitakana, jama wainmain naya. Anuujeseʼe nünüiki Jehová nümüin Moisés: «¿Eesüche tü kasa isakat nüchiki Jehová?» (paashajeʼera Números 11:21-23). Tü pütchi «¿Eesüche tü kasa isakat nüchiki Jehová?» makat, nnojotsü kasain isain nüchiki saaʼinrüin tü najapükat Jehová, maluʼulu sutuma tü pütchikat hebreo. Tü nüküjeekalü achiki Jehová nümüin Moisés shia nuuntuin naaʼinrüin Jehová süpüshuaʼa tü kasa keeʼireekat naaʼin sükajee tü nüpülainkat.

3. ¿Jamüsü anakaʼa wekirajaale süchiki nukuwaʼipa Moisés jee süchiki nakuwaʼipa na israelitakana?

³ ¿Eeirü püsakireʼerüin paaʼin sünain naapeerüin Jehová tü kasa choʼujaakat pümüin otta sümüin püpüshi? Anashii wekirajaale süchiki nukuwaʼipa Moisés otta süchiki nakuwaʼipa na israelitakana wanaa sümaa nnojoluin nanoujain maʼin sünain naapeerüin Jehová tü kasa choʼujaakat namüin. Wekirajaajeerü anain sünain waneirua pütchi suluʼujeejatkat tü Bibliakat akatsüinreetka maʼin wanoula sünain nnojoluin eein wanee kasa isaka nüchiki Jehová.

TÜ WATÜJAKAT SÜNAINJEE NUKUWAʼIPA MOISÉS OTTA NA ISRAELITAKANA

4. ¿Jamüshii kojuyakaʼa na israelita nnojoliikana nanoujain maʼin sünain naaʼinmajeenain naya Jehová?

⁴ ¿Jamüshii kojuyakaʼa na israelita nnojoliikana anoujain maʼin sünain naaʼinmajeenain naya Jehová? Kojuya na israelita ojuʼitakana suluʼujee Egipto namaʼaleeya waneinnua wayuu suluʼujeejanakana wanee mma naata jee kojuya naya kaʼi sünain nalatirüin tü isashiipaʼakat süpüla nantajanain suluʼumüin tü mma naapajatkat Maleiwa namüin (Éx. 12:38; Deut. 8:15). Akulajaasü maʼin naaʼin na wayuu naatajanakana oumain sünain ekaa maná. Müshia na israelitakana, aʼyounalaashii naya wanaa namaa (Núm. 11:4-6). Nekeein maʼin tü nekapuʼukat chaʼayaa Egipto. Sutumajee süpüleeruaanüin maʼin naaʼin Moisés natuma naya wayuukana jülüjasü naaʼin niainjachin achajaain tü asalaa neküinjatkat (Núm. 11:13, 14).

5, 6. ¿Jamüsü nnojotkaʼa anain washatüle nakuwaʼipa na israelita wanaawakana aaʼin namaa na wayuu naatakana oumain?

⁵ Na wayuu naatajanakana oumain nnojotsü kojutuin namüin tü kasa naaʼinrakat Jehová napüleerua, wanaawaka na israelitakana namaa. Müsia neʼe maaʼulu, wainma na wayuu nnojoliikana kojutuin amüin tü naaʼinrakat Jehová. Müsüjeseʼe eejeesü maʼin waaʼin suulia müin nnojotka talatakai waaʼin sümaa tü kasa naapakat Jehová wamüin. Eesüjaʼa süpüla jülüjain waaʼin choʼujaain wamüin tü kasa eepuʼukat wamaʼana jee shiale wachunjain aaʼin saaʼujee tü kasa eekat namaʼana na waneinnua. Aneerü maʼin wakuwaʼipa talatüle waaʼin sümaa tü kasa eekat wamaʼana.

⁶ Sotuinjatü naaʼin na israelitakana tü nüküjatüjülia Jehová namüin süchiki neʼreenain kasa anasü nutuma chapa naya suluʼu tü mma naapajatkat namüin, nnojotsü shiain wanaa sümaa chajanain naya isashiipaʼa. Müsia neʼe maaʼulu yaa, nnojotsü anain müleka jülüjale waaʼin tü kasa nnojotkat eein wamaʼana. Shia anaka aluʼu jülüjale waaʼin süpüshuaʼa tü kasa anasü naapeetkat Maleiwa wamüin mapeena otta müsia anasü müleka wekirajaale sünain tü pütchi suluʼujeejatkat tü Bibliakat akaalinjeenaka waya süpüla wakatchinrüin wanoula nünain Jehová.

7. ¿Jamüsü watüjaakaʼa saaʼu nnojoluin kasain isain nüchiki Jehová?

⁷ ¿Jamüsü nüküjakaʼa Jehová nümüin Moisés pütchikat tüü: «Eesüche tü kasa isakat nüchiki Jehová»? Nüküjain Jehová tia nümüin Moisés süpüla niyaawatüinjatüin saaʼu pülashin maʼin nia, jaʼitaichi wattain maʼin wanee wayuu naapüin Jehová tü nüpülainkat nümüin. Mayaainjeʼe wattain na israelitakana chayaa isashiipaʼa naapüin Jehová namüin tü asalaa neküinjatkat. Niiʼiyatüin Jehová pülashin maʼin nia otta eein süpüla nükaalinjain na aʼyataashiikana nümüin jaʼitainna jalain maʼin naya (Sal. 136:11, 12). Wanaa sümaa sülatüin kasa mojusü wamüin sotuinjatüin waaʼin nükaalinjeenain waya Jehová jaʼitainna jalain maʼin waya (Sal. 138:6, 7).

8. ¿Kasa waaʼinrajatka süpüla nnojoluin washatüin nakuwaʼipa na israelitakana? (Piirakaa sümüin tü ayaakuaakat).

⁸ Nikeraajüin Jehová tü nümakat namüin na israelitakana müsüjeseʼe naapüin namüin wainma codorniz süpüla neküinjatüin. Nnojotpejeʼe kojutuin namüin na israelitakana tü kasa pülasü naainjakat Jehová napüleerua. Eeshii na israelita alatirakana wanee kaʼi shiatapünaamüin sünain akotchojoo wainma codorniz mayaainjeʼe nnojoluinjatüin neküin shia süpüshuaʼa soʼu kaʼikat tia. Jashichishi maʼin Jehová namüin süka jülüjain neʼe naaʼin nakuwaʼipa namüiwaʼa. Müsüjeseʼe kasalajanaka naya sünainjee tia nutuma Maleiwa (Núm. 11:31-34). ¿Kasa watüjaka sünainjee tia? Eejeesü maʼin waaʼin suulia kachiiruain waaʼin wainmain kasa wamaʼana. Jaʼitainna washinnuule waya jee maʼletsere waya shia kojutuleeinjatka wamüin tü wakuwaʼipakat nümaa Jehová otta nümaa Jesús (Mat. 6:19, 20; Luc. 16:9). Müle shia watuma naapeerü Jehová tü kasa choʼujaakat wamüin.

9. ¿Jamüsü watüjaakaʼa saaʼu naaʼinmajeenain waya Jehová?

⁹ Maaʼulu yaa ayatüshia nükaalinjain Jehová na aʼyataashiikana nümüin. Eejeetpejeʼe wanee kaʼi maʼletseenakalü oʼu waya.b Mayaainjeʼe sülateerüin tia nnojoleena waya nüpütüin Jehová wamüiwaʼa. Naapeerü tü nüpülainkat wamüin süpüla wachecherüin waaʼin soʼutpünaa tü kasa alatakat wamüin. Anashii wekirajaale sünain tü waaʼinrajatkat süpüla kanoulain waya sünain naaʼinmajeenain waya Jehová aipa shiiʼiree aʼyatawaa jee tü waaʼinrajatka maaʼulu süpüla eeinjatüin wamaʼana tü kasa choʼujaajeetkat wamüin laülaapeena waya.

AIPA SHIIʼIREE AʼYATAWAA

10. Sutuma suʼwanajaʼalaa sümeerüin sukuwaʼipa tü mmapaʼakat, ¿kasa tü kapüleejeetkat maʼin wamüin süpüla wousütüin?

¹⁰ Sutuma sülüʼülüin maʼin sükalia süpüla sajaʼttüin tü kasa alatajatkat sainküin mma, kapüleejeerü maʼin wousütüin tü kasa choʼujaakat wamüin. Eesüjaʼa nnojolüjaʼa sümüle tü aʼyatawaakat jee wapütüinjatüle tü kasa eekat wamaʼana sutumajee sumojujaain sukuwaʼipa tü mmapaʼakat, eere atkawaa, sukutkujaale tü mmakat, süntüle wanee wawai jee shiale sutuma wanee ayuulii keemaka maʼin. Aʼwanajaʼalaa meerü sukuwaʼipa wanee kasa sutuma tü kasa alatakat. Sutumajee tia eesüjaʼa jülüjale waaʼin wachajaainjatüin wanee aʼyatawaa jeketü jee shiale wakolojooinjanain suluʼumüin wanee mma naata süpüla wousütajatüin tü kasa choʼujaakat sümüin wapüshi. Kanoulale waya nünain Jehová, ¿kasa waaʼinrajatka waneekapa wanee kasa?

11. ¿Kasa akaalinjeenaka waya aipa shiiʼiree nneerü? (Lucas 12:29-31).

¹¹ Wane kasa waaʼinrajatka shia waküjain nümüin Jehová süpüshuaʼa tü kasa shapaakat atuma waaʼin (Prov. 16:3). Wachunta nümüin Jehová süpüla anainjatüin süneekia watuma wanee kasa jee süpüla naapüinjatüin wamüin jimata aaʼin sümaa nnojoluin shapaain maʼin waaʼin (paashajeʼera Lucas 12:29-31). Wachunta nümüin nükaalinjainjanain waya süpüla talatüinjatüin waaʼin sümaa tü kasa eekat wamaʼana (1 Tim. 6:7, 8). Wachajaa maʼin pütchi suluʼu tü karaloʼutakalüirua akaalinjeenaka waya süpüla watüjainjanain süpüleerua wakuwaʼipa, aipa shiiʼiree nneerü. Watta saalii tü pütchi eekat süpüla wousütüin suluʼu jw.org, maʼaka saaʼin video otta karaloʼutairua aashajaaka süchiki tia.

12. ¿Kasa jülüjainjatka naaʼin wanee wawala süpülapünaa nüneeküin wanee aʼyatawaa?

¹² Eeshii na ousütüinnakana wanee aʼyatawaa jee akolojooshii wattamüin suulia napüshi. Nayaawataka saaʼu mapa nnojoluin anain maʼin tü kasa naneekakat. Waapaainjatpa wanee aʼyatawaa nnojotsü shiain jülüjainjatüin waaʼin wainmeerüin nneerü wakanajaka. Jülüjeesü waaʼin eein süpüla sümalajaain nanoula na wapüshikana wattale waya noulia (Luc. 14:28). Anasü jülüjale paaʼin tüü: «¿Jameerü takuwaʼipa sümaa taʼwayuuse toʼunule wattamüin suulia? ¿Apütaajeetche kaʼi süpüla toʼunuin sünain tü outkajawaakat, taküjain pütchi otta süpüla namaain taya na wawalayuukana?». Kachonle pia anasü müleka püsakireʼerüle paaʼin sünain tüü: «¿Jameetche nekirajia na tachooinkana wanaapünaa sümaa tü nümakat Jehová jee wanaapünaa sümaa tü nuluwataakalü anain wattale taya noulia?» (Éf. 6:4). Püneekajatpa wanee kasa anasü jülüjale paaʼin tü kasa nümakat Maleiwa, nnojotsü shiainjatüin tü namakat na püpüshikana jee na wayuu manoujainkana.c Aküjünüsü nümüin Tony, wanee wawala chejeʼewai Asia süchiki wanee aʼyatawaa anashaatasü maʼin suluʼu wanee mma naata. Süchikijee nuchuntuin nümüin Maleiwa otta yootuin nia sümaa tü nuʼwayuusekat süchiki tia nnojotsü naapaain tia aʼyatawaakat, nachajaaka sukuwaʼipa süpüla neisattüin nanneetse. Anuu nünüiki Tony: «Wainma na wayuu takaalinjakana süpüla neʼraajüinjachin Jehová otta kojutusü maʼin namüin na tachooinkana tü sümakat tü Bibliakat. Wayaawata aaʼulu naaʼinmajeena waya Jehová weʼitaale suluʼu wakuwaʼipa tü sümakat Mateo 6:33».

TÜ WAAʼINRAJATKAT SÜPÜLA EEINJATÜIN TÜ KASA CHOʼUJAAJEETKAT WAMÜIN LAÜLAAPEENA WAYA

13. ¿Kasa waaʼinrajatka maaʼulu süpüla eeinjatüin wamaʼana tü kasa choʼujaajeetkat wamüin mapa?

¹³ Anashii kanoulale waya nünain Jehová jülüjapa waaʼin tü waaʼinrajatkat süpüla eeinjatüin wamaʼana tü kasa choʼujaajeetkat wamüin laülaapeena waya. Shikirajüin waya tü Bibliakat sünain waʼyataainjanain süpüla eeinjatüin wamaʼana tü kasa choʼujaajeetkat wamüin mapa (Prov. 6:6-11). Anasü waniijale nneerü süpüla joo tü kasa choʼujaajeetkat wamüin mapa. Shiimain choʼujaain maʼin tü nneetkat wamüin, nnojotpejeʼe shiain kachiiruainjatüin maʼin waaʼin (Ecl. 7:12).

14. ¿Jamüsü katchinkaʼa waaʼin sutuma tü sümakat Hebreokana 13:5 jülüjapa waaʼin tü kasa choʼujaajeetkat wamüin laülaapeena waya?

¹⁴ Nikirajüin Jesús jameerüin nukuwaʼipa chi wayuu wainmakai amaʼana korolo sümaa nnojoluin anain nukuwaʼipa noʼuluʼu Maleiwa (Luc. 12:16-21). Nnojotsü watüjaain aaʼu jameerüin wakuwaʼipa waneemüin kaʼi (Prov. 23:4, 5; Sant. 4:13-15). Napüshuaʼa na wayuu oushikajaweekana süchiirua nukuwaʼipa Jesús choʼujaasü naawalüinjatüin tü kasa namaʼanakat (Luc. 14:33). Na anoujashii chajanakana Judea soʼutpünaa nükalia na aluwataaushikana napütüin tü kasa eejatkat namaʼana. Nnojotsü mojuin naaʼin süchiirua tia (Heb. 10:34). Müsia maaʼulu, wainma na wawalayuu ooʼuleʼennakana suulia naʼyataain jee nnojotsü saapünüin waneirua kasa namüin sutumajee nnojoliin sünainpünaain naya política (Apoc. 13:16, 17). Nanoujain sünain tü nümakat Jehová, wanaa sümaa nümüin: «Nnojoleechi pia tapütüin pümüiwaʼa» (paashajeʼera Hebreokana 13:5). Wachajaainjatüin maʼin sukuwaʼipa süpüla eeinjatüin wamaʼana tü kasa choʼujaajeetkat wamüin laülaapeena waya otta kanouleeshii maʼin waya nünain Jehová suʼwanajaʼalaa sümüle wanee kasa.

15. ¿Kasa jülüjainjatka naaʼin na anoujashii kachooinkana nepijapa nachonnii? (Piirakaa sümüin tü ayaakuaakat).

¹⁵ Suluʼu waneirua mma kachonshii na wayuukana süpüla naaʼinmajünüin natuma nachonnii laülaapa naya. Süküjapejeʼe tü Bibliakat nayainjanain na kachonshiikana aaʼinmajaka nachonnii (2 Cor. 12:14). Laülaapa wanee wayuu naya akaalinjainjachikai nia na nüchonniikana choʼujaale shia nümüin, naaʼinrajatü tia sümaa talatüin naaʼin (1 Tim. 5:4). Kachonle wanee anoujashii nekirajüin nachonnii süpüla naʼyataainjanain nümüin Jehová, nnojotsü shiain neʼitaainjatüin suluʼu nekii nachajaainjatüin wanee aʼyatawaa eere nakanajüin wainma nneerü süpüla naaʼinmajünüinjanain natuma miyoʼuyuupa naya (3 Juan 4).

16. ¿Kasa naaʼinrajatka na wayuu kachooinkana süpüla natüjainjanain süpüleerua nakuwaʼipa nachonnii miyoʼuyuupa naya? (Éfeso 4:28).

¹⁶ Jiakana kachonshiikana jükaalinja na jüchooinkana süpüla natüjainjanain süpüleerua aʼyatawaa jee tütüinjanain naya, jikiraja naya süpüla kanoulainjanain naya nünain Jehová tepichijaiwaʼaya naya (Prov. 29:21; paashajeʼera Éfeso 4:28). Jükaalinja na jüchooinkana süpüla natüjainjanain maʼin süpüleerua tü ekirajünakalü anain naya suluʼu tü koleejiakat. Pikiraja namaa sükajee tü karaloʼutakat eere wousütüin pütchi suluʼujeejatka tü Bibliakat akaalinjeenaka naya süpüla anainjatüin süneekia tü kasa nekirajaweekalü anain kettaapa natuma tü nakoleejiasekat. Anashii jikirajüle na jüchonniikana süpüla nousütüinjatüin wanee aʼyatawaa eere süpütaainjatüin kaʼi süpüla naküjainjanain pütchi jee shiale naneeküin pürekutsoolüin naya.

17. ¿Kasa watüjaaka aaʼu?

¹⁷ Na aʼyataashiikana nümüin Jehová natüjaa aaʼulu naapeerüin Jehová namüin tü kasa choʼujaakat namüin. Sutuma sülüʼülaain sükalia süpüla sajaʼttüin tü kasa alatakat sainküin mma choʼujaasü maʼin kanoulainjanain waya nünain Jehová. Jaʼitairü kapüleein maʼin tü kasa alatakat wamüin watüjaa aaʼu nükaalinjeenain maʼin waya Jehová. Nnojotsü kasain isain nüchiki Jehová jee nükaalinjeena waya jaʼitainna jalain maʼin waya.