Nia Jehová «talataka maʼin atuma waaʼin»

1, 2. (1) ¿Jamüsü naaʼin na wayuukana maaʼulu yaa? (2) ¿Kasa wekirajaajeetka anain sünain ekirajaayakat tüü?

WAINMA tü kasa naainjakat na wayuukana süpüla talatüin naaʼin. Mayaainjeʼe nountuin talatüin naaʼin, motsoʼopünaasü neʼe sümaʼa. Wainma na wayuu mojukana aaʼin jee jülüjasü naaʼin nnojoleerüin anain naaʼin nachikuaʼa. Eesüjaʼa müle naaʼin waneinnua wawalayuu sutuma sülüʼülüin «sükalia süpüla sajaʼttüin kasa mojusü», eejiraashii waya sümaa tü kasa mojukat jee shapaakalü atuma waaʼin (2 Tim. 3:1).

² Sünain ekirajaayakat tüü, wekirajaajeerü anain tü kasa eekat süpüla mojuin atuma waaʼin jee tü waaʼinrajatkat süpüla talatüin waaʼin wachikuaʼa. Wekirajaa palajana sünain jaralin chi eekai süpüla talatüin atuma waaʼin.

CHI TALATAKAI ATUMA WAAʼIN

3. ¿Kasa watüjaka nünainjee Jehová weʼrapa tü kasa nukumajakat? (Piirakaa sümüin tü ayaakuaakat).

³ Nia Jehová chi Maleiwa talatakai aaʼin müsüjeseʼe nücheküin wapüleerua talatüin waaʼin wanaa nümaa. Wainma tü kasa nukumajaka talatakalü atuma waaʼin, anasü maʼin sukumajia tü mmakat nutuma, nukumajüin waya süpüla weʼrüin wainma sünoʼu wanee kasa, süpüla weküinjanain eküülü jemetakat maʼin jee talatüsü maʼin waaʼin weʼrapa süshalirajaain tü mürütkalüirua. Sükajee tia wayaawata aaʼu alin maʼin waya nüpüla Jehová jee nücheka apüleerua talatüin waaʼin.

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (1) ¿Jamüsü talatakaʼa naaʼin Jehová mayaainjeʼe niʼrüin sümüliala wayuu? (2) ¿Kasa naaʼinraka Jehová wapüleerua maaʼulu yaa? (Salmo 16:11).

⁴ Mayaainjeʼe niain Jehová «chi Maleiwa talatakai aaʼin» niʼrüin sümüliala wayuu (1 Tim. 1:11). Nnojotpejeʼe mojuin maʼin naaʼin saaʼujee tia, jama nütüjaain saaʼu sülüʼülüin tü kaʼi najaʼlajeʼerüinjatkalü oʼu tü mojuwaikat jee müliakalü atuma saaʼin wayuu. Sümaʼainruʼu süntüin tia kaʼika jülüjasü naaʼin Jehová jamüin waaʼin jee nükaalinjain waya süpüla talatüin maʼin waaʼin (paashajeʼera Salmo 16:11). Anashii wekirajaale sünain tü naaʼinrakat Jehová süpüla talatüin naaʼin Jesús.

5, 6. ¿Jamüsü talatakaʼa maʼin naaʼin Jesús?

⁵ Nia Jesús chi talataleekai maʼin aaʼin naʼakajee na nukumajalakana Jehová. Talatüsü maʼin naaʼin Jesús süka müin «nukuwaʼipa maʼaka nukuwaʼipa chi Maleiwa meʼrujusaikai» (Col. 1:15; 1 Tim. 6:15). Wane kasa talataka atuma naaʼin Jesús shia süka kakaliaichin maʼin nia nümaa Jehová chi Maleiwa talatakai maʼin aaʼin.

⁶ Talatüsü maʼin naaʼin Jesús süka naaʼinrüin waneepia tü kasa anashiikat nümüin chi Nüshikai (Prov. 8:30, 31; Juan 8:29). Sutumajee noonooin waneepia Jesús talatüsü maʼin naaʼin Jehová nümaa (Mat. 3:17).

7. ¿Kasa tü talateetkalü atuma waaʼin?

⁷ Talateerü maʼin waaʼin maʼaka naaʼin Jesús warütkaale maʼin nünainmüin Jehová. Wekirajaale maʼin süchiki nukuwaʼipa Jehová washateerü maʼin nukuwaʼipa jee talateerü maʼin waaʼin. Wane kasa talataka atuma waaʼin shia watüjaain saaʼu talatüin naaʼin Jehová sutuma waaʼinrüin tü anashiikat nümüin (Sal. 33:12).a Eejeerü kaʼi mojeetkalü oʼu waaʼin, nnojoleenapejeʼe niyüülajüin waya Jehová sutuma müin waaʼin. Niyaawatüin aaʼu Jehová wakuwaʼipa jee nütüjaa aaʼu eein tü kasa mojuwaikalü atuma waaʼin (Sal. 103:14). Anashii wekirajaale sünain tü kasa eekat süpüla mojuin atuma waaʼin jee tü waaʼinrajatkat süpüla talatüin waaʼin wachikuaʼa.

TÜ WAAʼINRAJATKAT SÜPÜLA TALATÜIN WAAʼIN WACHIKUAʼA

8. ¿Jamüsü waaʼin weʼrüle müliaa?

⁸ Tü kasa müliakalü atuma waaʼin. Süpüleeruaanüle waaʼin sutuma tü wanoulakat, süsetüle tü palaakat, sukutkujaale tü mmakat, maʼletsere waya, ayuuire waya jee laülaale waya, eʼrüshii waya wamüliala sülatüle wamüin tia jee mojusü maʼin waaʼin sutuma, jama isain wachiki wanouteʼerüin shia. Saashin tü Bibliakat «mojule maʼin naaʼin [wanee wayuu] nnojoleerü naaʼin sünain wanee kasa» (Prov. 15:13). Jülüjataa waaʼin nukuwaʼipa wanee wawala Babis nünülia, kataiwaʼaya noʼu na nüpüshikana wainma tü kasa mojupuʼuka maʼin atuma naaʼin. Sutuma kupaain maʼin nia waneepia nnojoishi alatirüin maʼin kaʼi namaa jee müshi nümüiwaʼakai aaʼin sutuma tia. Nünaajaaka chi nuwalakai, shiasaʼa maʼaka jeʼra juya süchikijee anaajaasü tü niikat jee mapa anaajaashi chi nüshikai. Weʼrüle müliaa maʼaka naaʼin chi wawalakai mojeerü waaʼin sutuma jee eeshii süpüla ayuulin waya.

9. ¿Kasa waaʼinrajatka süpüla talatüin waaʼin wachikuaʼa? (Jeremías 29:4-7, 10).

⁹ Tü waaʼinrajatkat süpüla talatüin waaʼin wachikuaʼa. Wayaawatüinjatü saaʼu eein kasa isaka wachiki wanouteʼerüin jee talatüinjatü waaʼin sümaa tü kasa eekat wamaʼana otta tü eekat süpüla waaʼinrüin. Naashin na manoujainsaliikana anainjatü maʼin wakuwaʼipa süpüla talatüin waaʼin. Aküjünapejeʼe suluʼu tü Bibliakat eein süpüla talatüin waaʼin mayaainjeʼe weʼrüin müliaa. Nüküjain Jehová namüin na judío amaanakana Babiloniamüin eein süpüla talatüin naaʼin mayaainjeʼe neʼrüin müliaa (paashajeʼera Jeremías 29:4-7, 10). Tü watüjakat sünainjee tü nümakat Jehová namüin na judíokana shia jülüjainjatüin waaʼin tü kasa anasü weʼrakat jee talatüinjatüin waaʼin sümaa tia. Soto waaʼin nnojoleenain nüpütüin waya Jehová wamüiwaʼa jee nükaalinjeena waya (Sal. 63:7; 146:5). Anuu sünüiki Efi wanee wawala isaitpaka achiki waraitta sutumajee seewaain: «Teʼrüin kaalinwaa nutuma Jehová, sutuma tapüshi jee natuma na wawalayuukana, namülialüin maʼin taaʼin. Tachajaain maʼin sukuwaʼipa waneepia süpüla talatüin taaʼin süpüla neʼrüinjatüin kojutuin tamüin tü naaʼinrakat tapüleerua».

10. ¿Jamüsü watüjaakaʼa saaʼu eein süpüla talatüin waaʼin mayaainjeʼe weʼrüin müliaa?

¹⁰ Eesü süpüla talatüin waaʼin mayaainjeʼe weʼrüin müliaa jee nayale eʼrüin müliaa na wapüshikana (Sal. 126:5).b Watüjaa aaʼu tia jama nnojoluin shiain neʼe talatüin atuma waaʼin anale tü wakuwaʼipakat. Anuu sünüiki María wanee wawala pürekutsoot shia: «Talatüsü waaʼin mayaainjeʼe weʼrüin müliaa jama watüjaain saaʼu tü naaʼinrajatkat Jehová wapüleerua mapeena. Eejeetpejeʼe kaʼi mojeetka oʼu waaʼin jee waʼyalajeenakalü oʼu. Nükaalinjapejeʼe waya chi Washikai Jehová süpüla talatüin waaʼin, mayaainjeʼe weʼrüin müliaa maaʼulu nnojoleena müliain waya waneepia. Najaʼttireerü Jehová süpüshuaʼa tü kasa müliakalü atuma waaʼin jee tü mojukalü atuma waaʼin».

11. ¿Kasa watüjaka sünainjee nukuwaʼipa Pablo?

¹¹ Weʼrüle müliaa eesüjaʼa jülüjale waaʼin nnojoluin talatüin naaʼin Jehová wamaa. Müle waaʼin anasü jülüjale waaʼin nakuwaʼipa waneinnua anoujashii namaiwajana eʼrakana müliaa maʼaka naaʼin chi aluwataaushikai Pablo. Jamüshijaʼa nia aneekünüshi nutuma Jesús süpüla nüküjain tü pütchi anakat maʼin namüin na aluwataashiikana saaʼu mma jee namüin na nüchooinkana Israel (Aluw. 9:15). Wainmapejeʼe tü müliaa niʼrakat Pablo (2 Cor. 11: 23-27). Tü alatakat nümüin nnojotsü shiain sutumajee nnojoluin talatüin Maleiwa nümaa. Jamüshijaʼa nia nnojoishije nüchecherüin naaʼin soʼunnaa tü müliaa niʼrakat nnojoire nükaalinjain nia Jehová (Roma 5:3-5). Müsia pukuwaʼipa talateechi Jehová pümaa, nükaalinjeechi pia soʼunnaa piʼrüin müliaa waneepiale pia nümaa.

12. ¿Jameerü waaʼin sutuma nnojoluin wountuin tü weʼitaakat wapüleerua sünain tü waʼyataainkat nümüin Jehová?

¹² Nnojorüle wasaʼwatüin wanee aʼyatawaa nümüin Jehová. (Prov. 13:12). Sutuma alin wapüla Jehová otta kojutuin wamüin tü naaʼinrakat wapüleerua wakooʼomüinreein maʼin tü waʼyataainkat nümüin. Jülüjainjatpejeʼe waaʼin tü kasa eekat süpüla waaʼinrüin suulia sümalajaain waaʼin sünainjee nnojoluin shikeerajüin tü keeʼireekat waaʼin (Prov. 17:22). Anuu sünüiki Holly wanee wawala pürekutsoot shia: «Oʼuneesü taaʼin paala sünain tü Ekirajawaa napülajatkat na Aküjaliikana Pütchi jee shiale takolojooin suluʼumüin wanee mma naata süpüla taküjain pütchi chayaa jee shiale toʼunuin sünain akumajaa tü Weteet chakat Ramapo. Sutuma sülatüin tamüin wainma kasa nnojotsü tekeraajüin süpüshuaʼa tü teʼitaakat tapüleerua. Mojusü maʼin taaʼin saalinjee tia». Wainma na wawalayuu mojukana aaʼin maʼaka saaʼin Holly sutuma nnojoluin nountuin naaʼinrüin tü neʼitaakat napüleerua sünain tü naʼyataainkat nümüin Jehová.

13. ¿Kasa eeka süpüla waaʼinrüin isale wachiki wanee aʼyatawaa weʼitaaka wapüleerua paala?

¹³ Tü waaʼinrajatkat süpüla talatüin waaʼin wachikuaʼa. Sotuinjatü waaʼin nnojoluin nuchuntuin Jehová wanee kasa iseetka wachiki. Nnojotsü jülüjain naaʼin Jehová jeʼtsüin tü aʼyatawaa waaʼinrakat nümüin, tü jülüjakat naaʼin shia tü suluʼukat waaʼin otta anale tü wakuwaʼipakat noʼuluʼu. Nuchuntuin Jehová wamüin wayaawatüinjatüin saaʼu tü isakat wachiki jee woonooinjatüin sümaa nünüiki (Miq. 6:8; 1 Cor. 4:2). Sutumajee tia nnojotsü mojuinjatüin waaʼin isale wachiki waaʼinrüin wanee kasa sünain tü waʼyataainkat nümüin Jehová.c Shia anaka jülüjale waaʼin tü eekat süpüla wountuin waaʼinrüin, maʼaka saaʼin eeshii süpüla aʼaleewajaain waya nümaa wanee wawala jimaʼai süpüla wakaalinjain nia sünain akooʼomüinraa niʼyataain nümüin Jehová jee shiale wakaalinjain wanee wawala jaʼapüichi. Otta müsia eesü süpüla watütüleʼerüin naaʼin wanee wawala waashajaapa nümaa, waluwataapa mensaaje nümüin jee shiale wayamaajapa nia. Talateerü naaʼin Jehová wachajaale sukuwaʼipa süpüla wakaalinjain na waneinnua. Soto waaʼin kooʼomüinjeerüin tü waʼyataainkat nümüin Jehová paʼaraiisüpa tü mmakat. Anuu sünüiki Holly süchiki tia: «Wanaa sümaa mojuin taaʼin jülüjasü taaʼin süpüshuaʼa tü taaʼinreetkat chapa taya suluʼu tü paʼaraiisükat, nükaalinjeerü taya Jehová süpüla tekeraajüin shia».

14. ¿Jetsü tü wane kasa mojeetkalü atuma paaʼin?

¹⁴ Jülüjale waaʼin wakuwaʼipa wamüiwaʼa otta tü suchuntakat waaʼin. Eesüjaʼa weʼrüle suluʼupünaa internet waneinnua wayuu talatakana aaʼin sutumajee neʼraajüin waneirua mma, sutuma wainmain tü kasa nayaʼlajaakat jee sutuma naaʼinrüin tü suchuntakat naaʼin. Nnojotsü mojuin waaʼinrüle tü kasa talatakalü atuma waaʼin jama nukumajüin waya Jehová süpüla talatüin waaʼin. Eepejeʼe na wayuu nnojotkana talatüin aaʼin mayaainjeʼe naaʼinrüin tü suchuntakat naaʼin. Anuu tü sümakat Eva wanee wawala pürekutsoot: «Wanaa sümaa shiain waaʼinmaain maʼin tü suchuntakat waaʼin nnojotsü talatüin waaʼin».

15. ¿Kasa watüjaka sünainjee tü naaʼinrakat Salomón?

¹⁵ Jülüjataa waaʼin nukuwaʼipa Salomón, chi aluwataashikai, nütüjawee aaʼu müleka talateerüle naaʼin naaʼinrüle tü suchuntakat naaʼin. Jamüshijaʼa nia jülüjasü naaʼin niküinjatüin eküülü jemetakat maʼin, naapajüin muusika anakat maʼin jee niyaʼlajüin wainma kasa kojutüka maʼin, nnojotpejeʼe talatüin naaʼin sümaa tia. Anuujeseʼe nünüiki: «Matüjainsat mapüsaa tü woʼukot suulia eʼrajaa wanee kasa otta tü wacheʼekat matüjainsat mapüsaa suulia aapajaa» (Ecl. 1:8; 2:1-11). Naashin waneinnua wayuu talateerü waaʼin washirüle waya jee waaʼinrüle tü suchuntakat waaʼin, nnojotpejeʼe shiimain tia.

16. ¿Jamüsü talateetkaʼa waaʼin wakaalinjale na waneinnua? (Piirakaa sümüin tü ayaakuaakat).

¹⁶ Tü waaʼinrajatkat süpüla talatüin waaʼin wachikuaʼa. Nüküjain Jesús «talataleesia maʼin waaʼin wasülajüle wanee kasa suulialeʼeya süsülajünapa wamüin» (Aluw. 20:35). Anuu nünüiki wanee laülaashi suluʼu tü outkajaaleekat Alekos nünülia: «Sutuma taaʼinrüin kasa napüleerua na waneinnua, nnojotsü jülüjain taaʼin takuwaʼipa tamüiwaʼa, sutuma tia talatüsü taaʼin». ¿Kasa eeka süpüla waaʼinrüin napüleerua na waneinnua? Watüjale saaʼu sülatüin wanee kasa mojusü nümüin wanee wawala wakatchinra naaʼin, aneerü naaʼin chi wawalakai waapajüle nünüiki. Wayaawatüle saaʼu jamüin naaʼin eesüjaʼa wasoʼirüle naaʼin sünain niyaawatüin saaʼu Jehová tü suluʼukat naaʼin jee nükaalinjeein nia (Sal. 55:22; 68:19). Waküja nümüin nnojoluin nia nüpütüin Jehová nümüiwaʼa (Sal. 37:28; Is. 59:1). Eeshi süpüla puunejaain nia sünain ekaa jee shiale sünain awaraijawaa yalapünaa jee shiale sünain aküjaa pütchi, aneerü naaʼin sutuma tia. Müle shia watuma wooʼulaajeerü nükaalinjain Jehová na wawalayuukana wakajee jee talateerü waaʼin wakaalinjale na waneinnua (Prov. 11:25).

17. ¿Kasa waaʼinrajatka süpüla talatüin waaʼin? (Salmo 43:4).

¹⁷ Ayatüle wekirajaain nüchiki chi Washikai Jehová jee waaʼinrüle tü nümakat wamüin talateerü waaʼin. Saashin tü Bibliakat nia Jehová chi talataleekai maʼin atuma waaʼin (paashajeʼera Salmo 43:4). Jaʼitairü kasain alatüin wamüin eesü süpüla jimatüin waaʼin. Aleewale maʼin waya nümaa Jehová talateerü maʼin waaʼin waneepia nutuma (Sal. 144:15).