Washata nukuwaʼipa Jehová, nnojo yaletüin waaʼin

1. ¿Kasa naataka aluʼu nukuwaʼipa Jehová noulia na aluwataashiikana?

WAINMA na aluwataashiikana sainküin mma yaletakana aaʼin sutuma washirüin naya. Naatapejeʼe nukuwaʼipa Jehová, nnojoishi nia yaletüin aaʼin eerejeʼe niain chi Pülashikai maʼin (Sal. 113:5-8). Jaʼyasü saaʼu süpüshuaʼa tü naaʼinrakat Jehová nnojoluin yaletüin naaʼin. Ekirajaainjana waya sünain ekirajaayakat tüü sünain pienchisü kasa naaʼinraka Jehová jaʼyaka atuma naaʼu nnojoluin yaletüin naaʼin. Ekirajaainjanaʼaya waya süchiki tü naaʼinrakat Jesús süpüla nüshatüin nukuwaʼipa chi Nüshikai. Aneerü wamüin ekirajaayakat tüü süpüla aleewain maʼin waya nümaa Jehová otta nnojoluin yaletüin waaʼin.

KAMANEESHI JEHOVÁ

2. ¿Kasa watüjaka nüchiki Jehová sünainjee tü sümakat Salmo 62:8? (Piirakaa sümüin tü ayaakuaakat).

² Nnojoishi kamaneein chi wayuu yaletakai aaʼin, mojutusat wayuu nümüin jee jülüjasü naaʼin anain nukuwaʼipa noulia. Müsüjeseʼe nnojoluin aleeweein wayuu nümaa. Naatashaatasü maʼin nukuwaʼipa Jehová. Sutuma nnojoluin yaletüin naaʼin nücheküin aleewain waya nümaa jee waküjain nümüin süpüshuaʼa tü suluʼukat waaʼin (paashajeʼera Salmo 62:8). Naapajüin Jehová wanüiki woʼuraajapa nümüin maʼaka naaʼin wanee wayuu jülüjakai aaʼin nanüiki nüchonnii. Wayaawata aaʼu müin nukuwaʼipa Jehová sünainjee süshajünüin suluʼu tü Bibliakat nanüiki waneinnua wayuu oʼuraajakana nümüin. Watüjaa aaʼulu sünainjee tia naapajeerüin wanüiki yootule waya nümaa (Jos. 10:12-14; 1 Sam. 1:10-18). ¿Kasa waaʼinrajatka nnojorüle woʼuraajüin nümüin Jehová sutuma jülüjain waaʼin nnojoluin anain maʼin wakuwaʼipa?

3. ¿Kasa wayaawata atuma eein süpüla woʼuraajüin waneepia nümüin Jehová?

³ Anashii woʼuraajüle nümüin Jehová mayaainjeʼe jülüjain waaʼin maalin waya nüpüla sutuma nnojoluin anain maʼin wakuwaʼipa. Wayaawata aaʼulu tia sünainjee tü nüküjakat Jesús nüchiki wanee jimaʼai nümaa chi Nüshikai. Nnojoishi nia aleʼejeein nüchikuaʼa nipialuʼumüin chi nüshikai saaʼujee tü kasa mojusü naaʼinrakat. ¿Kasa naaʼinraka chi nüshikai niʼrapa nüleʼejüin nüchikuaʼa? «Nuwataakalaka nüpanapa sümaa nukoʼojooin nünain jee nutuʼlaka nuwalapaʼa» (Luc. 15:17-20). Müsia neʼe nukuwaʼipa Jehová, naapajüin nanüiki na wayuu shapaakana aaʼin sutuma tü alatakat namüin jee nayale na mojukana aaʼin sutuma wanee kasa mojusü naaʼinraka. Sutuma nnojoluin yaletüin naaʼin Jehová naapajüin nanüiki naya wayuukana (Lam. 3:19, 20). Amülialaasü naaʼin naalin, müshijeseʼe eemaatüin nia süpüla nükatchinrüin naaʼin, motuin naaʼin naainjala jee süpüla nayaawatüin saaʼu alin naya nüpüla (Is. 57:15). Naaʼinrüin tia Jehová nakajee na laülaashiikana, na wawalayuukana jee na wapüshi anoujakana wanaa wamaa (Sant. 5:14, 15). Nükaalinjain waya Jehová süka nücheküin aleewain waya nümaa.

4. ¿Kasa wayaawataka atuma kamaneein Jesús?

⁴ Nüshatüin Jesús nukuwaʼipa chi Nüshikai. Nnojotsü yaletüin naaʼin Jesús. Jamüshijaʼa wanaa sümaa yaajachin nia mmapaʼa nnojotsü mmoluin wayuu neema jee nasakirawalin nia süchiki wanee kasa (Mar. 4:10, 11). Nüsakirapa Jesús na wayuukana naküjapuʼuin nümüin süpüshuaʼa tü suluʼukat naaʼin (Mat. 16:13-16). Noʼtchejaale sümaa wanee kasa nüsakiraka anain naya Jesús, nnojoishii naya mmoluin süka natüjaain saaʼu nümüliajülin wayuu Jesús jee nnojoishi nia kashapajaaralin (Mat. 17:24-27). Nayaawata aaʼu na nikirajüinkana Jesús jaralüin tü nukuwaʼipakat Jehová süka wanaawain nukuwaʼipa Jesús nümaa chi Nüshikai (Juan 14:9). Neʼrüin na nikirajüinkana Jesús naatain nukuwaʼipa Jehová noulia na karaloʼutamaajanakana jee na fariseokana süka müliain wayuu natuma, yaletayaain naaʼin otta matüjainsalii amülialawaa saalin wayuu. Eekajasaʼa Jehová nnojotsü yaletüin naaʼin jee kamaneeshi nia sümüin wayuu.

5. ¿Jamüshii aleeweenaka na wawalayuukana wamaa kamaneere waya namüin?

⁵ Washata nukuwaʼipa Jehová. Kamaneejeena waya nnojorüle yaletüin waaʼin. Yaletüle naaʼin wanee wayuu achunjeerü naaʼin, jülüjeerü naaʼin anaʼleein nukuwaʼipa noulia na waneinnua jee nnojoleerü motuin naaʼin saainjala wayuu nümüin. Nnojoleetkalaka aleeweein wayuu nümaa. Eekajasaʼa kamaneere wanee wayuu, nnojoire kashapajaaraliin jee motule naaʼin saainjala wayuu nümüin aleeweerü wayuu nümaa sünainjee müin tü nukuwaʼipakat (Col. 3:12-14). Nachajaainjatü maʼin sukuwaʼipa na laülaashiikana süpüla kamaneein naya namüin na wawalayuukana, nounteerü tia namaale naya waneepia. Anasüjeseʼe nojuʼitawaire namaa na wawalayuukana sünain aküjaa pütchi otta anasü noʼunule sünain tü outkajawaakat suulia makatüin naya otta neʼrajüin shia suluʼupünaa internet. Naaʼinrüle tia, aleeweena na wawalayuukana namaa jee mapüleejeerü namüin naküjain süchiki tü kasa alatakat namüin.

NNOJOISHI ICHEIN JEHOVÁ SÜCHIIRUA NÜNÜIKI

6, 7. Püküja waneirua kasa naaʼinraka Jehová wayaawataka atuma nnojoluin yaletüin naaʼin.

⁶ Icheshi süchiirua nünüiki chi wayuu yaletakai aaʼin. Nnojotpejeʼe müin nukuwaʼipa Jehová eerejeʼe nütüjaain saaʼu kasa süpüshuaʼa jee kekiin maʼin nia. Jülüjataa waaʼin tü naaʼinrakat Jehová wanaa sümaa mojuin sünüiki Míriam nümaa Aarón nüchiki Moisés, chi wayuu nüneekakai Jehová süpüla nuʼunirüin nakuwaʼipa na israelitakana. Jashichika Jehová sümüin Míriam sutuma mojutuin nia sümüin. Ayuuikalaka shia nutuma süka lepra. Nuchuntaka Aarón nümüin Moisés nükaalinjain shia, nuchuntaka joo Moisés nümüin Jehová naawaleʼerüin Míriam. Sutuma nnojoluin yaletüin naaʼin Jehová jee nnojolin nia ichein süchiirua nünüiki naaʼinrüin tü nuchuntakat Moisés jee naawaleʼeraka Míriam (Núm. 12:1-15).

⁷ Wekirajaa sünain wane kasa wayaawataka atuma nnojoluin yaletüin naaʼin Jehová. Jamüshijaʼa nia nüküjain nümüin Ezequías, chi aluwataashikai outuinjachin nia sutuma tü ayuulii nünainkat. Nuchuntaka maʼin Ezequías nümüin Jehová sümaa niʼyalajüin, naawaleʼerüinjachin nia. Sümülialaaka naaʼin Jehová naalin Ezequías, naawaleʼeraka nia jee katüsü noʼu soʼu 15 juya (2 Rey. 20:1, 5, 6). Amülialaasü naaʼin Jehová saalin wayuu jee nnojoishi nia ichekuʼu müin süchiirua nünüiki sutuma nnojoluin yaletüin naaʼin.

8. ¿Kasa naaʼinraka Jesús wayaawataka atuma nnojoluin ichein nia süchiirua nünüiki? (Marcos 3:1-6).

⁸ Nüshatüin Jesús nukuwaʼipa chi Nüshikai. Nükaalinjain maʼin wayuu Jesús yaaiwaʼaya nia saaʼu tü mmakat jee nnojoishi nia ichein süchiirua nünüiki. Jamüshijaʼa nia anasü wayuu nutuma sükalioʼu eemerawaa mayaainjeʼe mojushiin tia namüin na fariseokana (paashajeʼera Marcos 3:1-6). Wanee kasa wayaawataka atuma nnojoluin ichein Jesús süchiirua nünüiki shia süka anain suʼuniria nakuwaʼipa na anoujashiikana maaʼulu yaa. Kaainjarale joo wanee anoujashi nnojoishi nia kashapajaaralin jee naʼatapajüin niiʼiratüin tü nukuwaʼipakat (Apoc. 2:2-5).

9. ¿Kasa waaʼinrajatka suulia ichein waya süchiirua wanüiki? (Piirakaa sümüin tü ayaakuaakat).

⁹ Washata nukuwaʼipa Jehová. Nnojoluinjatü yaletüin waaʼin jee nnojoliinjana waya ichein süchiirua wanüiki maʼaka naaʼinrüin shia Jehová (Sant. 3:17). Wanee wayuu eekai kachooin nnojoluinjachin ichein nia süchiirua nünüiki. Nnojotpejeʼe maluʼuluin tia nuuʼulaainjatüin naaʼinrüin nüchonnii tü keeʼireekat naaʼin otta nnojoleerü nuchuntuin namüin nüchonnii wanee kasa iseetka nachiki. Anasü nashatüle nukuwaʼipa Jacob, anasü nukuwaʼipa namaa nüchonnii (Gén. 33:12-14). Nnojotsü anain nüküjale wanee wayuu eekai kachooin anaʼleein nukuwaʼipa wanee nüchon nuulia chi wane. Müinjatia neʼe nakuwaʼipa na laülaashiikana, nashatüinjatü nukuwaʼipa Jehová jee nnojoishii naya icheinjanain süchiirua nanüiki naneekapa wanee kasa pansaale shia sümaa tü sümakat tü Bibliakat (1 Tim. 3:2, 3). Anasü wayaawatüle saaʼu jamüin naataka tü jülüjakat naaʼin wanee wayuu jee nnojoluinjatü wayoujain nukuwaʼipa nnojorüle wanaawain naaʼin wamaa sünain wanee kasa (Roma 14:1). Anasü sütüjaale saaʼu wayuu nnojoliin ichein waya süchiirua wanüiki (Filip. 4:5).

NNOJOISHI KASHAPAJAARALIN JEHOVÁ

10. ¿Kasa wayaawataka atuma nnojolin kashapajaaralin Jehová?

¹⁰ Kashapajaarai maʼin chi wayuu yaletakai aaʼin. Akulajaamaatüsü naaʼin sünain aʼatapajaa. Naatashaatasü maʼin nukuwaʼipa Jehová, nnojoishi nia kashapajaaralin jee nnojoishi eein wanee makai aka naaʼin. Jamüsüjaʼa nükalioʼu Noé naʼatapajüin Jehová 120 juya süpülapünaa najaʼttirüin na mojulaashiikana (Gén. 6:3). Sutuma naʼatapajüin Jehová, miyoʼushii na nüchonniikana Noé jee nakaalinjain nia sünain akumajaa tü anuwakat. Kakalia mapa, nnojoishi ashapajaain Jehová nüsakirapa nia Abrahán kojuyatua süchiki jamüin najaʼttirüinjanaka na wayuu kepiakana Sodoma otta Gomorra. «¿Jaraikajasaʼa pia süpüla toonooinjachin sümaa pünüiki?», nnojotsü müin nünüiki Jehová nümüin Abrahán, jama nnojoluin yaletüin naaʼin jee nnojoishi nia kashapajaaralin (Gén. 18:20-33).

11. ¿Kasa naʼatapajaka Jehová saashin 2 Pedro 3:9?

¹¹ Ayatüsia müin nukuwaʼipa Jehová maaʼulu yaa, nnojoishi nia kashapajaaralin. Niʼitaatüjülia sükalia süpüla sajaʼttajatüin tü kasa alatakat sainküin mma. Aʼatapajüshi neʼe suuntuin tia kaʼikat, naaʼinrüin tia Jehová süpüla shiyaawajaainjatüin wayuu suulia saainjala (paashajeʼera 2 Pedro 3:9). ¿Amülasüche neʼe naʼatapajüin tia Jehová? Nnojottaa, watta naalii wayuu eʼraajakana nukuwaʼipa otta wattayülia na nnojoliikana eʼraajüin nukuwaʼipa. Anteetpejeʼe tü nükaliakat, aisüyaajeʼe wayuu nüpüla Jehová, nnojotpejeʼe nuuʼulaainjatüin naaʼinrüin kasa mojusü süpüla kaʼikat süpüshuaʼa (Hab. 2:3).

12. ¿Kasa naaʼinraka Jesús süka nnojoluin nüshapajaain aaʼin?

¹² Nüshatüin Jesús nukuwaʼipa chi Nüshikai. Kakaliashaata naʼatapajüin Jesús tü nükaliakat Jehová otta niʼrüin tü naaʼinrakat Satanás jee tü alawaa nüküjakat nüchiki Jehová jee nachiki na wayuukana (Gén. 3:4, 5; Job 1:11; Apoc. 12:10). Otta niʼrüin Jesús müliain maʼin saaʼin wayuu. Naʼatapajakajasaʼa maʼin Jesús tü kaʼi najaʼlajeʼerüinjatkalü oʼu tü kasa naainjakat chi Yolujaakai (1 Juan 3:8). Nnojotsü ashapajaain naaʼin Jesús süka nnojoluin yaletüin naaʼin jee niyaawatüin saaʼu niain neʼe Jehová aneekaka tü kaʼi anakalü oʼu süpüla aaʼinraa tia (Aluw. 1:7).

13. ¿Kasa naaʼinraka Jesús wayaawataka atuma nnojoluin nukulajaain aaʼin namaa na nikirajüinkana?

¹³ Wanaa sümaa yaajachin Jesús saaʼu tü mmakat, nnojotsü akulajaain naaʼin namaa na nikirajüinkana. Jamüshiijaʼa na nikirajüinkana kojuyatua naʼülüjiraain süchiki jaralinjachin nemiyoʼusein. Nnojoipejeʼe aashichijaain Jesús namüin, kamaneeshi nia namüin (Luc. 9:46; 22:24-27). Nütüjaa aaʼu Jesús neeʼirateerüin nakuwaʼipa mapa. Meeriaʼaya nukuwaʼipa Jesús wamaa nnojoleerü akulajaain naaʼin wamaa joole waya süpüla aaʼinraa wanee kasa mojusü.

14. ¿Kasa waaʼinrajatka süpüla washatüin nukuwaʼipa Jesús?

¹⁴ Washata nukuwaʼipa Jehová. Süpüla wountuin tia washatüinjatü nukuwaʼipa Cristo (1 Cor. 2:16). Anasüjeseʼe maʼin waashajeʼerüle tü nüchikimaajatkat Jesús ashajünaka suluʼu Mateo, Marcos, Lucas otta Juan. Otta wasakira waaʼin süchiki tü naaʼinrakat Jesús süpüla weʼraajüin maʼin tü nukuwaʼipakat. Wane kasa waaʼinrajatka shia wachuntuinjatüin nümüin Jehová washatüinjatüin nukuwaʼipa chi Nüchonkai jee nnojoluinjatüin yaletüin waaʼin. Weʼraajüle maʼin nukuwaʼipa Cristo, washateerü tü nukuwaʼipakat Jehová jee nnojoleena kashapajaaralin waya (Mat. 18:26-30, 35).

JÜLÜJASHI NAAʼIN JEHOVÁ CHI NNOJOIKAI YALETÜIN AAʼIN

15. ¿Kasa naaʼinraka Jehová süpüla nikeraajüin tü ashajünakat suluʼu Salmo 138:6?

¹⁵ (Paashajeʼera Salmo 138:6). Kojutushii nümüin Jehová na wayuu nnojoliikana yaletüin aaʼin jee na nnojoliikana kasajanain sümüin wayuu. Anashii wekirajaale nachiki noʼutku naya wayuukana, eesüjaʼa nnojorüle waapüin maʼin nachiki. Ashajünapejeʼe nachiki suluʼu tü Bibliakat. Sümaiwa paala eejatü wanee wayuu Débora sünülia, shia aaʼinmajaapuʼuka nüchonnii Isaac otta Jacob. Saaʼinrüin tia soʼunnaa 125 juya. Nüshajüin Moisés süchiki wayuukat tüü suluʼu tü Bibliakat nutuma Jehová süpüla sütüjaanüin aaʼu alin shia nüpüla Jacob otta na nüpüshikana (Gén. 24:59; 35:8). Kakalia mapa, nüneeküin Jehová David süpüla nuluwataainjachin naaʼu na israelitakana. Arüleejapuʼushi nia anneerü wanaa sümaa nüneeküin nia Jehová (2 Sam. 22:1, 36). Soʼu jemelin Jesús, nüküjain Jehová namüin waneinnua wayuu arüleejülii süchiki tia nakajee waneinnua aapiee (Luc. 2:8-11). Niiʼiyatüin Jehová nujutu nümüin Simeón otta Ana wanaa sümaa nüneeküin naya süpüla neʼraajüin chi Mesíaskai süpülapünaa outuin naya, jama laülaayuuin naya wanaa sümaa tia (Luc. 2:25-30, 36-38). «Mayaainjeʼe miyoʼuin maʼin Jehová, jülüjashi naaʼin chi nnojotkai yaletüin aaʼin».

16. ¿Kasa naaʼinraka Jesús sutuma nüshatüin nukuwaʼipa chi Nüshikai?

¹⁶ Nüshatüin Jesús nukuwaʼipa chi Nüshikai. Kojutushii nümüin Jesús na wayuu nnojoliikana yaletüin aaʼin maʼaka naaʼinrüin shia Jehová. Nikirajapuʼuin Jesús na wayuu matüjainkana süchiki karaloʼuta jee na nnojoliikana kasajanain sümüin wayuu, süchiki nuluwataainjachin Maleiwa (Aluw. 4:13; Mat. 11:25). Sutuma alin wayuu nüpüla Jesús niiyajüin na ayuuikana jee niiʼiyatüin nojutu namüin (Luc. 5:13). Wanee ai süpülapünaa nuʼutunuin aaʼin Jesús nuʼlojooin nooʼui na nikirajüinkana. Tia shia wanee aʼyatawaa naaʼinrapuʼuka wanee achepchiee (Juan 13:5). Süpülapünaa nüleʼejüin Jesús nüchikuaʼa sirumatuʼumüin naapüin namüin na nikirajüinkana wanee aʼyatawaa anaka maʼin. Shia nakaalinjain na wayuukana süpüla katüinjatüin noʼu süpüla kaʼikat süpüshuaʼa (Mat. 28:19, 20).

17. ¿Kasa waaʼinrajatka süpüla washatüin nukuwaʼipa Jehová? (Piirakaa sümüin tü ayaakuaakat).

¹⁷ Washata nukuwaʼipa Jehová. Waaʼinrüin tia wanaa sümaa waküjain pütchi sümüin wayuu süpüshuaʼa jaʼitairü naatain nakuwaʼipa, neʼiruku, koleejiale naya jee nnojoliire koleejiain naya. Washatüle nukuwaʼipa Jehová nnojoleerü yaletüin waaʼin jee kojuteerü wamüin wayuu suulialeʼeya neʼe kojutuin waya wamüinjiraa (Filip. 2:3). Talateerü naaʼin Jehová wamaa washatüle nukuwaʼipa jee kojutule wamüin palajana na waneinnua (Sof. 3:12; Roma 12:10).

18. ¿Jamüsü anakaʼa washatüle nukuwaʼipa Jehová?

¹⁸ Wachajaale maʼin sukuwaʼipa süpüla washatüin nukuwaʼipa Jehová kamaneejeena waya sümüin wayuu, nnojoleena ichein waya süchiirua wanüiki jee nnojoleena waya kashapajaaralin. Kojuteerü wayuu wamüin maʼaka kojutuin naya nümüin Jehová. Wachajaale maʼin sukuwaʼipa suulia yaletüin waaʼin kojuteena waya nümüin Jehová (Is. 43:4).