EKIRAJAAYA 16
JAYEECHI 85 Kamaneejiraainjana waya
Aneerü wakuwaʼipa aleewale maʼin waya namaa na wawalayuukana
«Jülüja jaaʼin tüü: ¡Anashaatasü maʼin kottiraale na wawalayuukana sümaa paaʼinwajiraain naya!» (SAL. 133:1).
TÜ WATÜJEETKAT
Tü waaʼinrajatkat süpüla aleewain waya namaa na wawalayuukana otta tü kasa anasü weʼreetkat sünainjee.
1, 2. (1) ¿Kasa jülüjaka naaʼin Jehová sünain wakuwaʼipa? (2) ¿Kasa nuchuntaka Jehová wamüin?
JÜLÜJASÜ NAAʼIN Jehová jeʼtsüin wakuwaʼipa namüin na waneinnua. Nikirajüin waya Jesús alinjatüin wapüla wayuu maʼaka alin waya wapülajiraa (Mat. 22:37-39). Kamaneeinjana waya namüin na wayuu nnojoliikana anoujain wanaa wamaa, müle shia watuma washateerü nukuwaʼipa Jehová. Jamüshijaʼa nia, «nujuʼitirüin chi kaʼikai naaʼu chira wayuu eekai mojulaain jee chira eekai anamiain. Nüʼitirüin juya naaʼu chira eekai lotuin akuwaʼipa jee naaʼu chira eekai nnojoluin lotuin akuwaʼipa» (Mat. 5:45).
2 Mayaainjeʼe alin süpüshuaʼa wayuu nüpüla Jehová aireesia nüpüla na wayuu oonookana sümaa nünüiki (Juan 14:21). Nuchuntuin Jehová washatüin nukuwaʼipa, müshiijeseʼe aijiraainjanain maʼin waya namaa na wawalayuukana (1 Ped. 4:8; Roma 12:10). Alinjana maʼin wapüla na wawalayuukana, müinjatü naalin wapüla maʼaka naalin wapüla wanee waʼaleewain otta wanee wapüshi.
3. ¿Jamüinjatü sukuwaʼipa saalin wayuu wapüla?
3 Süpüla miyoʼuin wanee maata choʼujaasü shiʼyotunüin wüin saaʼu. Müsia neʼe tü wakuwaʼipakat namaa na wawalayuukana, waaʼinrüinjatü wainma kasa napüleerua süpüla kooʼomüin naalin wapüla. Anuu nünüiki chi aluwataaushikai Pablo namüin na anoujashiikana: «Ayataʼaya aijiraain jia maʼaka aijiraain wanee wayuu namaa nuwalayuu» (Heb. 13:1). Nücheküin Jehová kooʼomüinjatüin saalin wayuu wapüla. Sünain ekirajaayakat tüü, wekirajaajeerü anain jamüin anaka maʼin aleewale maʼin waya namaa na wawalayuukana otta kasain waaʼinrüinjatüin süpüla wountuin shia.
¿JAMÜSÜ ANAKAʼA ALEEWALE MAʼIN WAYA NAMAA NA WAWALAYUUKANA?
4. ¿Kasa waaʼinrajatka süpüla ayatüin kiʼrain waaʼin namaa na wawalayuukana otta kojutuin naya wamüin maʼaka süküjain shia Salmo 133:1? (Piirakaa sümüin tü ayaakuaakat).
4 (Paashajeʼera Salmo 133:1). Müsü wanüiki maʼaka saaʼin nünüiki chi salmistakai wanaa sümaa nümüin: «Anashaatasü maʼin» aleewale waya namaa na aikana apüla Jehová. Eepejeʼe süpüla motuin waaʼin tia nnojorüle jülüjain maʼin waaʼin shia. Jamüsüjaʼa niʼrüle wanee wayuu suuʼulia wanee wunuʼu eekai miyoʼuin maʼin, ponusü maʼin naaʼin shia. Eepejeʼe süpüla nnojoluin ponuin naaʼin mapa tia wunuʼukat süka jamüin, nnojoluin jülüjain naaʼin anain maʼin shia. Süpüla ayatüin kiʼrain waaʼin namaa na wawalayuukana otta kojutuin naya wamüin jülüjainjatü waaʼin tü kasa naainjakat wapüleerua otta tü kasa naaʼinrakat napüleerua na wawalayuukana.
Nnojo motuin waaʼin paaʼinwain otta aijiraain maʼin na wawalayuukana. (Paashajeʼera tü pütchikat 4).
5. ¿Kasa nayaawateetka aaʼu na wayuukana sutuma aijiraain maʼin waya?
5 Na wayuu antakana soʼu tü palajatkat nakua sünain tü outkajawaakat shia ponoko maʼin naaʼin aijiraain maʼin na wawalayuukana. Sünainjee tia nayaawata aaʼulu wayain na anoujashii shiimainkana. Anuu nünüiki Jesús: «Aijiraale jia waneʼewai jukua, shiyaawateerü aaʼu wayuu tekirajanain jia» (Juan 13:35). Anuu sukuwaʼipa wanee wayuu Chaithra sünülia. Wanaa sümaa shikirajaain suluʼu universidad oʼttusü shia sünain ekirajawaa sünain tü Bibliakat. Oʼunusü shia sünain tü outkajawaa miyoʼu apünüinkat kaʼi jee ponusü maʼin saaʼin tü shiʼrakat. Anuujeseʼe sünüiki sümüin tü wawala ekirajakat shia sünain tü Bibliakat: «Na kachonniikana taya matüjainsalii akoʼojoowaʼa tanain. Shiasaʼa soʼu tü palajatkat takua sünain tü outkajawaakat miyoʼu eejana maʼaka 52 wayuu akoʼojookana tanain sümaa nasaküin taya. Sutumajee teʼrüin taalin napüla naya wawalayuukana tayaawata aaʼu aishaatain maʼin taya nüpüla Jehová. Keeʼireesü maʼin taaʼin naʼakain taya naya wayuukana». Ayatüsü ekirajaain Chaithra sünain tü Bibliakat. Woutiisaka shia mapa soʼu 2024. Sutuma shiʼrüin wayuu anain wakuwaʼipa otta aijiraain waya eejeena na aʼyataweekana nümüin Jehová (Mat. 5:16).
6. ¿Jamüsü choʼujaakaʼa maʼin aleewain waya namaa na wawalayuukana?
6 Choʼujaasü maʼin aleewainjanain maʼin waya namaa na wawalayuukana süpüla wakaalinjiraain maʼin. Anuu nünüiki Pablo namüin na anoujashiikana: «Aluʼu shiainjaʼa anain ayatüle jükatchinjiraain jaaʼin [...], nnojoleenaka jimeejünüin jee ichein jaaʼin sutuma kaainjalain jia» (Heb. 3:13). Sümatchinjaale tü wanoulakat otta nnojorüle anain wanee kasa watuma eesü süpüla nükaalinjain waya Jehová nükajee wanee wawala (Sal. 73:2, 17, 23). Anasü waaʼin süka watüjaain saaʼu eein na wawalayuukana wamaa süpüla nakaalinjain waya.
7. ¿Kasa wounteetka aijiraale maʼin waya namaa na wawalayuukana? (Colosas 3:13, 14).
7 Weʼrüin wainma kasa anasü sünainjee aijiraain maʼin waya (1 Juan 4:11). Sutuma aijiraain maʼin waya namaa na wawalayuukana motusü waaʼin tü kasa nnojotkalü anain natuma otta paaʼinwajiraashii maʼin waya namaa (Éf. 4:2-6; paashajeʼera Colosas 3:13, 14). Talatüsü maʼin waaʼin sünain aʼwaajaa Jehová namaa na wawalayuukana. Nnojotsü jaʼyain tia sünain nakuwaʼipa na wane wayuukana.
KOJUTUJIRAA WAYA NAMAA NA WAWALAYUUKANA
8. ¿Kasa naainjaka Jehová süpüla paaʼinwain waya?
8 Mayaainjeʼe nnojoluin lotuin wakuwaʼipa maaʼulu yaa, paaʼinwashii waya namaa napüshuaʼa na wawalayuukana, wountuin tia nutuma Jehová (1 Cor. 12:25). Müsü sünüiki tü Bibliakat: «Nikirajüin jia Maleiwa süpüla aijiraainjanain jia» (1 Tes. 4:9). Nikirajüin waya Jehová sükajee tü Bibliakat süpüla aleewainjanain maʼin waya namaa na waneinnua. Waapaain sümaa tü nikirajakalü anain waya Jehová jülüjale waaʼin tü sümakat tü Bibliakat otta waaʼinrüle tü sümakat (Heb. 4:12; Sant. 1:25). Shiaʼaya naaʼinraka tia na aküjaliikana pütchi nüchiki Jehová.
9. ¿Kasa watüjaka sünainjee tü sümakat Roma 12:9-13 süchiki kojutujiraainjanain waya?
9 Shikirajüin waya tü Nünüikikat Maleiwa süpüla aleewainjanain waya namaa na wawalayuukana. Anashii wekirajaale sünain tü nümakat chi aluwataaushikai Pablo suluʼu Roma 12:9-13 (paashajeʼera). ¿Jamaluʼulu tü pütchi «anashii palajanale jia sünain kojutuinjanain jutuma na juwalayuukana»? Aire wapüla na wawalayuukana moteerü waaʼin naainjala, kamaneejeena waya namüin otta asülajeena waya kasa namüin (Éf. 4:32). Nnojo waʼatapajüin naaʼinrüin na waneinnua kasa süpüla aleewain naya wamaa, waaʼinrüinjatü tia wayakana. Müle shia watuma waaʼinreerü tü nümakat Jesús: «Talataleesia maʼin waaʼin wasülajüle wanee kasa suulialeʼeya süsülajünapa wamüin» (Aluw. 20:35).
10. Tütüle wanee wayuu ¿kaseerü naaʼinraka niʼrüle choʼujaain sükaalinjünüin wanee wayuu? (Piirakaa sümüin tü ayaakuaakat).
10 Süchikijee nümüin Pablo «kojutuinjanain jutuma na juwalayuukana» nüküjain «aʼyataaliinjana jia, nnojoishii shokulainjanain jia». Wanee wayuu aʼyataai tütüshi maʼin nia, naaʼinramaatüin tü aluwataanakalü anain nia. Anasü waaʼinrüle tü sümakat Proverbios 3:27, 28, tü makat mayaa: «Eerejeʼe süpüla pükaalinjain wayuu, nnojo piyoutajüin pükaalinjain shia». Choʼujaale sümüin wanee wayuu sükaalinjünüin anasü wakaalinjamaatüle shia. Nnojo jülüjain waaʼin wakalinjeerüin shia mapa otta sükaalinjüneerüin sutuma wayuu naata (1 Juan 3:17, 18).
Wakaalinjamaata na wawalayuu choʼujaakana amüin nakaalinjünüin. (Paashajeʼera tü pütchikat 10).
11. ¿Kasa waaʼinrajatka süpüla aleewain waya namaa na wawalayuukana?
11 Wane kasa waaʼinrajatka süpüla kojutuin watuma na waneinnua shia motomaatüle waaʼin tü kasa mojusü naaʼinrakat wamüin. Anuu sünüiki Éfeso 4:26, 27: «Anashi nnojoire nikeroluin chi kaʼikai sümaa ayatataain jia jashichin. Jalia jia nuulia chi Yolujaakai suulia nootuin jia sünain aaʼinraa kasa mojusü». Nikirajüin waya Jehová kojuyatua sükajee tü Bibliakat süpüla motuinjatüin waaʼin naainjala na waneinnua. Aküjünüsü suluʼu Colosas 3:13 motomaatüinjatüin waaʼin tü kasa mojusü aainjünakat wamüin. Süpüla aleewainjanain maʼin waya namaa na wawalayuukana, choʼujaasü maʼin motuinjatüin waaʼin tü kasa nnojotkalü anain natuma. Waaʼinrüle tia, paaʼinweena waya jee anajiraajeena waya (Éf. 4:3). Nnojorüle motuin waaʼin naainjala na waneinnua, nnojoleena paaʼinwain waya.
12. ¿Kasa naapaka Jehová wamüin süpüla motuin waaʼin naainjala na waneinnua?
12 Shiimain kapüleein wamüin motuin waaʼin wanee kasa mojusü naainjaka wanee wawala wamüin, wounteetpejeʼe shia sükajee tü nüpülainkat Jehová. Ekirajaainnapa waya süchiki aijiraainjanain waya otta aʼyataalinjanain waya. Wekirajaa jooluʼu süchiki wooʼulaainjatüin yalayalain waaʼin sutuma tü nüpülainkat Maleiwa (Roma 12:11). Eere nüpülain Maleiwa naaʼu wanee wayuu aʼyataajeechi nia nümüin Jehová süka süpüshuaʼa naaʼin jee aijeerü nüpüla wayuu sümaa motuin naaʼin saainjala. Müsüjeseʼe anain wachuntule nümüin Jehová tü nüpülainkat (Luc. 11:13).
PAAʼINWAINJANA JIA
13. ¿Kasa eeka süpüla nnojoluin paaʼinwain atuma waya?
13 Naata maʼin nakuwaʼipa na wawalayuukana sainküin mmakat (1 Tim. 2:3, 4). Müsüjeseʼe nnojoluin wanaawain tü kasa naneekakat maʼaka saaʼin tü nasheʼinpalakat, tü nepinasekat, tü kasa naapajakat jee tü kasa nashaitakat. Eesüjaʼa süpüla nnojoluin paaʼinwain waya suluʼujee tia nnojorüle eejüin waaʼin (Roma 14:4; 1 Cor. 1:10). Nikirajüin waya Maleiwa süpüla aijiraainjanain waya, müsüjeseʼe nnojoluin jülüjain waaʼin anain maʼin tü kasa waneekakat suulialeʼeya tü naneekakat na waneinnua (Filip. 2:3).
14. (1) ¿Kasa waaʼinrajatka napüleerua na wawalayuukana? (2) ¿Jamüsü waaʼinrüinjatkaʼa shia?
14 Wane kasa waaʼinrajatka süpüla paaʼinwain waya namaa na wawalayuukana shia wakatchinrüinjatüin waaʼin jee wamüliajiraainjatüin waaʼin (1 Tes. 5:11). Jekenainka watta naalii wawalayuu aleʼejakana nachikuaʼa nünainmüin Jehová süchikijee seemiajaapünain nanoula paala jee süchikijee nojuʼitinnüin paala naʼakajee na wawalayuukana. Talatüshii maʼin waya süka naleʼejüin nachikuaʼa (2 Cor. 2:8). Anuu sünüiki wanee wawala eemiajaaka anoula paala outkajaaka süchikuaʼa süchikijee poloo juya: «Nasaküin taya napüshuaʼa na wawalayuukana sümaa talatüin maʼin naaʼin» (Aluw. 3:19). ¿Jamüsü saaʼin sutuma shiʼrüin kamaneein maʼin sümüin na wawalayuukana? Anuu sünüiki: «Jülüjasü taaʼin nükaalinjeein taya Jehová süpüla talatüinjatüin taaʼin tachikuaʼa». Eesüjaʼa süpüla nükaalinjain Jesús na müliakana aaʼin wakajee wayakana wanaa sümaa watütüleʼerüin naaʼin (Mat. 11:28, 29).
15. ¿Kasa waaʼinrajatka süpüla paaʼinwainjanain waya? (Piirakaa sümüin tü ayaakuaakat).
15 Anale sukuwaʼipa tü wanüikikat paaʼinweena waya namaa na wawalayuukana. Müsü sünüiki Job 12:11: «Süka tü wacheʼekat wayaawatüin saaʼu tü waapajakat achiki otta süka tü wayeekat wooʼulaküin seʼejü wanee eküülü». Wanee wayuu eeka süʼlakajaain suuʼulaküin seʼejü sutse süpüla sütüjaain saaʼu jemetüle shia. Akaataajaʼa neʼe waashajaainjanale anasü jülüjale waaʼin müleka anale naaʼin na wayuukana sutuma tü wamakat, sütütüleʼerüle naaʼin jee sükatchinrüle naaʼin (Sal. 141:3; Éf. 4:29).
Süpülapünaa waküjain wanee kasa anasü jülüjale shia waaʼin. (Paashajeʼera tü pütchikat 15).
16. ¿Jaralii na jülüjainjanakana aaʼin anainjatüin nanüiki sümaa natütüleʼerajiraain naaʼin?
16 Na tooloyuu kaʼwayuuseshiikana jee na kachonshiikana jülüjainjatüin naaʼin anainjatüin nanüiki süpüla natütüleʼerajiraain naaʼin (Col. 3:19, 21; Tito 2:4). Müshiʼiya na laülaashiikana suluʼu tü outkajaaleekat namülialüin otta natütüleʼerüin naaʼin na wawalayuukana (Is. 32:1, 2; Gal. 6:1). Anuu wanee pütchi sümakat tü Bibliakat: «Wanee pütchi aküjünaka wanaa sümaa choʼujaain shia, ¡anasü maʼin!» (Prov. 15:23).
ALINJATÜ WAYUU WAPÜLA «SÜKAJEE TÜ KASA WAAʼINRAKAT JEE SHIIMAINJATÜ SHIA»
17. ¿Kasa waaʼinrajatka süpüla jaʼyain waaʼu alin wapüla na wawalayuukana?
17 Müsü nünüiki chi aluwataaushikai Juan: «Nnojotsü waküjainjatüin neʼe alin wayuu wapüla, jaʼyainjatü tia waaʼu sükajee tü kasa waaʼinrakat jee shiimainjatü shia» (1 Juan 3:18). ¿Kasa waaʼinrajatka süpüla jaʼyain waaʼu alin wapüla na wawalayuukana? Walatirüle kaʼi namaa aleeweena maʼin waya namaa otta kooʼomüinjeerü tü naalinkat wapüla. Anashii yootule waya namaa na wawalayuukana eepünaale waya maʼaka saaʼin sünain tü outkajawaakat jee sünain aküjaa pütchi otta anasü wawaraijaale naaʼu. Müle shia watuma atüjaaneerü aaʼu nikirajüin waya Maleiwa süpüla aijiraainjanain waya (1 Tes. 4:9). Weʼreerü shiimain tü sümakat tü Bibliakat wanaa sümaa sümüin: «¡Anashaatasü maʼin kottiraale na wawalayuukana sümaa paaʼinwajiraain naya!» (Sal. 133:1).
JAYEECHI 90 Watütüleʼerajiraa waaʼin waneepia