Aneerü maʼin wamüin tü ashajünakat suluʼu tü karaloʼutakat Job weʼrapa wamüliala

1, 2. ¿Jamüsü choʼujaakaʼa watüjaain saaʼu süchiki tü ashajünakat suluʼu tü karaloʼutakat Job?

ANASHAATASÜ maʼin tü ashajünakat suluʼu tü karaloʼutakat Job. Mayaainjeʼe sülatüirüin maʼaka 3.500 juya süchikijee süshajünüin, kamalainsü shia sümüin wayuu maaʼulu yaa sutuma mapüleein tü pütchi ashajünakat suluʼu otta kaawain shia. Nüshajüin Moisés tia karaloʼutakat nünüikipejeʼe shia Jehová (2 Tim. 3:16).

² Choʼujaasü watüjaain saaʼu tü ashajünakat suluʼu tü karaloʼutakat Job. Jama wayaawateerüin saaʼu waneʼewai wakua waʼyataainjanale nümüin Jehová süka alin nia wapüla otta süka kojutuin nia wamüin. Sutuma tü ashajünakat suluʼu tü karaloʼutakat Job weʼraajüin maʼin nukuwaʼipa Maleiwa: aipürai nia wayuu, kekiishi nia, lotusü nukuwaʼipa otta pülashi nia. Wainmatua süshajünüin suluʼu tü karaloʼutakat Job niain Jehová chi «Pülashikai maʼin». Wainmatua süshajünüin tia suluʼu tü karaloʼutakat Job suulialeʼeya tü wane karaloʼuta eekat suluʼu tü Bibliakat. Ashajünüsiaʼaya süchiki tü kasa sütüjaweekat maʼin aaʼu wayuu maʼaka saaʼin jamüin nuuʼulaaka Maleiwa müliain waya.

3. ¿Jamüsü anaka wekirajaale sünain tü ashajünakat suluʼu tü karaloʼutakat Job?

³ Maʼaka niʼrüin wanee wayuu kasa süpüshuaʼa süraloʼujee wanee uuchi, müsia sukuwaʼipa waashajeʼerüle tü nümakat Jehová suluʼu tü karaloʼutakat Job, wayaawateerü aaʼu wainma kasa maʼaka saaʼin jamüin joutka maʼin müliaa. Müsüjeseʼe anain wekirajaale sünain tü ashajünakat suluʼu tü karaloʼutakat Job weʼrapa maʼin müliaa maʼaka anain shia paala namüin na israelitakana. Otta wekirajaajeerü anain tü waaʼinrajatkat süpüla waküjain pütchi sümüin wayuu sükajee tü ashajünakat suluʼu tü karaloʼutakat Job.

NUUʼULAAIN MALEIWA NIʼRÜIN JOB MÜLIAA

4. ¿Kasa naataka aluʼu nukuwaʼipa Job noulia waneinnua israelita eejeenakana nükalioʼu?

⁴ Kepiapuʼushi Job suluʼu tü mma kanüliakalü Uz, eesüjaʼa pejere shia sünain tü mmakalü Arabia. Wanaa sümaa tia chajana achepchieein na israelitakana suluʼu tü mmakalü Egipto. Naatasü nukuwaʼipa Job noulia waneinnua israelita aʼwaajakana maleiwayaasü eejanakana nükalioʼu (Jos. 24:14; Ezeq. 20:8). Anuujeseʼe tü nümakat Maleiwa nüchiki: «Nnojoishi eein wanee [wayuu] müin aka naaʼin» (Job 1:8).a Wayuu washirü Job, eʼnnaajünüshi maʼin nia otta kojutushi maʼin nia atumawaa naʼakajee na wayuu wüinpüjeʼewaliikana (Job 1:3). Nüʼürülakajasaʼa maʼin Job Satanás sutuma waneepiain nia nümaa Jehová.

5. ¿Jamüshi nuuʼulaakaʼa Maleiwa müliain Job? (Job 1:20-22; 2:9, 10).

⁵ Nüküjain Satanás nnojoleechin waneepiain Job nümaa Jehová niʼrüle müliaa (Job 1:7-11; 2:2-5). Aishiyaajeʼe Job nüpüla Jehová, nuuʼulaapejeʼe niʼrüin müliaa süpüla sütüjaanüin aaʼu shiimainreje tü nümakat Satanás nüchiki Job (Job 1:12-19; 2:6-8). Najaʼttirüinjeseʼe Satanás nümüʼlüin Job, nuʼuta aaʼinchii na polooshiikana nüchonnii otta müliashi nia sutuma wanee ayuulii ourulajaka sümaa kajüin nüta sutuma nuuʼuinainjee sünainmüinreʼeya nikii. Nüchechetpejeʼe naaʼin Job soʼunnaa tia jee waneepiashi nia nümaa Jehová (paashajeʼera Job 1:20-22; 2:9, 10). Aawaleʼennüshi Job nutuma Jehová, naapüin nümüin washirüü, polooshii nüchonnii jee kojutushi Job sümüin wayuu. Süchikijee tü alatakat nümüin Job katüsü noʼu soʼu 140 juya, niʼraajüinjeseʼe nachonnii na nüikeyuukana (Job 42:10-13; 16). ¿Kasa natüjaka na israelitakana sünainjee tü alatakat nümüin Job? ¿Kasa watüjaka sünainjee tia maaʼulu yaa?

6. ¿Jamüsüjeʼe nakuwaʼipa na israelitakana natüjaalejeʼe saaʼu tü alatakat nümüin Job? (Piirakaa sümüin tü ayaakuaakat).

⁶ Eeshiijaʼa natüjale na israelitakana sünainjee tü nukuwaʼipakat Job. Müliashii maʼin na israelitakana soʼu chajanain naya Egipto. Jülüjataa waaʼin nukuwaʼipa Josué nümaa Caleb. Achepchieepuʼushii chaa Egipto jimaʼaliiwaʼaya naya. Shiasaʼa mapa, chajana naya 40 juya isashiipaʼa sutuma neʼrüliijaain wayumüin waneinnua israelita. Natüjaalejeʼe saaʼu na israelitakana tü alatakat nümüin Job eesüjaʼa naatale nakuwaʼipa. Nayaawatüinjeʼe saaʼu jaralin maʼin chi müliakai atuma saaʼin wayuu otta jamüin nuuʼulaaka Maleiwa müliain wayuu jee jamüin nuchuntaka waneepiain wayuu nümaa.

7, 8. ¿Jamüsü aneetka namüin na müliakana aaʼin tü ashajünakat nüchiki Job? Püküja süchiki tü alatakat sümüin wanee wawala.

⁷ Tü watüjakat sünainjee nukuwaʼipa Job. Maaʼulu yaa wainma na wayuu manoulakana süka nnojoluin nayaawatüin saaʼu jamüin sülataka kasa mojusü namüin na wayuu anamiakana. Jülüjataa waaʼin sukuwaʼipa wanee wayuu chejeʼewat Ruanda, Hazel sünülia.b Jintuluiwaʼaya shia anoujapuʼusü nünain Maleiwa, ooʼulaapejeʼe suulia anouja mapa sutuma tü alatakat sümüin. Ooʼulaajiraashii na wayuu kachooinkana shia jee müliasü maʼin saaʼin nutuma chi süshiyaashikai. Shiasaʼa majayülüiwaʼaya shia ataüjaanüsü nutuma wanee wayuu. Eetaayaai sümüliannüin aaʼin natuma na wayuu suluʼukana tü iküleesia suʼunapuʼukalü aluʼu. Süshajaka wanee karaloʼuta eere sümüin: «Maleiwakalee müliasü maʼin taaʼin putuma, eereje aneein takuwaʼipa otta toʼuraajüin pümüin. Nnojoleerü joo tachajaain püchiki piantua, shia neʼe taaʼinrajatka jooluʼu tü keeʼireekat taaʼin». Müsia neʼe maaʼulu yaa, watta naalii na wayuu anoujakana sünain niain Maleiwa kasirüin tü müliaa neʼrakat, amülialaapejeʼe waaʼin naalin jee wakaalinjeein naya.

⁸ Eekajasaʼa wayakana wayaawata aaʼulu sutuma tü ashajünakat suluʼu tü karaloʼutakat Job nnojoluin nüsirüin Maleiwa tü müliaa weʼrakat, niain kasirüin Satanás. Otta wayaawata aaʼu nnojoluin neʼe müliain naaʼin na wayuukana sünainjee mojuin tü kasa naneekakat, eesüjaʼa müliale waaʼin süka eein süpüla sülatalaʼa sümüin wanee kasa wamüin (Ecl. 9:11; Job 4:1, 8). Watüjaa aaʼulia talateerüin naaʼin Jehová waneepiale waya nümaa soʼunnaa müliaa otta atüjaaneechi aaʼu alaain Satanás (Job 2:3; Prov. 27:11). Talatüsü maʼin waaʼin süka watüjaain saaʼu sünainjee tü Bibliakat jamüin müliaka waya. Jülüjataa waaʼin tü saaʼinrakat Hazel, ekirajaasü shia sünain tü Bibliakat namaa na Aküjaliikana pütchi. Shiyaawata aaʼu nnojoluin nüsirüin Maleiwa müliain wayuu. Anuu sünüiki: «Taküjain nümüin Jehová süpüshuaʼa tü suluʼukat taaʼin, nnojotsiaajeʼe akayalaaweein taya nuulia, taainjain tia süka nnojoluin teʼraajüin tü nukuwaʼipakat. Pansaaitpa tamüin alin taya nüpüla Jehová jee talatashaatasü maʼin taaʼin sutuma tia». ¿Aashin talatüin waaʼinña süka watüjaaitpain saaʼu nnojoluin nüsirüin Maleiwa tü müliaa weʼrakat? Wekirajaa sünain jamüin aneetka wamüin tü ashajünakat nüchiki Job weʼrapa müliaa.

WACHECHEREERÜ WAAʼIN WASHATÜLE NUKUWAʼIPA JOB

9. ¿Kasa naaʼinraka Job mayaainjeʼe müliain nia? (Santiago 5:11).

⁹ Keemasü maʼin tü alatakat nümüin Job, müliapuʼusü maʼin naaʼin. Wattaluʼupuʼushi Job joyotuin suulia wayuu saʼaka paliʼi, aisü maʼin tü ayuulii nünainjatkat, yooisü nüta sutuma, aürütshi maʼin nia sümaa ourulajüin jee kajüin nüta. Maʼlainsat naaʼin, shia neʼe kaʼlainchonka naaʼin süpüla nüsütajüin nüta süka wanee saʼata amüchi, leentüshi maʼin nia sutuma müliain naaʼin. Mayaainjeʼe mayein maʼin Job, nüchecherüin maʼin naaʼin süka kanoulain maʼin nia (paashajeʼera Santiago 5:11). ¿Kasa nuuntaka atuma waneepiain Job nümaa Jehová?

10. ¿Jamüsü watüjaakaʼa saaʼu aleewain maʼin Job nümaa Jehová?

¹⁰ Nnojoishi akayalaain Job nuulia Jehová, nüküjapuʼuin nümüin süpüshuaʼa tü suluʼukat naaʼin (Job 10:1, 2; 16:20). Jamüsüjaʼa suluʼu kapiituloka apünüin, ashajünüsü niyounnalaain maʼin Job nümüin Jehová sutuma tü müliaa niʼrakat, jama jülüjain naaʼin niain kasirüin Jehová tü alatakat nümüin. Shiasaʼa yootopa nia namaa na apünüinshiikana naʼaleewainyuu, kojuyatua nüküjain süchiki anain nukuwaʼipa jee waneepiain nia nümaa Jehová. Müshi nümakai aaʼin lotuin nukuwaʼipa nuulialeʼeya Maleiwa (Job 10:1-3; 32:1, 2; 35:1, 2). Nüküjain Job mapa nnojoluin niyaawatüin nünüiki (Job 6:3, 26). Suluʼu tü kapiitulokat 31 nuchuntuin Job nümüin Jehová naapajüin nünüiki otta nüküjain Jehová nümüin wayuuin lotoo akuwaʼipachi nia (Job 31:35). Nnojotpejeʼe anain tü nuchuntakat Job nümüin Jehová.

11. ¿Jamüsü sukuwaʼipa nusoutia Jehová nümüin Job?

¹¹ Wayaawata aaʼulu müin nünüiki Job nümüin Jehová süka aleewapuʼuin nia nümaa otta nütüjaa aaʼu kojutuin nümüin Jehová waneepiain nia nümaa. Nusoutapa Jehová nümüin Job nnojotsü nüküjain nümüin jamüin maʼin niʼraka nümüliala, nnojoishi jashichin nümüin, nnojoishi nüʼülüjain amüin Job saaʼujee niyounnalaain paala nümüin. Nüchiaain nia süka anakalü akuwaʼipa maʼaka wanee wayuu aikai apüla nüchon. Atanalaasü naaʼin Job sutuma tia otta niyaawata aaʼu wainmain tü kasa nnojotkat nütüjaain aaʼu jee ayaawajaashi nia suulia tü nümakat paala nümüin Jehová (Job 31:6; 40:4, 5; 42:1-6). ¿Kasa natüjaka na israelitakana sünainjee tü alatakat nümüin Job? ¿Kasa watüjaka sünainjee tia maaʼulu yaa?

12. ¿Kasa natüjaka na israelitakana sünainjee tü alatakat nümüin Job?

¹² Eeshiijaʼa natüjale na israelitakana sünainjee tü nukuwaʼipakat Job. Jülüjataa waaʼin nukuwaʼipa Moisés, wainma kasa alataka nümüin soʼu nekiipüʼüin nia na israelitakana. Eesü kaʼi yüülaweekalü oʼu naaʼin jee mojuwaisü naaʼin sutuma neʼrüliipuʼuin wayumüin na israelitakana nümüin Jehová. Ayonnalaashii maʼin na israelitakana nümüin Jehová, nnojotpejeʼe müin nukuwaʼipa Moisés. Yootopuʼushi nia nümaa süchiki tü kasa shapaakalü atuma naaʼin (Éx. 16:6-8; Núm. 11:10-14; 14:1-4, 11; 16:41, 49; 17:5). Jamüshijaʼa chapa Moisés namaa na israelitakana suluʼu tü mma kanüliakat Cadés, sülatapa 40 juya chain naya suluʼu tü isashiipaʼakat, nnojotsü niyaawatüin Moisés nünüiki otta nnojoishi kojutuin Maleiwa nutuma noʼuluʼu na israelitakana. Shiasaʼa nüchiaanapa nutuma Jehová nüchecherüin naaʼin Moisés (Sal. 106:32, 33). Sutumajee tia nüküjaka Jehová nümüin Moisés nnojoluinjachin nikerotuin suluʼumüin tü mma aapünajatkat namüin na israelitakana (Deut. 32:50-52). Mojukajasaʼa naaʼin Moisés sutumajee tia, naapaapejeʼe sümaa tü nüchiajaakalü oulia nia Jehová. Tü alatakat nümüin Job eesüjaʼa süpüla shiain nüchecherüin atuma naaʼin Moisés jee na israelitakana. Eesüjaʼa nayaawatüle saaʼu nnojoluin yaletüinjatüin naaʼin jee naapaainjatüin sümaa tü nüchiajaakalü oulia naya Jehová.

13. ¿Jamüsü wachechereetkaʼa waaʼin wekirajaale sünain nukuwaʼipa Job? (Hebreokana 10:36).

¹³ Tü watüjakat sünainjee nukuwaʼipa Job. Wainma tü kasa wachecherawalinjatkalü atuma waaʼin (paashajeʼera Hebreokana 10:36). Eesüjaʼa shiale sutuma ayuulin waya, mojuin waaʼin, sutuma eein wanee mojujirawaa sümaa wapüshi, nünaajaale wanee wapüshi jee shiale sutuma wanee kasa kapüleeka maʼin wamüin. Mojuleejeeria waaʼin süküjünüle wanee pütchi airuʼut wamüin soʼunnaa sülatüin tia wamüin (Prov. 12:18). Pansaaleeitpa wamüin sünainjee tü nukuwaʼipakat Job naapajeerüin Jehová wanüiki waküjale süpüshuaʼa tü suluʼukat waaʼin jee tü shapaakalü atuma waaʼin (1 Juan 5:14). Waküjapa tia nümüin nnojoleechi aʼülüjain wamüin mayaawatüinre waya saaʼu wanüiki. Nükatchinreerü waaʼin süpüla wachecherüin waaʼin soʼunnaa tü müliaa weʼrakat (2 Crón. 16: 9; Sant. 1:5). Choʼujaale wamüin wachiajaanüin nükaalinjeena waya sükajee tü Nünüikikat, nükajee wanee laülaashi suluʼu tü outkajaaleekat jee niale wanee waʼaleewain laülaakai aaʼin sünain anoujaa. Tü watüjakat sünainjee nukuwaʼipa Job shia wachecherüinjatüin waaʼin nüchiajaapa waya Jehová (Heb. 12:5-7). Anasü nukuwaʼipa Job sutumajee naapaain sümaa tü nüchiajaakalü oulia nia Jehová, meena wayakana nnojorüle yaletüin waaʼin jee waapaale sümaa tü nüchiajaakalü oulia waya Jehová (2 Cor. 13:11). Wainma tü kasa watüjakat sünainjee nukuwaʼipa Job. ¿Kasa waaʼinrajatka süpüla waküjain pütchi sümüin wayuu süka tü karaloʼutakat Job? Anashii wekirajaale sünain tia.

WAKÜJA PÜTCHI SÜMÜIN WAYUU SÜKAJEE TÜ KARALOʼUTAKAT JOB

14. ¿Jamüsü wanüiki sümüin wayuu süsakirüle waya süchiki jamüin müliaka waya?

¹⁴ Waküjapa pütchi eeshii na wayuu atüjaweekana saaʼu jamüin müliaka waya. Waküjain namüin tü sümakat tü Bibliakat süchiki tü alatakat paala suluʼu tü apainkat Edén wanaa sümaa nimeejünüin Adán sümaa Eva nutuma Satanás. Sünainjee tia moonooinsalii naya nümüin Maleiwa (Gén. 3:1-6). Outusü wayuu jee müliasü saaʼin wayuu sünainjee niʼrüin wayumüin Adán sümaa Eva (Roma 5:12). Eesüjaʼa waküjale sümüin wayuu nuuʼulaain Maleiwa weʼrüin wamüliala maaʼulu yaa süpüla sütüjaanüinjatüin aaʼu alaain Satanás jee niain neʼe Maleiwa ountakai anainjatüin sukuwaʼipa wayuu (Apoc. 21:3, 4). Waküjale sümüin wayuu tia shiyaawateerü aaʼu jamüin weʼraka müliaa.

15. ¿Jamüsü anakaʼa waküjale pütchi sükajee tü alatakat nümüin Job nasakirapa waya na wayuukana süchiki jamüin müliaka waya? (Piirakaa sümüin tü ayaakuaakat).

¹⁵ Nasakirüle waya na wayuukana jamüin müliaka waya, anashii yootule waya namaa süchiki tü alatakat nümüin Job. «Anasü maʼin tü püsakirakalü anain. Müsia neʼe tü nüsakirakalü anain wanee wayuu nümaiwajachi eʼrakai nümüliala, Job nünülia. Jülüjasü naaʼin paala niain kasirüin Maleiwa tü alatakat nümüin», eeshii süpüla wamüin namüin (Job 7:17-21). Eesüjaʼa poneerüle naaʼin nnojoluin niain neʼe asakiraka sünain tia, anashii waküjale nümüin nnojoluin niain Maleiwa kasirüin tü alatakat nümüin Job, niain Satanás kasitka tia. Nüküjain Satanás nnojoleechin waneepiain wanee wayuu nümaa Jehová niʼrüle müliaa, müsüjeseʼe müliain naaʼin Job nutuma Satanás shiiʼiree nuuʼulaainjachin suulia aʼyatawaa nümüin Jehová. Nuuʼulaain Maleiwa niʼrüin müliaa Job süka nütüjaain saaʼu nuunteerüin nüchecherüin naaʼin. Nütüjaa aaʼu Jehová nachechereerü naaʼin na wayuukana otta atüjaaneerü aaʼu sükajee tia alaain Satanás. Sajaʼlajaayamüin wanüiki eeshii süpüla waküjain nümüin chi wayuukai niʼrüin kasa anasü Job sünainjee nüchecherashaatain naaʼin nünain Jehová. Watütüleʼereerü naaʼin waküjale namüin nnojoluin niain Maleiwa kasirüin tia.

16. Püküja süchiki tü alatakat nümüin Mario.

¹⁶ Anasü maʼin tü ashajünakat suluʼu tü karaloʼutakat Job nümüin wanee wayuu kanüliakai Mario. Aküjünüsü pütchi nümüin soʼu juyakat 2021 sutuma wanee wawala suluʼupünaa teleepono, saashajeʼerüin nümüin wanee pütchi suluʼujeejatka tü Bibliakat sümaa süküjain nümüin naapajeerüin Maleiwa nünüiki nuʼuraajüle nümüin jee niʼreechin kasa anasü mapeena. Süsakitka nia süchiki jamüin saaʼin nümüin tü pütchi saashajeʼerakat nümüin, nüküjaka sümüin yalajachin nia sünain ashajaa wanee carta süpülapünaa suunejüin nia, nüshajüin nuʼuniraainjachin aaʼin. Nümaka sümüin: «Anoujashiaaje taya nünain Maleiwa, shiasaʼa sutumajee tü alatakat tamüin antajaasü suluʼu tekii niyüülajüin taya Maleiwa». Suunejaka nia tü wawalakat nüchikuaʼa otta yootushii naya kamaʼa süchiki tü alatakat nümüin Job. Naashajeʼeraka Mario süpüshuaʼa tü karaloʼutakat Job. Sülatiraka tü wawalakat nümüin wanee enlace süpüla naashajeʼerüin tü Bibliakat suluʼupünaa jw.org. Nikirajaaka Mario sünain tü Bibliakat otta talatüsü maʼin naaʼin sutuma tü nikirajaakalü anain nüchiki Maleiwa süka niyaawatüin saaʼu alin nia nüpüla jee naaʼinmajeein nia.

17. ¿Jamüsü kojutukaʼa wamüin nüshajirüin Jehová tü nüchikimaajatkat Job suluʼu tü Bibliakat? (Job 34:12).

¹⁷ Pülasü tü Nünüikikat Maleiwa: sükaalinjain wayuu otta sümülialüin naaʼin na müliakana aaʼin (Heb. 4:12). Anasü maʼin tü naaʼinrakat Jehová süka nüshajirüin tü nüchikimaajatkat Job suluʼu tü Bibliakat (Job 19:23, 24). Ashajünüsü suluʼu tü karaloʼutakat Job nnojoluin naaʼinrüin kasa mojusü chi Maleiwakai (paashajeʼera Job 34:12). Ashajünüsü suluʼu jamüin nuuʼulaaka Maleiwa eein müliaa, kasain waaʼinrajatüin süpüla wachecherüin waaʼin otta eein süpüla wamülialüin saaʼin wayuu sükajee tü sümakat tia karaloʼutakat. Sünain tü wane ekirajaayakat wekirajaajeerü anain sooʼomüin süchiki tü karaloʼutakat Job otta tü waaʼinrajatkat süpüla anain wanüiki wachiajaapa wayuu.