Paaʼinrajatka süpüla paashajeʼerawalin tü Bibliakat waneepia

Eesüjaʼa nnojorüle waashajeʼerüin tü Bibliakat waneepia sutuma wainmain tü kasa waaʼinrawaikat (Jos. 1:8). Anasü puuʼulaküle paaʼinrüin tüü süpüla paashajeʼerüin shia waneepia:

• Piʼitaa wanee alarma. Anasü paaʼinrüle tia suluʼu püserulaatse süpüla sotuin paaʼin tü oora paashajeʼerüinjatkalü oʼu tü Bibliakat.

• Piʼitaa tü Bibliakat eere piʼrüinjatüin shia. Paashajeʼerüle tü Bibliakat suluʼu karaloʼutain shia piʼitaa shia eere piʼrüinjatüin süpüla paashajeʼerüin shia waneepia (Deut. 11:18).

• Paapaja tü pütchi akürawaajünakat suluʼujee tü Bibliakat. Eesü süpüla paapajüin shia sümaʼainruʼu paaʼinrüin wanee kasa. Anuu süchiki wanee wawala kachonka, Tara sünülia. Pürekutsoot shia jee aʼyataasü shia saʼwai. Anuu sünüiki: «Tountuin taashajeʼerüin tü Bibliakat waneepia sutuma taapajawalin shia sümaʼainruʼu taaʼinrüin wanee kasa miichipaʼa».

• Nnojo puuʼulaain sülatüin wanee kaʼi sümaa nnojolin paashajeʼerüin tü Bibliakat. Isale püchiki paashajeʼerüin tü Bibliakat soʼu tü oora piʼitaakat süpüleerua tia, anasü paashajeʼerüle maʼaka jeʼra wetsiikulo süpülapünaa piisalaain, jama katsüinjeerüin punoula sutuma (1 Ped. 2:2).