Kojutushii maʼin jia namüin na wawalayuukana mayaainjeʼe laülaayuuinnapain jia

«Ponusü maʼin taaʼin wainmain tü kasa eekat süpüla taaʼinrüin majayülüiwaʼaya taya. Isapejeʼe tachiki tia maaʼulu süka laülaaitpain taya» (Connie, 83 suuyase).

Eesüjaʼa isale püchiki paaʼinrüin wainma kasa sutuma wayuuichipain miyoʼu pia maʼaka sülatüin sümüin tü wawalakat. Eesüjaʼa mojule paaʼin sutuma isaitpain püchiki piʼyataain nümüin Jehová maʼaka paaʼinrüin shia paala. ¿Kasache anaka süpüla paaʼinrüin suulia mojuin paaʼin?

¿KASA PAAʼINRAJATKA NAASHIN JEHOVÁ?

Anashi püsakirüle paaʼin sünain tüü: «¿Kasa nuchuntaka Jehová tamüin?». Ashajünüsü suluʼu Deuteronomio 6:5 wanee pütchi aneetka atuma waaʼin: «Alinjachi püpüla Jehová süka süpüshuaʼa paaʼin, süka süpüshuaʼa pukuwaʼipa otta süka süpüshuaʼa pütsüin».

Wayaawata aaʼu sükajee pütchikat tüü, shiain nücheküin Jehová waʼyataainjanain nümüin süka süpüshuaʼa waaʼin. Sutuma tia nnojotsü anain wayoujireʼerüle wakuwaʼipa namaa na waneinnua otta nnojotsü anain jülüjale waaʼin isain wachiki waaʼinrüin tü waaʼinrapuʼukat paala.

Jimaʼaliiwaʼaya pia wainma tü piʼyataapuʼukalü anain nümüin Jehová jee paaʼinrüin shia süka süpüshuaʼa paaʼin. Mayaainjeʼe isaitpain püchiki paaʼinrüin tia ayatüshia pia aʼyataain nümüin Jehová süka süpüshuaʼa paaʼin. Tü kojutukat maʼin nümüin Jehová shia piʼyataain nümüin süka süpüshuaʼa paaʼin maʼaka paaʼinrapuʼuin sümaiwa.

Kojuyasü ayaakuaa: Weʼrüin wanee wawala kakaliaitka aʼyataain nümüin Jehová. 1. Shiyaakua tü wawalakat sünain aküjaa pütchi sainküin miichi majayülüiwaʼaya shia. 2. Shiyaakua tü wawalakat maaʼulu yaa, aküjasü shia pütchi suluʼupünaa teleepono sümaa wanee wawala majayüt. — Jimaʼaliiwaʼaya pia aʼyataapuʼushi pia nümüin Jehová süka süpüshuaʼa paaʼin. Shiaʼaya neʼe paaʼinraka tia maaʼulu mayaainjeʼe wayuuin miyoʼu pia.

PÜKAALINJEENA MAʼIN NA WANEINNUA SÜKAJEE TÜ KASA PÜTÜJAKALÜ APÜLEERUA

Jülüjataa paaʼin tüü, mayaainjeʼe wayuuin miyoʼu pia eeyülia tü kasa eekat süpüla paaʼinrüin, tü kasa isapuʼukat püchiki jimaʼaliiwaʼaya pia.

Pükaalinja na waneinnua sükajee tü kasa pütüjakalü apüleerua. Jülüja paaʼin süchiki tü namakat waneinnua anoujashii namaiwajana ashajünaka achiki suluʼu tü Bibliakat.

David, chi aluwataashikai: «Jintüitpuʼushi taya eekajasaʼa jooluʼu laülaaichipa taya. Nnojoishi teʼrüichin wanee wayuu lotokai akuwaʼipa müliain maʼin, nnojoishii teʼrüinain nüchonnii sünain ojulijakuʼu maa eküülü» (Sal. 37:25).

Josué: «Jülüja jaaʼin, alüʼütshi taya süpüla outaa. Jütüjaashanta aaʼu shikeraajüin süpüshuaʼa tü nümakat jümüin chi Jümaleiwasekai Jehová. Jiʼrüin shikeraajüin süpüshuaʼa tü nümakat. Nnojotsü eein waneesiaakaijeʼe pütchi eekai nnojoluin shikeraajüin» (Jos. 23:14).

Nnojotsü nüküjain neʼe David nümaa Josué süpaʼa mma tia. Natüjaa aaʼu shiimain tia sutuma süpüshuaʼa tü neʼrakat soʼunnaa wainma juya wanaa sümaa naʼyataain nümüin Jehová. Kaawainsüjeseʼe nanüiki. Akaataajaʼa joo piakai, sutuma kakaliain piʼyataain nümüin Jehová kaawainsü pünüikiya.

Anashi yootule pia namaa na wawalayuukana süchiki tü kasa anasü piʼrakat sutuma kakaliaichin piʼyataain nümüin Jehová. Anashi püküjale namüin süchiki tü kasa anasü naaʼinrakat Jehová napüleerua na wayuu aʼyataashiikana nümüin. Katchinjeerü naaʼin naapajapa pünüiki jee talateeriaʼaya paaʼin (Roma 1:11, 12).

Katchinjeerü naaʼin na wawalayuukana neʼrawaire pia sünain tü outkajawaakat, katchinjeerü paaʼinña namaale pia na wawalayuukana. Anuu tü sümakat Connie tü wachuntayütkalü anülia: «Anasü taaʼin sutuma namaain taya na tawalayuukana sünain tü outkajawaakat, jama teʼrüin alin maʼin taya napüla. Asülajawaisü taya kasa namüin na wawalayuukana süpüla natüjaain saaʼu alin naya tapüla. Otta tachajaain sukuwaʼipa süpüla namaain taya sünain aʼyatawaa nümüin Jehová».

TALATÜSÜ NAAʼIN JEHOVÁ PÜMAA SUTUMA PIʼYATAAIN NÜMÜIN

Ashajünüsü suluʼu tü Bibliakat nachiki wainma wayuu ayatakana alin nüpüla Jehová mayaainjeʼe nnojoluitpain süpüla naaʼinrüin wainma kasa sünain aʼyatawaa nümüin. Jülüjataa waaʼin nukuwaʼipa wanee israelita, Simeón nünülia. Jaʼapüichi nia wanaa sümaa joʼuuin Jesús. Oʼunawaishi nia suluʼumüin tü aʼwaajüleekat Maleiwa. Eesüjaʼa mojule naaʼin niʼrapa wainmain tü kasa naaʼinrakat na wayuu jimaʼaliikana nuulia sünain aʼyatawaa nümüin Jehová. Eesüjaʼa jülüjale naaʼin nnojoluin talatüin naaʼin Jehová nümaa süka isaitpain nüchiki naaʼinrüin wainma kasa sünain aʼyatawaa nümüin. Nnojotpejeʼe shiimain tia. Naashin Maleiwa wayuu «loto akuwaʼipachi otta kanoulashi maʼin nia» otta nüneeküin nia süpüla niʼraajüin Jesús joʼuuiwaʼaya nia. Naapüin Jehová tü nüpülainkat nümüin Simeón süpüla nüküjain namüin na waneinnua süchiki tü naaʼinrajatkat Jesús sutuma niain chi Mesíaskai (Luc. 2:25-35). Sutuma naapüin Jehová tü nüpülainkat nümüin Simeón watüjaa aaʼu nnojoluin shiain jülüjain naaʼin Jehová ayuulin Simeón otta isain nüchiki naaʼinrüin wainma kasa. Shia jülüjaka naaʼin kanoulashaatain maʼin nia.

Weʼrüin yootuin Simeón nümaa José otta María jee neeʼiyatüin nümüin chi nachonkai. — Sutuma kojutuin Simeón nümüin Jehová nuuʼulaain niʼrüinjachin Jesús joʼuuiwaʼaya nia otta naapüin tü nüpülainkat nümüin süpüla nüküjain süchiki tü naaʼinrüinjatkat Jesús.

Mayaainjeʼe isain püchiki paaʼinrüin wainma kasa sünain aʼyatawaa nümüin Jehová, punouja sünain talatashaatain maʼin naaʼin Jehová pümaa, jama piʼyataain nümüin süka süpüshuaʼa paaʼin. Kojutusü maʼin nümüin Jehová tü waaʼinrakat waneʼewai wakua sünain aʼyatawaa nümüin otta matüjainsai nia achuntaa wamüin waaʼinrüin wanee kasa isaka wachiki (2 Cor. 8:12).

Anasü shiale paaʼinmaain maʼin tü puunteekat sünain aʼyatawaa nümüin Jehová maʼaka saaʼin aküjaa pütchi süka carta jee suluʼupünaa teleepono jaʼitakajeʼe motsoʼoin pümaʼa sünain. Wane kasa anaka süpüla paaʼinrüin shia puunejüin na wawalayuukana süpüla pütütüleʼerüin naaʼin jee shiaje püshajüin namüin wanee karaloʼutachon. Mayaainjeʼe piʼrüin nnojoluin wainmain maʼin tü paaʼinrakat napüleerua katchinjeerü naaʼin na wawalayuukana, jama kaawain pünüiki sutuma kakaliaichin piʼyataain nümüin Jehová.

Mayaainjeʼe wayuuin miyoʼu pia sümaa eein tü ayuuikat pünain, puunteerü paaʼinrüin wainma kasa sünain aʼyatawaa nümüin Jehová. Anasü paashajeʼerüle tü pütchikat «Sükaalinjain wanee wayuu suulia suʼuniraain saaʼin» eere saashajaain süchiki wanee wawala jaʼapüirü chejeʼewatka África.

Sutuma neʼrüin na wawalayuukana kanoulain jia jee waneepiain jia nümaa Jehová, katsüinsü naaʼin. Sutuma jüchecherüin jaaʼin waneepia soto jaaʼin tü sümakat Hebreokana 6:10: «Lotusü nukuwaʼipa Maleiwa, nnojotsü motuin naaʼin tü kasa anasü jaaʼinrakat, nnojotsiaʼaya motuin naaʼin alin jüpüla tü nünüliakat, jama jiʼyataain napüleerua na aneekuushikana jee ayatayülia jaaʼinrüin tia».

AYATA PÜKAALINJAIN NA WAWALAYUUKANA

Naashin waneinnua tottoot wainma na wayuu laülaayuu anakana aaʼin süka nakaalinjain wayuu. Jamüshiijaʼa naya, nnojoishii ayuulin maʼin naya, katsüinsü naaʼin otta kakaliashii katüin oʼu.

Nnojotsü oʼunuin tü laülawaakat jee tü ayuuliikat nuulia wanee wayuu sünainjee neʼe nükaalinjain wayuu. Nnojoleenapejeʼe laülaain jee outuin waya niapa Jehová aluwataain saaʼu tü mmakat (Roma 5:12).

Süpüshuaʼa tü paaʼinrakat süpüla niʼraajünüinjachin Jehová sutuma wayuu sükatchinreerü punoula jee aneerü paaʼin sutuma. Jiakana wawalayuu laülaayuuinnakana soto jaaʼin nnojoluin motuin naaʼin Jehová tü jaaʼinrakat süpüleerua jiʼyataain nümüin otta kojutusü maʼin namüin na wawalayuukana kanoulain maʼin jia.

Sükaalinjain wanee wayuu suulia suʼuniraain saaʼin

Eejatü wanee wawala jaʼapüirü aküjaka pütchi süka tü kareetachonkot. Süküjaka pütchi sümüin wanee majayüt otta saashajeʼeraka sümüin tü sümakat Jeremías 29:11, eere sümüin: «Nnojoleena jia müliain aaʼin taapeerü wanee ana jümüin». Süsakiraka shia jee sümaka sümüin: «¿Pütüjaa aaʼu kasa naaʼinreetka Maleiwa püpüleerua?».

Shiʼyalajaka maʼin tü majayütkat sümaa sümüin: «Nnojoleerü müliain taaʼin otta aneerü takuwaʼipa nutuma Maleiwa watta kaʼi. Anasia müin paashajeʼerüin tamüin türa pütchikat, shiaʼaya maʼin tachuntaka tia nümüin Maleiwa. Sutuma wainmain tü kasa alatakat tamüin oʼuniraweesü taaʼin. Achuntusü taya soʼukaitpa nümüin Maleiwa süpüla tayaawatüin saaʼu shiimainrejeʼe jülüjain taya naaʼin. Nusoutaka tamüin Maleiwa pükajee süka püsaküin taya otta paashajeʼerüin tamüin wanee pütchi suluʼujee tü Bibliakat mayaainjeʼe nnojoluin piʼraajüin taya jee tayaawatüin saaʼu tü keeʼireekat naaʼin Maleiwa tapüleerua».

Shiiʼiyataka tü wawalakat sümüin tü majayütkat waneirua pütchi suluʼuka jw.org eere saashajaain süchiki tü saaʼinrajatkat süpüla nnojoluinjatüin jülüjain saaʼin suʼuniraain saaʼin. Suunejaain shia sünain tü outkajawaakat jee süküjain sümüin jamüin sukuwaʼipa süpüla shikirajaain sünain tü Bibliakat. Wanee semaana süchikijee tia, suʼunaka tü majayütkat sünain tü outkajawaakat jee suʼttaka sünain ekirajawaa süka tü karaloʼutakat Anainjatka atuma pukuwaʼipa waneepia.

Jaʼitasü jeʼrain wouyase eeshii süpüla waküjain pütchi süka tü kareetachonkot.