Punouja sünain alin pia nüpüla Jehová

1. ¿Kasa paapaka aaʼujee paaʼin nümüin Jehová? (Piirakaa sümüin tü ayaakuaakat).

¿SOTÜSÜ PAAʼIN tü kaʼi paapakalü oʼu paaʼin nümüin Jehová? Paaʼinrüin tia sutuma piʼraajüin nukuwaʼipa sümaa alin maʼin nia püpüla. Paapüin pünüiki nümüin Jehová sünain shiainjatüin paaʼinmaain maʼin tü nüchekakat püpüleerua otta alinjachin nia püpüla «süka süpüshuaʼa paaʼin, sükajee pukuwaʼipa, süka süpüshuaʼa pütchin otta jülüjainjachi nia paaʼin waneepia» (Mar. 12:30). Soʼujee kaʼikat tia, kooʼomüin kooʼomüin müsü tü naalinkat Jehová püpüla. ¿Jameetche pünüiki maʼaka nüsakirüle pia wanee wayuu: «¿shiimainchejeʼe alin Jehová püpüla?»? «¡Jamüsaʼa shia! Aishaatashi maʼin nia tapüla» mamaateechi pia.

2, 3. (1) ¿Kasa nüchekaka Jehová? (Jeremías 31:3). (2) ¿Kasa wekirajaainjatka anain?

² ¿Aishiche pia nüpüla Jehová? ¿Jameetche pünüiki püsakinnüle sünain tia? Eesüjaʼa wainmajüle paaʼin aire pia nüpüla Jehová sutuma nnojoluin lotuin maʼin pukuwaʼipa paaʼinruʼu. Anuu sünüiki wanee wawala eʼraka maʼin sümüliala jintuluiwaʼaya shia: «Aishi Jehová tapüla süka süpüshuaʼa taaʼin, eepejeʼe kaʼi jülüjawaikalü oʼu taaʼin aire taya nüpüla». Jama piakai, ¿kasa paaʼinrajatka süpüla punoujain maʼin sünain alin pia nüpüla Jehová?

³ Nücheküin Jehová punoujain maʼin sünain alin pia nüpüla (Paashajeʼera Jeremías 31:3). Aleeweeshi Jehová pümaa, müshijeseʼe nürütkeʼerüin pia nünainmüin, aishaatashi maʼin pia nüpüla waneepia sutuma paapüin paaʼin nümüin jee woutiisain pia. Muloʼu naalin nüpüla Jehová napüshuaʼa na aʼyataashiikana nümüin, maʼaka paaʼin piakai. Nüneeküin pia Jehová süpüla nümaain pia sutuma alin maʼin pia nüpüla (Mal. 3:17). Nücheküin Jehová punoujain sünain alin pia nüpüla. Anasü müle pünüiki maʼaka naaʼin chi aluwataaushikai Pablo, anuu tü nümakat: «Tatüjaa aaʼu nnojoluin eein wanee kasa amalajaajeetka atuma waalin nüpüla Maleiwa. Nnojoleerü amalajaain waalin nüpüla jaʼitashii outuin waya jee jaʼitasü katüin woʼu. Nnojoleerü amalajaain waalin nüpüla natuma na aapieekana, natuma na sülaülashiikana mma, sutuma tü kasa eekat maaʼulu jee tü kasa eejeetkat mapeena. Nnojoleeriaʼaya amalajaain waalin nüpüla Maleiwa sutuma wanee kasa eekai pülain, sutuma wanee kasa eekai chain iipünaa, sutuma wanee kasa eekai oʼutuin wünapümüin otta sutuma wanee kasa eekai akumajuushin. Nnojotsü eein wanee kasa amalajeʼereetka waalin nüpüla Maleiwa» (Roma 8:38, 39). Sünain ekirajaayakat tüü wekirajaajeerü anain jamüin choʼujaaka maʼin wamüin watüjaain saaʼu alin waya nüpüla Jehová, jee tü waaʼinrüinjatka süpüla wanoujainjanain maʼin sünain.

¿JAMÜSÜ WATÜJAAINJATKA SAAʼU ALIN WAYA NÜPÜLA JEHOVÁ?

4. (1) ¿Kasa nunoujireeka anain waya Satanás? (2) ¿Kasa waaʼinrüinjatka süpüla eejiraain waya sümaa tü nimeejeekalü aka waya Satanás?

⁴ Watüjaale saaʼu alin waya nüpüla Jehová, eejiraajeena waya sümaa tü kasa nimeejeekalü aka waya chi Yolujaakai (Éf. 6:11). Nunoujireein waya Satanás maalin waya nüpüla Jehová naaʼinrüin tia shiiʼiree nümalajeʼerüin wanoula. Mojulaashi maʼin chi Yolujaakai, müshi nia «maʼaka naaʼin wanee león eekai nulonojooin shiiʼiree nikeein wayuu» (1 Ped. 5:8, 9). Jamüshijaʼa wanee león shia nulojoko maʼin tü mürüt eeka niʼrüin matchin saaʼin, müsia nukuwaʼipa chi Yolujaakai, müshi nulojokoi aaʼin waya niʼrüle matchin waaʼin sutuma tü alatakat wamüin paala, sutuma mapüsain waya, saaʼujee tü kasa eejiraakalü amaa waya maaʼulu yaa jee yüülale waaʼin sutuma shapaain maʼin waaʼin saaʼu tü alatajatkat mapeena (Prov. 24:10). Eejiraweena waya sümaa tü nimeejeekalü aka waya chi Yolujaakai wayoutule sümaa tü nümakat jee wanoujale maʼin sünain alin waya nüpüla Jehová (Sant. 4:7).

5. ¿Jamüsü choʼujaakaʼa wamüin watüjaain saaʼu alin waya nüpüla Jehová otta kojutuin waya nümüin?

⁵ Watüjaale saaʼu alin waya nüpüla Jehová, aleeweena maʼin waya nümaa. Watüjaa aaʼulu tia sutuma choʼujaain wamüin alinjanain waya süpüla wayuu jee alinjatü wayuu wapülaya, aletüjülüin wakuwaʼipa nutuma Jehová. Jamüshijaʼa watüjaale saaʼu alin waya nüpüla wanee wayuu, aishi nia wapüla suluʼujee tia. Akaʼaya wayakana kooʼomüinjeerü tü naalinkat Jehová wapüla watüjaale saaʼu alin waya nüpüla jee kojutuin waya nümüin (1 Juan 4:19). Müsia nukuwaʼipa Jehová, kooʼomüinjeerü tü waalinkat nüpüla niʼrüle alin nia wapüla. Müsüjeseʼe sümüin tü Bibliakat: «Jürütkaa nünainmüin Maleiwa, nürütkaajeechika jünainmüin» (Sant. 4:8). Anashii wekirajaale sünain tü waaʼinrüinjatka waneʼewai wakua süpüla wanoujainjanain maʼin sünain alin waya nüpüla Jehová.

¿KASA PAAʼINRÜINJATKA SÜPÜLA PUNOUJAIN MAʼIN SÜNAIN ALIN PIA NÜPÜLA JEHOVÁ?

6. ¿Kasa puchuntuinjatka nümüin Jehová nnojorüle punoujain sünain alin pia nüpüla?

⁶ Anashi puchuntawaire nümüin Jehová süpüla punoujain maʼin sünain alin pia nüpüla (Luc. 18:1; Roma 12:12). Eeshijaʼa puchuntüinjachire kojuyatua kaalinwaa nümüin Jehová süpüla pütüjaain saaʼu jamüin aika pia nüpüla. Ayatüle suluʼuin paaʼin maalin pia nüpüla Maleiwa soto paaʼin nülanaʼaleeinña chi Maleiwakai suulia tü paaʼinkat (1 Juan 3:19, 20). Niʼrüin tü kasa anakat sünain pukuwaʼipa, mayaainjeʼe nnojoluin anain pukuwaʼipa paaʼinruʼu (1 Sam. 16:7; 2 Crón. 6:30). Anakalaka püküjawaire nümüin jamüin paaʼin otta puchunta maʼin nümüin kaalinwaa süpüla punoujainjachin sünain alin pia nüpüla (Sal. 62:8). Anasü pansaale pukuwaʼipa sümaa tü puchuntakat nümüin. Wekiraja sünain waneirua kasa anakat süpüla paaʼinrüin.

7, 8. ¿Jamüsü jalouikaʼa wamüin tü sümakat Salmos süpüla wanoujain maʼin sünain alin waya nüpüla Jehová?

⁷ Punouja sünain tü nümakat Jehová. Naapüin Maleiwa tü nüpülainkat namüin na wayuu ashajakana tü Bibliakat süpüla watüjaain saaʼu jamüin maʼin tü nukuwaʼipakat. Jülüjataa waaʼin tü nümakat David: «Nnojoishi wattaluʼuin Jehová noulia na mojukana aaʼin otta nükaalinjain na wayuu yüülakana aaʼin» (Sal. 34:18). Yüülale paaʼin eesüjaʼa süntajaale suluʼumüin paaʼin nnojoluin jaralii ayaawatüin tü alatakat pümüin otta nnojoluin jaraliin akaalinjain pia. Eejeechipejeʼe Jehová pümaa süpüla nükaalinjain pia, jama nütüjaain saaʼu choʼujaain maʼin shia pümüin. Anuu nünüiki David: «Piʼitaa taʼwüira suluʼu tü paaʼata [...] eekat pümaʼana» (Sal. 56:8). Sümaiwa paala nuʼunapüʼüle wanee wayuu wattamüin alüʼüjapüʼüshi wüin suluʼu paaʼata, jalouisü maʼin shia nümüin jama nnojoluin amülain shia. Akaʼaya tü naaʼinrakat Jehová, müsü nünaajaakai saaʼin suʼwüira tü poʼukot suluʼu wanee paaʼata süka alin nümüin niʼrüin müliain pia. Nüküjaka David wanee kasa nümüin Jehová: «Piʼraajüin maʼin taya» (Sal. 139:3). Tia maluʼulu niʼrüin Jehová süpüshuaʼa tü kasa paaʼinrakat, shiapejeʼe jülüjaka naaʼin tü kasa anakat putuma (Heb. 6:10). Talatashaatasü naaʼin Jehová pümaa sutuma süpüshuaʼa tü kasa anasü paaʼinrakat.a

⁸ Müshi nümakai aaʼin Jehová pümüin süka tia wetsiikulokot: «Aishi maʼin pia tapüla jee jülüjasü maʼin taaʼin pukuwaʼipa». Eekajasaʼa Satanás nunoujireein pia sünain maalin pia nüpüla Jehová. Jülüjale paaʼin tia, anasü püsakirüle paaʼin sünain tüü: ¿Jarai chi tanoujainjachikai anüiki? ¿Chi shikiishikai tü alawaakat, niataapa chi Maleiwakai aküjakai waneepia tü shiimainkat? (Juan 8:44; Sal. 31:5).

9. ¿Kasa nüpansaajaka Jehová namüin na aikana apüla nia? (Éxodo 20:6).

⁹ Anasü jülüjawaire paaʼin jamüin sukuwaʼipa tü naalinkat nüpüla Jehová na wayuu aikana apüla nia. Jülüja paaʼin tü nümakat nümüin Moisés otta namüin na israelitakana (paashajeʼera Éxodo 20:6). Nüpansaajüin nünüiki Maleiwa pümüin sünain alinjachin pia nüpüla waneepia aire nia püpüla. Müiria nnojoluin amalajaain tü paalinkat nüpüla Jehová, jama waneepiain nia pümaa (Neh. 1:5). Wainmajüle paaʼin aire pia nüpüla Jehová, anasü jülüjale paaʼin tüü: «Shiimainre alin Jehová tapüla, aishijaʼamata taya nüpüla Jehová» (Dan. 9:4; 1 Cor. 8:3). Punouja maʼin sünain alin pia nüpüla Jehová jee nnojoleechi nüpütüin pia pümüiwaʼa, jama alin nia püpüla.

10, 11. ¿Jamüsü anakaʼa jülüjawaire paaʼin naapajiraain nikii Jesús paaʼu? (Galacia 2:20).

¹⁰ Anasü jülüjawaire paaʼin naapajiraain nikii Jesús paaʼu. Kamaneeshi maʼin Jehová, naapüinjeseʼe nikii chi Nüchonkai süpüla outajachin saaʼu saainjala wayuu (Juan 3:16). Naaʼinrüinña tia Jehová püpüleerua. Jülüjataa waaʼin nukuwaʼipa chi aluwataaushikai Pablo, mojupuʼusü maʼin nukuwaʼipa süpülapünaa nunoujain, shiasaʼa nunoujapa ayatüshi nia eejiraain sümaa tü kasa mojusü suchuntaakat naaʼin (Roma 7:24, 25; 1 Tim. 1:12-14). Mayaainjeʼe müin nukuwaʼipa Pablo, niyaawata aaʼu naapajiraain nikii Jesús naaʼu (paashajeʼera Galacia 2:20). Nüshajüin Pablo tia pütchikat sutuma tü nüpülainkat Maleiwa süpüla pütüjaain saaʼu wanee kasa (Roma 15:4). Shia nüjütüin Jehová chi Nüchonkai süpüla naapajiraain nikii paaʼu, jülüjale paaʼin tia punoujeerü maʼin sünain alin pia nüpüla Jehová.

¹¹ Talatashaatasü maʼin waaʼin nümaa Jehová sutuma nüjütüin chi Nüchonkai süpüla outuin nia saaʼu waainjala. Nnojotpejeʼe shiain neʼe nüntaka apüla tia yaa mmapaʼamüin. Antüshiaʼaya nia süpüla shiʼraajüinjatüin maʼin wayuu tü nukuwaʼipakat Jehová jee süpüla sütüjaain maʼin saaʼu alin maʼin nüpüla Jehová napüshuaʼaleʼeya na nüchonniikana (Juan 18:37). Anashii wekirajaale süchiki tia.

NIKIRAJÜIN JESÚS ALIN PIA NÜPÜLA JEHOVÁ

12. ¿Jamüshi niaka anain Jesús süpüla nüküjain süchiki nukuwaʼipa Jehová?

¹² Wanaa sümaa yaajachin Jesús yaa mmapaʼa kamalainshaatasü nümüin nikirajüin wayuu süchiki tü nukuwaʼipakat Jehová (Luc. 10:22). Shiimainshaata süpüshuaʼa tü nümakat Jesús süchiki nukuwaʼipa chi Nüshikai, jama chajachin nia nümaa chaa iipünaa soʼu wainmashaata juya süpülapünaa nüntüin yaa mmapaʼamüin (Col. 1:15). Niʼrüin Jesús alin maʼin nüpüla Jehová na nüchonnii waneepiakana nümaa, na chakana chaa iipünaa otta na kepiakana yaa saaʼu tü mmakat. Anoujeena maʼin waya sünain alin waya nüpüla Jehová sünainjee tü nümakat Jesús. Anashii wekirajaale süchiki tia.

13. ¿Kasa watüjaka süchiki nukuwaʼipa Jehová nutuma Jesús?

¹³ Nücheküin Jesús watüjaain saaʼu kamaneein maʼin chi Washikai jee alin maʼin waya nüpüla, müsüjeseʼe süshajünüin suluʼu tü Bibliakat 160 sukua tü pütchikat «Tashi» naashajaapa Jesús nüchiki Jehová. «Chi Jüshi iipünaajachikai» mapuʼushi nia namüin na nikirajüinkana naashajaapa namaa süchiki tü nukuwaʼipakat Jehová (Mat. 5:16; 6:26). Tü noota suluʼukat Mateo 5:16 suluʼu tü Bibliakat alijunaikiruʼu müsü mayaa: «Chi Pülashikai maʼin», chi «Miyoʼushikai maʼin», «Chi Kakumalakai kasa süpüshuaʼa» mapuʼushii na anoujashii namaiwajanakana nüchiki Jehová. Mapüleepejeʼe sukuwaʼipa nutuma Jesús, jama «Washi» nümüin nüchiki Jehová. Watüjaa aaʼu sutuma tia aicheechoin nüpüla Jehová na wayuu aʼyataashiikana nümüin. Anasü wekirajaale sünain tü watüjaakat sünainjee wanaa sümaa «Tashi» nümüin Jesús nümüin Jehová.

14. ¿Kasa nüküjaka Jesús wayaawataka atuma kojutuin maʼin waya waneʼewai wakua nümüin Jehová? (Mateo 10:29-31; piirakaa sümüin tü ayaakuaakat).

¹⁴ Jülüjataa waaʼin tü nümakat Jesús suluʼu Mateo 10:29-31 (paashajeʼera). Nüküjain Jesús nütüjaain saaʼu chi Washikai Maleiwa sujutuule wanee wüchii mmoluʼumüin. Jülüjasü naaʼin Jehová tü wüchiicheinkalüirüa eerejeʼe nnojoluin naʼwaajüin nia jee nnojoluin alin nia napüla wayaleekajaʼa wayakana aʼyataashiikana nümüin aishii maʼin waya nüpüla, jama alin nia wapüla. Nüküjainña Jesús yaawain süpüshuaʼa tü waʼwalakat nutuma chi Washikai. Sünainjee tia, watüjaa aaʼulu jülüjashaatain naaʼin Jehová tü wakuwaʼipakat. Nüküjain wamüin Jesús tia shiiʼiree wanoujainjanain sünain kojutuin maʼin waya waneʼewai wakua nümüin chi Washi iipünaajachikai.

15. ¿Kasa watüjaka süchiki nukuwaʼipa Jehová sutuma tü ashajünakat suluʼu Juan 6:44?

¹⁵ Nüküjain Jesús wanee kasa naaʼinraka chi «Washikai» wapüleerua (paashajeʼera Juan 6:44). Sutuma kamaneein maʼin chi Püshi iipünaajachikai nürütkeʼerüin pia nünainmüin, jama niʼrüin anain pukuwaʼipa (Aluw. 13:48). Eesüjaʼa shiale nuchuntuin Jesús tü ashajünakat suluʼu Jeremías 31:3 tü makat mayaa: «Muloʼu maʼin tü paalinkat tapüla waneepia. Müshijeseʼe tarütkeʼerüin pia tanainmüin». Eepejeʼe süpüla sümüinña tia wetsiikulokot: «Waneepiasü tü paalinkat tapüla» (anasü paashajeʼerüle Oseas 11:4). Ayatüshi alin pia nüpüla Jehová sutuma niʼrüin anain maʼin pukuwaʼipa, mayaainjeʼe nnojoluin anain maʼin pukuwaʼipa paaʼinruʼu.

16. (1) ¿Kasa watüjaka sünainjee tü nümakat wamüin Jesús? (2) ¿Jamüsü anakaʼa wanoujale sünain tü nünüikikat? (3) ¿Jamüshii wanoujainjanaka sünain anain maʼin nukuwaʼipa chi Washikai Jehová? (Paashajeʼera tü pütchikat «Anasü maʼin nukuwaʼipa chi Washikai Jehová»).

¹⁶ Müshi nümakai aaʼin Jesús wamüin: «Nnojoishi taya waneeshin nüchon Jehová, nüchonya pia. Shiimain tamakat pümüin, aishii maʼin pia nüpüla otta jülüjashaatasü naaʼin tü pukuwaʼipakat». Wainmajüle paaʼin aire pia nüpüla Jehová, püsakira paaʼin sünain tüü: «¿Aashin matüjain aküjaa alawaa Jesús? ¿Aashin niʼraajüin maʼin nukuwaʼipa chi Washikai? ¿Aashin anain wanoujale sünain nünüiki?» (1 Ped. 2:22).

AYATAʼAYA WANOUJAIN MAʼIN SÜNAIN ALIN WAYA NÜPÜLA JEHOVÁ

17. ¿Jamüsü choʼujaakaʼa maʼin wamüin wanoujain maʼin sünain alin waya nüpüla Jehová?

¹⁷ Emeejüi maʼin wayuu Satanás, waʼünüü nia jee mojulaashi maʼin. Nüchajaain sukuwaʼipa waneepia süpüla wooʼulaain suulia aʼyatawaa nümüin Jehová. Nunoujireein waya sünain maalin waya nüpüla Jehová shiiʼiree sümatchinjaain tü wanoulakat, ¡jalia waya nuulia! (Job 27:5). Choʼujaasüjeseʼe maʼin wamüin wanoujain maʼin sünain alin waya nüpüla Jehová.

18. ¿Kasa punoujainjachika maʼin anainjee alin pia nüpüla Jehová?

¹⁸ Sutuma tü wekirajaaitpakalü anain punoujeerü maʼin sünain alin maʼin pia nüpüla Jehová. Anasü wachuntawaire kaalinwaa nümüin Jehová süpüla pütüjaain saaʼu tü kasa anasü niʼrakat sünain pukuwaʼipa otta anasü sotule paaʼin tü wetsiikulo suluʼujeejatkat tü Bibliakat pütüjaka anainjee alin maʼin nüpüla Maleiwa napüshuaʼaleʼeya na aʼyataashiikana nümüin. Anasü sotule paaʼin miyoʼu naalin nüpüla Jehová na wayuu aikana apüla nia jee anasü jülüjale paaʼin naapüin Jehová chi Nüchonkai süpüla outajachin nia paaʼu otta jülüjeesü paaʼin waneepia nüchoin pia Jehová. ¿Jameetche pünüiki maʼaka püsakinnüle sutuma wayuu: «¿Aishi pia nüpüla Jehová?»? Asoutamaateechi pia jee meerü pünüiki mayaa: «¡Jamüsaʼa! Aishi taya nüpüla otta kooʼomüinweesü tü naalinkat tapüla».